台語有一句俗語，將儂過身（亡故），講做「去蘇州賣鴨卵」（khì Soo-tsiu bē ah-nn̄g）。即句話應該是「去塗州賣鴨卵」（khì thôo-tsiu bē ah-nn̄g）走音个結果，走音个原因無的確，有可能是無意个，也有可能是刁工个。台日大辭典即兩種講法攏有收，但是無解說語源關係。蘇州儂毋知影即句俗語，因為這是閩、台才有个講法，後來傳去粵語，簡單講做「賣鹹鴨蛋」。
「塗州」就是「地府」，因為拜亡者个跤尾飯，攏有佮一粒鴨卵，亡者得著真濟卵，通[thang]好去地府賣鴨卵，所以才有即句滾笑話。後來變音做「去蘇州賣鴨卵」，因為聽起來愈心適，四界流傳个結果，崁過原來个版本「去塗州賣鴨卵」。
其他閣有兩種語源解說，也佮喪禮个儀式有關，參考： http://zh.wikipedia.org/wiki/%E9%B9%B9%E9%B4%A8%E8%9B%8B
其中个字源有寫做「土丘」（指墓、墓仔埔），這我較無贊同，因為「丘」字白話字是 khu，佮 tsiu 个音差較遠，所以我採用「塗州」，解說做地府、死後个世界，毋是墓。
網路上也有儂直接認定「蘇州」个講法無錯，伊寫講：
『台灣早期大陸移民稱彼岸為唐山，並早就知悉「上有天堂，下有蘇杭」，所以蘇州被視為唐山的天堂，因此回「蘇州」即有落葉歸根回唐山，並有上天堂之意。』（出處：http://blog.udn.com/frankbud/1514642 ）
伊即種講法，我無贊同，福建儂欲轉去唐山[Tn̂g-suann]，當然是轉去福建，哪有轉去蘇州个道理？古早福建俗語：「生在蘇杭二州，死在福建泉州。」（Sinn# tsāi Soo-Hâng# jī tsiu, sí# tsāi Hok-kiàn# Tsuân-tsiu.）蘇州、杭州慶賀出世真厚禮數，生活水準真懸，但是泉州儂對亡者个葬禮閣較鋪排、奢颺[tshia-iānn]，福建儂袂欣羨過往了後閣去蘇州享受。而且迄句『上有天堂，下有蘇杭』嘛毋是閩、台俗語，用即句話來附會解說「去蘇州賣鴨卵」，我看是無通。
（本來發表佇 Facebook 2014-12-23 潘科元網誌）
Comments powered by Disqus.