小川尚義主編《臺日大辭典》（1931年上冊、1932年下冊，以下簡稱台日典），猶原是到目前為止上蓋豐富，嚴謹、正確个台語辭典，伊所記錄个是清朝尾到日本時代中期个台灣話。台日典有台語譯本網路版 ，是幾年前林俊育先生熱心義務付出，靠家己一雙手骨整理譯寫个，可惜無儂共伊鬥做，所以有真濟誤寫、落勾个所在。
教育部台語辭典，是定位佇「常用詞」个小型辭典，資料無夠，可比講呂柳仙勸世歌內底有真濟精彩个詞彙、俗語，教典查無，來台日典就查有。咱若正實有心欲提升台語程度到一个閣較懸个新境界，無查台日典袂用得。透過林長老勞苦著磨所建置个台日典查詢網，是咱欲接觸台日典上蓋方便个路線。總--是，利用即个網站查台語个時有鋩角著愛致意，以下提供一寡撇步：
a. 查著一个詞了後，著愛點入去「原冊掃描」來確認標音、解說各方面有走爭去無（首頁有連結一份台日典索引羅馬字對照表，對照台日典所用个假名式台語音標佮教羅）。
b. 一个詞咱若查無，有可能是因為腔口無仝，予台譯版列佇「其他腔口」（其實原辭典是分列做無仝詞條，但是台譯版kap-kap做伙），可比咱佇台譯版首頁「台語(羅馬字，數字調號)：」欄位扑優勢腔 phoe5-hu（伊預設使用教羅數字版拼音，也有提供台羅數字版查詢顯示，但是咱愛先去改查詢畫面上頂懸个選項），欲查「皮膚」即个詞日本時代有咧講--無，結果查無！其實伊有收，咱著愛佇台語欄改扑台北腔phe5-hu才查有「皮膚」即條，抑是換去「其他腔口(羅馬字，數字調號)：」迄欄扑phoe5-hu才查有。
c. 有時著試用漢字去查詢（佇「漢字：」欄輸入），像頂面个例，若佇漢字欄扑「皮膚」就查有。
d. 拄著台語特有詞，漢字僫稽考个詞，原辭典个用字佮當今教典時常有出入，而且台譯版閣會將漢字欄一部份个漢字改做羅馬字，閣再加添一重查詢个障礙。
可比講，咱聽儂講：台語 bô-ta-uâ 就是「無奈何」即三字。咱對伊講个音無把握（抑是對羅馬字無熟），想講：無，我去台日典台譯網站查詢頁面个漢字欄扑「無奈何」查看有--無。結果，無！正實無？毋是啦，伊佇漢字欄改做漢羅混用个寫法，有一筆編號3147，漢字欄寫做「無奈ôa」，台語標音欄是 bô-tāi-ôa，解釋欄是「＝[無tā-ôa]。」，無例句；閣有一筆編號3218，漢字欄寫「無tāi-ôa」，台語標音欄是 bô-tāi-ôa，解釋欄是「無奈何，無法度，不得已。」，例句是「∼∼∼ teh弄米籮(lôa)。」（「無奈何」即个例，也會使去解釋欄，抑是例句欄，其中之一扑「奈何」試看覓，但是毋是兩欄攏扑，按呢條件變傷絚，顛倒歹揣。）
咱發現即兩筆資料顯示个漢字欄寫法無仝，但是台語標音欄煞一模一樣是 bô-tāi-ôa，點入去看圖檔詳細比對，發現原來3218迄筆標音扑毋著，著愛改做 bô-tā-ôa，也就是編號3147所參見个主條目，兩筆佇原冊个漢字攏是「無奈何」，而且咱發現例句「弄米籮」个「弄」佇遮毋是欲唸 lāng，是唸 kāng！
以上个例不止複雜，但是充份顯明：一、即个網站个資料需要好好仔重整、校正、補添。；二、一定愛點入去看原冊掃描檔斟酌確認。
（「無奈何」即个詞「奈何」兩字，台語有文言音也有白話音个唸法，古早較通行白話音，目前顛倒是文言音 nāi-hô 逐家知，但是白話音差不多亡去矣。「奈何」个白話音唸法真濟變體，毋但我頭前提起个唸法爾爾，雖然台日典三字詞「無奈何」並無 bo5-ta-ôa 个唸法，但是佇兩字詞「奈何」伊收个音就有包含 ta-ôa。）
e. 另外，也會使得用 * 號查詢法，勾選『使用「*」當wildcard字元』，扑一个詞起頭一部份个羅馬字，閣接咧扑 * 號（半型星號），予伊列出以這起頭所有个詞。
繼續頭前个例，咱用 * 號查詢法，佇台語音標欄扑 bo5-ta* 毋但查會著迄兩筆「無奈何」，閣查會著別个類義詞，像「[無tāi得ôa] bô-tāi-tit-ôa」，仝款問題，又閣是佇漢字欄漢羅混用，而且咱點入去看原冊，會閣揣著一條「無奈得何」是唸 bô-tā-tit-ôa，這佇網站查無。
f. 有時查無一个詞，咱毋通失志，會使試揣倚音个詞，了後點連結去看原冊圖檔，時常就會揣著。親像即兩工簡秋榮兄問我：台日典咁有收「旺牢 ōng-tiâu」？咱若去查台日典台譯網站，用 ong7-tiau5 去查，干焦查會著「旺朝」，意思是「朝廷興旺」，這佮「旺牢」是六畜興旺[lio̍k-thiok hing-ōng]差大碼咧。總是，咱點入去原冊圖檔看，就會發現原來「旺朝」个下一條就是「旺椆 ōng-tiâu」，這就是咱欲愛个，但是咱若用教育部用字「旺牢」去查，當然無；不而過，因何用 ong7-tiau5 也是查無咧？咱即擺改用「旺椆」去查，有矣！原來伊扑毋著聲調變做 ong7-tiau7 啦，莫怪查無。
向望我了工寫這，會得pang-tsān各位查詢即个網站閣較順手，祝福恁台語文功力日日猛進！
當然，我了个工，佮林俊育長老比起來，是火金姑比赤日頭，我逐工咧利用伊無私付出、著磨苦勞个成果，十分感恩數念[siàu-liām]。也因為有伊即个網站，咱當代濟濟台語文界友志，才會得接觸、享受著台日典个資料，大大提升咱个眼界佮討論个深度。
Comments powered by Disqus.