我閣開一个新類別，叫做「台語雜念」，即个雜念，意思兩交含 (liong2-kau1-kann5)，卜sueh4做「seh8-seh8唸，無采工」，抑是「khok8-khok8想，空費神」攏好，kun1-tu1 攏共紲(sua3)手記落來。即馬來寫第一篇。會想著卜寫即篇，有因端(in1-tuann1)，亦有助緣。因端當然我對台語个一點心。助緣是小淘，包括學生時代有一擺阮塊講話，閣有伊最近佇遮予我个回應。
ing2-tang1-si5 我真歹狗，三彎兩轉 (sann1-uan1 nng7-tng2)就去小淘佮凱哥姻宿舍共姻 cak4-co7，食--姻、睏--姻，煞從來毋捌共儂講--按--怎--樣，tann1 著佇遮共姻會失禮閣佮說多謝。
有一kai2，小淘个冊架仔頂加出一本冊，是邱文錫佮陳憲國兩位先覺合編个《實用華台語對照典》，迄陣是初版，無外大本。小淘共我講，即本冊對伊不止有路用。我袂記得按怎共應矣。總是，迄陣我个意思是講，若我著袂買。
論真我个心ciann5按怎，迄陣定著是無講清楚，即馬著來小可拆明一下。拄著儂問講：「國語ｘｘ，台語按怎講？」，若照我 ing2-pai2 个氣頭 (khui3-thau5)，對喙著應：「我管thai3伊北仔話按怎講！」。
咱佇心肝內先有一个意思，即个意思，毋是語言的(tik4)个，只是一種感覺，閣來想卜講予儂知，才著揣佮即个意思有配搭个話，即个話著是台灣話，毋免先想北仔話按怎講，才閣來翻做台語。
總是，即號理想，予北仔話个教育佮書冊 cinn3-kui1大漢个咱，卜塔有才調全然(cng5-jian5)做會到。總是，我卡執訣(cip4-kuat4)，想講宜理是(gi5-li2-si7)著按呢才會凍扑救咱个語言佮文化。
破腹講，這嘛是塊閃西風啦。我早著知影卜翻譯別種語言个啥麼話，時常是著力(tioh8-lat8)兼歹看个穡頭。sok4-sin3攏勿 chap4 伊，歸个直接想台語。
卡早我是家治塊學台語，一儂一家代，公媽隨儂 chai7，佮儂無 ti7-tai7。ma1-a2-koh4，自我猴傍虎威 (kau5 png7 hoo2-ui1)，so5入來大學(tua7-oh8)个台語系塊予儂叫老師，彼著閣無共款啦。學生仔凊采挓一个北仔話 chiang5-cai7用个成語「因噎廢食」問我台語按怎講卡好，我著 gang7 去矣。
我一直認為：文言文是所有漢語系語言个公業 (kong1-giap8)，毋是姻北仔話个私塚 (su1-thiong2)。遮儕文言文个語詞予北仔 ann5-ann5 去用，是按怎咱袂使共款來共利用，照字讀 in1-it4# hui3-sit8# 著著啦。
按呢講，學生咁會滿意？
閣親像我為著【起立、敬禮、坐下】，揣出一組自信不止 ba7-tah4 个台語在來詞 (cai7-lai5-su5)，嘛無才調予讀者全望(cng5-bang7)，亦袂kue3得小淘塊回應講，儂北仔話聽著卡雌雄 (chi1-hiong5) 啦。
新版个《華台語對照典》都亦出幾那年囉，我一直無買來參考。tann1，予學生考 to2--去，無 chuan5--一本仔來參考嘛 khu5 袂落去 lioh4。新版即本，做枕頭嘛嫌傷峘，an1 汝著知影加外大本矣。伊閣有一个所見奇 (soo2-kian3-ki5)，著是有 kah4 CD 予汝裝踮電腦內底方便查，伊个軟體資料有一大 tu1 大張个彩色相片，動物、植物(sit8-but8)、器物攏有，計共 654 張。毋閣愛配合冊來使用才會 ka1-nng5。
新版个資料已經有夠豐富个啦（毋閣查無【因噎廢食】），參考價值足峘。但是，若卡綿爛 ping2 咧，著會看出伊編輯體例个制限佮個別詞條个 ting5-tann5。先講到遮，另工有閒才閣談。
Comments powered by Disqus.