南部台語：「商展」「夜市仔」

南部台語：

「商展 siong-tián」是有時有陣，某一工（可比一禮拜一工）、某一段時間（大常是暗時），小生理儂才會集[huē-tsi̍p]佇一塊大空地仔，抑是巷仔路邊，來排擔仔[tànn-á]。賣喙食物[tshuì-tsia̍h-mi̍h]、日用品，予儂耍[sńg]東耍西，親像khó銃扑雞胿仔、彈[tuānn]珠仔台、坐電動碌硞[lo̍k-kho̍k]馬仔，有个無个攏有。

「夜市仔 iā-tshī-á」是集中固定佇一條街路雙爿（抑是一寡地點），主要是小點擔，一般攏是暗時上鬧熱。夜市仔个擔仔位，tshāi佇遐，袂捒走。

即兩種，真濟所在攏一律叫做「夜市仔」，無分別。

「商展」个原始意義，是卡正式个「商業產品个展示佮販賣」，親像都市內才有个「家具展、資訊展、音響展、旅遊展」迄種个。只是南部儂真巧神[khiáu-sîn]，將伊借來稱呼「草地版、赴墟[hù-hi]式、常民化」个商業活動。「高級个商展」久久才一擺，而且攏佇都市、城鎮，庄跤儂按怎無容允予怹辦屬於家治个商展？