本文
台語「印象」目前多數儂講 ìn-sióng，「象」佮「欣賞」个「賞 sióng」文言音變做仝音字。
先進劉建仁先生論講：
“我對伊的印象(in3-siong2)袂䆀。” 即句咱定定講，定定聽--着。毋過，”象”字的音是《廣韻》徐兩切(上、養、邪母)，《彙音寶鑑》讀做 siang7、siong7、tshiunn7(動物名)，《甘台字》文讀讀做 siong7，白讀讀做 tshiunn1(phainn2-bin7-tshiunn1)、tshiunn7。所以，”印象” 應該讀做 in3-siong7/siang7 才着，為按怎讀做 in3-siong2 ， “象”變做上聲 siong2 ?
《臺日大》無收 “印象” 即个詞，可見 “印象” 是二戰後對華語借來的詞。佇華語 “印象” 讀做ㄧㄣˋ ㄒㄧㄤˋ。”象” 的去聲調的調值(51)佮台語的上聲調調值(53)倚倚，因為按呢，無清楚台語字音的儂，有儂開始將 “象” 照華語去聲調讀做 siong2，經過廣播電台、電視的傳播，現在大家攏講 in3-siong2 矣。《教台典》講 : “ 印象，in3-siong7，俗唸做 in3-siong2。” 不過，俗讀的勢面較大。(邪母是全濁，佇台語，全濁上聲字歸陽去)。
「象、像」本來屬佇全濁聲母陽上調，文言音照講著比照「全濁上 歸去」个規律，唸陽去聲 siōng，但是泉腔無的確，有个即款字會唸陰上。
阮二十幾年前綴洪惟仁老師去調查八十幾歲个新竹儂鄭蕊珠女士，伊是老派同安腔，少年時捌跟過福建來台个清朝漢文先生讀冊，鄭女士讀地藏經，「形像」个「像」就是唸 sióng 上聲。
當成台語多數儂慣勢講「印象 ìn-sióng」有可能是頂面迄款偏泉腔湠開个結果。
不而過，也毋是所有个泉腔攏按呢，彙音妙悟所記个「象、像」猶原是陽上第六聲。
「印象」表示「腦中个印象」即種意思來自日語，無論華語、台語，應該攏是對日語吸收--來个。1932 年《臺日大辭典》無收「印象」，但是 1938 年《新編日臺大辭典》就有收矣，有註明（國），表示語源是日語，以下引用日臺典上冊 p.176：
いん-しょう 印象。住入頭腦的感覺 [tiâu-ji̍p-thâu-náu=ê kám-kak]。印入心的像 [ìn-ji̍p-sim=ê siōng]。（國）印象[ìn-siōng]。印象[ìn-tshiōng]。子供に惡い－－を與へるな＝不可被囝仔感着歹印象 [m̄ thang hōo gín á kám tio̍h pháinn ìn siōng]。【熟】－－主義＝印象主義[ìn-tshiōng-tsú-gī]。－－派＝印象派[ìn-tshiōng-phài]。－－批評＝印象批評[ìn-tshiōng-phue-phîng]。
咱閣查考白話字教會公報，其實 1923年八月，471 卷 “Hi-bōng” 即篇文就開始出現 ìn-siōng：
Ki-tok koh-oa̍h chit-ji̍t toā lâng chò tiong-sim, ēng si̍t-chāi moá-sim ê hoaⁿ-hí lâi kám-siā, kî-tó. Iū-koh thoân-tō sian-siⁿ, bo̍k-su ēng te̍k-pia̍t soat-kàu, chiong koh-oa̍h hoaⁿ-hí ê ìn-siōng lâi khek tī sìn-chiá ê náu-lāi.
