台灣「三字罵語」个弱化形式

題頭所講个「三字罵語」是專指號做台灣國罵迄个「三字經」。因為卡有教化个關係，現今中年个台語儂卡罕得按呢三字完整出喙，只偆第一字个動詞，後壁兩字省起來，而且迄个動詞繼續講變調。即个變調過个kan₃₁，袂輸是經過一種詞彙化个過程，獨立成做一个單字詞按呢。尤其是台語第三聲陰去，變調以後拄好佮華語無分本變調个去聲共款調型，攏是高降調，即个「巧合」，閣卡促進即个演化。寫做漢字，儂看著唸北仔話音，佮台語音混化混化。

綠島有生理儂做一款白个吊kah仔，尻脊印一个大大大个烏字「幹」，下面兩字卡細字个「好熱！」，聽講去綠島tshit-thô个少年仔，逐个看著足佮意，相爭買來穿。

為卜減輕三字罵語个強烈度，liam3掉受詞，留一个動詞，閣用變調个方式來表示「餘言不盡[î-giân put-tsīn]」。屬佇語用範圍个「弱化」，透過音節直接省略个方式來達成。即種「技巧」，上tsia̍p出現个就是親像「做工做甲thiám kah₃₀...」迄个 kah₃₀。究竟是thiám kah卜死，抑是thiám kah按怎，就無閣講矣，一方面卡婉轉，一方面嘛是因為pūn-tuānn去想話來比並[phīng]。

以上講完第一階段个弱化，閣來論進一步个弱化形式（共款是講一字niâ），有兩種，第一種是將 kan₃₁ 講做聲母送氣个 khan₃₁。即種真普遍，最近閣有ngóo-jîn个講「我咧khan₃₁…【不清楚】」。k 變 kh 个音變本身檢采是一種人類語言普遍的[tik]个「弱化」，毋閣咱佇遮是毋是愛解說做：「語用上个弱化，透過普遍的[tik]个塞音送氣个弱化形式來達成效果」，我想是毋免。就台語个音韻系統來講， khan31 是 kan31 上蓋倚音个音節，單純个講：透過刁工講予小可走音，改講上接近个音，閃一下，來達到語用上口氣減弱个效果。按呢就可以。

閣來另外一種形式，罕得聽儂講，毋閣蓋有意思，是將一字 kan₃₁ 講做一字 kat₂₀。會曉呼八音，著知影 kan₃₁佮 kat₂₀是共一系列个（傳統十五音韻書，歸做共「字母」），韻尾个發音部位共款，增差一个是舒聲，一个是入聲。非入聲、長音、高降調，聽著蓋強个kan₃₁，變做入聲、促音、中短調，聽著蓋細聲，無啥氣力个kat20。語音上弱化，用來做語用上个弱化，實在有夠bā-tah！細漢个時，加我兩歲个叔伯兄，若塊無歡喜啥代，閣毋敢tshiàng聲个時，著會頭犁犁，行對邊=仔去，哪行哪講 kat₂₀。細ka漢仔个我，佇迄種語境，自然著知影，伊是卜tshoh閣毋敢tshoh。

閩南語羅馬字，tsîng到tann，非入聲佮入聲个韻母寫法各樣[koh-iūnn]，像 am/ap, an/at, ang/ak。所代表个意義就是「非入聲佮入聲」即種屬佇「調」个無共，連帶有規則性个影響著「韻」个部份嘛無共。這其實就是語言學上个一種 redundancy，若準咱無寫 an1/an2/an3/at4...，是卡簡單寫做 an1/an2/an3/an4... 來表示 ，然後立一條音韻規律講，「第四聲佮第八聲）个鼻塞音(nasal m/n/ng) 韻尾愛變做共部位个無聲塞音(unreleased stop p/t/k)」。按呢毋但有夠額予儂使用，亦完全符合運用音位學制定符號个原理。

這毋是空喙哺舌个理論探討，獻白講，兩百年前个漳泉十五音韻書，伊設立「字母」个精神，完全著是我頂一段所解說个按呢。即種傳統，現時个《彙音寶鑑》猶原採用，民間毋捌現代語言學个漢文先生，儂儂用甲真自在。《彙音寶鑑》个字母「君、堅、金、規、嘉…」，每一字攏同齊包含非入聲佮入聲韻。「君」代表 un/ut 系列，「堅」代表 iat/iat 系列，「金」代表 im/ip 系列……。

當然，傳統教羅个第一聲佮第四聲攏無標調號，伊若閣 -m/-p 無分，著簡省了過頭，無才調分矣。毋閣伊佮十五音个做法比起來，系統个整齊性著卡輸分數[hun-siàu]，用來解說 kan₃₁變 kat₂₀个現象亦卡無像十五音系統hiah夠力。

若是已成歷史个TLPA，毋但分 -m/-p，第一聲、第四聲閣攏愛注1、4，彼就傷囉嗦，有教羅基礎个學生攏會問講，1、4咁會使得勿寫？總是，伊亦有好處，著是卡容易將一份文本內底屬佇台語音標个部份佮非台語个外文分開抾歸堆。