台語三字並列結構詞「孤貧夭」

古早，若想欲跟[kin]符仔仙、鳳陽婆[Hông-iông-pô]、番婆鬼[huan-pô-kuí]即款儂學法術，師傅[sai-hū]會叫汝咒重誓[tsiù-tāng-tsuā]，意思是講為著欲愛得著「超能力」，願意犧牲一項物件做代價。咱人生有三項大不幸：孤獨、散赤、早死，汝著愛承受其中一項，師傅才肯教汝。

這叫做「孤貧夭，著領一字」[koo-pîn-iáu，tio̍h niá tsi̍t-jī]。

毋是發一个喙口願[tshuì-kháu-guān]就準煞，愛閣做一寡親像儀式个動作，可比講叫汝添一碗白飯，規碗摒[piànn]落去屎礐仔底。按呢無惜五穀，的確會遭受天譴[thian-khiàn]（儂講會予雷公摃死），用即種行為來證明汝甘願夭壽嘛欲求法个決心。

即種風俗，背後有足深个意義，通予咱探討。

註：鳳陽婆，敢[kánn]是對唐山[Tn̂g-suann]安徽[An-hui]鳳陽來个witch。番婆鬼，是埔里一帶，咧稱呼原住民个witch。傳統戲劇，卡捷提起鳳陽婆，怹會曉可怕个鳳陽法。