（台語漢字轉寫：基督閣活即日大儂做中心，用實在滿心个歡喜來感謝，祈禱。又閣傳道先生，牧師用特別說教，將閣活歡喜个印象來刻佇信者个腦內。）
統計白話字教會公報 1885年至1968年改漢字版為止，ìn-siōng（印象）即个詞出現个情形：
1920年代： 4 篇
1930年代： 37 篇
1940年代： 21 篇
1950年代： 72 篇
1960年代： 61 篇
計共： 195 篇
若是 ìn-sióng 个講法，只出現一篇，佇1952年五月 761 卷。若是 ìn-siòng 个講法，一篇都無。
「象、像」漳腔也有唸做 tshiāng。
目前台灣優勢講法，「印象」唸 ìn-sióng，「對象」唸 tuì-siòng，「氣象」唸 khì-siōng，也有儂唸 khì-siòng。仝即字，本來也應該唸仝音 siōng，但是因為漳泉濫个關係，仝字佇三个詞煞生出三種本調，有較亂。
閣論到「高尚」，目前台語儂普遍唸做 ko-sióng，尤其是白冰冰个廣告詞「蓋高尚 kài ko-sióng」（佮台語「介膏賞」仝音）足出名。即字佇中古音《廣韻》有兩音：「時亮切」，去聲，對應來台語是 siōng（泉腔）、siāng（漳腔）。另外一音是「市羊切」，平聲，佮「常 siông/siâng」仝音。
台日大辭典就有收「高尚 ko-siōng / koo-siōng」，伊註明是「國」，就是日語來个。「尚」是正音 siōng。
1885~1968 年間白話字教會公報，寫著 ko-siōng，「尚」唸第七聲，出現篇數統計：
1910年代： 2 篇
1920年代： 25 篇
1930年代： 59 篇
1940年代： 25 篇
1950年代： 19 篇
1960年代： 15 篇
計共： 145 篇
上早迄篇是 1917.08 第 389 卷內个〈Gōng thng〉（戇湯），總共寫著三擺 ko-siōng，第一擺迄句是：
Chiū-sī lâng tī siau-khián sàn-pō͘ ê sî, ē hō͘ ko-siōng su-siúⁿ ê chok-iōng chiām-sî hioh-khùn, iā soà hō͘ khah hā-téng sim-tì ê su-siúⁿ chok-iōng chiām-sî chīn i ê tio̍h-boâ.
（台語漢字改寫：
「就是儂佇消遣散步个時，會予高尚思想个作用暫時歇睏，也紲予較下等心智个思想作用暫時盡伊个著磨。」
注意當時「思想」唸 su-siúnn，毋是 su-sióng。）
若是 ko-sióng，「尚」唸第二聲，教會公報只出現兩擺，攏是佇 1961 年。
按呢「尚」字會變做「賞 sióng」个全音字，到底是按怎來个？老前輩劉建仁先生講：
我ka2-na2會記得終戰前着有儂講 ko1-siong2，可能是受日語”高尚(kho5# sio2#)”的音調的影響。迄陣時行的話是 “激高尚(kik4-ko1-siong2)” = 日語 “高尚ぶる” = 華語 裝高尚的樣子。
結論：就台語普通腔來講，「象」、「尚」兩字个正音攏是第七聲。但是即兩字目前佇「印象」「高尚」兩个詞，攏走音變做第二聲，原因無仝款，「象」走音變第二聲，可能是一種泉腔个影響（也可能是受華語影響）；「尚」走音變第二聲，可能是受日語影響。
面冊網誌留言
Jūkhái Piãbér Lîm
「印象」新詞iā-kú-káⁿ？
khì-siōng [氣象] (1)氣色，面貌，外貌。 (2)（日）氣象，天氣。 (1)看伊ê ∼∼。
潘科元
1923 年教會公報開始出現 ìn-siōng
Jūkhái Piãbér Lîm
台日 無收？~”~
潘科元
無收。總--是，「印象」絕對毋是戰後个新詞。
黃建盛
莫怪我讀in3siong7.
Jūkhái Piãbér Lîm
講起來， 3 種我 lóng ē 講 iā-kú-káⁿ
吳紹謙
阮兜是讀作第七聲
潘科元
本文有補充「蓋高尚」唸做「介膏賞」个分析。最後个結論是：
就台語普通腔來講，「象」、「尚」兩字个正音攏是第七聲。但是即兩字目前佇「印象」「高尚」兩个詞，攏走音變做第二聲，原因無仝款，「象」走音變第二聲，可能是一種泉腔个影響（也可能是受華語影響）；「尚」走音變第二聲，可能是受日語影響。
潘科元
像「接觸 tsiap-tshiok」老輩儂慣勢講 tsiap-sio̍k，迄个 sio̍k 是受日語影響。
潘科元
「寂寞」前字俗音 siok，原因可能是有邊讀邊，因為「叔」个文言音是 siok，像「秦叔寶 Tsîn Siok-pó」。
Comments powered by Disqus.