十二个漢字字爿个台語稱呼

面冊有一段中國儂製作个短片，是咧示範十二个漢字字爿[jī-pîng]（字部、部首） 个毛筆書法。

伊有列出華語个講法，其中有个 有特別个稱呼，毋是直接唸迄个部首个讀音， 可比講「通、遊、道、逸」个字爿「⻎」，台灣个華語文教育干焦會曉講 〔辵(ㄔㄨㄛˋ)部〕，其實傳統漢文教育有專門个叫法：華語叫做「走之底」， 台語叫做「走馬仔」。

以下詳細來講，先列華語名，下底列台語名，有个台語講法有幾若種又名。

一、〔右耳旁〕：
【右鉤耳 iū-kau-hīnn】，例字：「邦、邱、郎、郊」。部首个完整漢字佮字音是 【邑 ip】。

二、〔左耳旁〕：
【左鉤耳 tsó-kau-hīnn】，例字：防、阮、附、陳」。部首个完整漢字佮字音是 【阜 hū】。左鉤耳佮右鉤耳合稱【雙鉤耳 siang-kau-hīnn】、 【鉤耳爿 kau-hīnn-pîng】。另外有【單鉤耳 tuann-kau-hīnn】，是指「印、卻」个正爿。

三、〔弓字旁〕：
【弓字爿 kiong/king-jī-pîng】。「弓」唸 kiong 是文音、king 是白音。 例字：「引、弦、強、張」。

四、〔走之底〕：
【走馬】、【走馬仔 tsáu-bé-á】、【走馬運 tsáu-bé-ūn】、【走馬路 tsáu-bé-lōo】。 例字：「巡、近、迎、送」。部首个完整漢字佮字音是【辵 tshiok】。

「走馬仔」粵語叫做「撐艇仔」（t͡sʰäːŋ⁵⁵ tʰɛːŋ¹³ t͡sɐi̯³⁵）。 日語叫做「之繞（し(ん)にょう）」。

請注意，「走馬仔」毋是指「走」个字部，也毋是指【馬字爿 má/bé-jī-pîng】 。

五、〔絞絲旁〕：
絲字爿[si-jī-pîng]、辮絲爿[pīnn-si-pîng]、陪絲爿[puê-si-pîng]。 例字：「綿、絹、約、紙」。部首个獨立漢字佮字音是【糸 bi̍k】。

六、〔寶蓋頭〕：
覆模[phak-bôo]、匼模[khap-bôo]。例字：「安、室、宇、宙」。 部首个獨立漢字佮字音是【宀 biân】。

「宏」字有儂講【𥴊壺仔宏 kám-ôo-á-Hông]，thang 佮弓字爿个「弘」、 三點水[sann-tiám-suí ]个「鴻」來區別。

七、〔反犬旁〕：
【反犬 píng-khián】、【反狗 píng-káu】、【反狗仔 píng-káu-á】。 例字：「狗、狼、狐、狸」。部首个完整漢字是【犬 khián】。

八、〔女字旁〕：
【女字爿 lú/lí-jī-pîng】。

九、〔建字底〕：
即个字爿我毋知台語有啥特別稱呼，請各位先進賜教。例字：「廷、延、建」。 「廴」字台語音 ín。 即个字爿，日語叫做「延繞（えんにょう）、廴繞（いんにょう）、 建繞（けんにょう）」。日語「繞」（にょう）是「之繞」佮「廴繞」兩種字爿个通稱。

十、〔豎心旁〕：
【徛心 khiā-sim】、【徛心爿 khiā-sim-pîng】、【抱心 phō-sim】（多義詞）、 【抱心爿 phō-sim-pîng】、【抱柱爿 phō-thiāu-pîng】。 例字：「悟、恨、情、懷」。

十一、〔國字框〕：
【國字殼 kok-jī-khak】。例字：「因、囝、圍、園」。

十二、〔心字底〕：
「下跤一个【心 sim】--字」。例字：「忠、恕、思、懇」。

十年前，我捌發表過一篇 〈漢字字爿的台語稱呼〉， 有較完整个討論（毋過無寫著日語、粵語个講法），通做參考。