台灣儂歡喜放捒「接受母語教育个基本人權」

2012-04-27下暗台文讀冊會，阮討論一篇論文，主題是「雙語教育个必要性」。讀完我有一點感想：少數有覺醒个台灣儂，一直強調「儂儂有接受母語教育个權利」，這佇台灣个政治體制佮社會現狀，實在無路用，因為大多數个台灣父母，其實攏當咧行使怹「放捒[pàng-sak]母語个權利」，根本無愛爭取啥乜接受母語教育个基本人權。汝是有伊法？

毋但父母按呢，連阿公阿媽嘛按呢。只要會曉講兩句仔北京話个老儂，真濟攏甘願對孫仔講「台灣國語」，嘛毋肯使用祖先傳落來，家治講了上好个語言來佮孫仔講話。

怹完全認定「放捒祖語、母語，來追求統治者佮世界霸權个語言，囡仔才會有出脫」。即種觀念，佮怹个腦筋絞死死，這是母語學者佮所有關心母語運命个儂，上要緊著愛協力[hia̍p-li̍k]來扑破个。