台語比台灣華語卡精密，表現佇幾落个面向，從中，「文白koh音」是一項要點。平平迄字，用佇卡抽象、正式、心理、文雅的語詞著講文言音，用佇卡具體、非正式、肉體、土直个所在著講白話音。
例有真濟，讀者請家治致意。我佇遮干那舉兩个例。我做囡仔个時，完全毋捌台語个原理，毋知台語有文音、話音个差別，但是佇應用上，我个前意識[tsiân-ì-sik]其實知影伊个存在。
我筋骨無通好，定定去藥房買膏藥仔轉來貼，迄種物，即馬通稱[thong-tshing]號做藥布[io̍h-pòo]。阮細漢个時，有一種牌子，名寫做「百安膏」，晉前是視大儂去買的，我用了袂bái，家治閣去買。我行入藥房，開喙共頭家講：「欲[beh]買百安膏[pik-an-ko]」。
迄个年代、阮佇庄跤，生活中的物件一切攏是講台語，除非是對電視、抑是學校學來个，親像棒球[pāng-kiû]个術語，才有講華語。是講我ná會遐厲害，知影通揀用文言音來唸即項藥品名？
總是，我第一遍是按呢講，毋閣我行出藥房煞愈想愈想袂曉：即字「百」--字，明明是一百、兩百[tsi̍t-pah, nn̄g-pah]个pah，按呢著是唸做pah啊，是按怎我會唸做pik？
自按呢，顛倒失去自信，giâu-gî唸做pik毋著。後回閣去買，我著改講號做「百安膏[pah-an-ko]」，逐擺迄个oo-jí-sáng頭家煞攏嘛照我个呼音重講一遍，予我即个囡仔無通好跟綴[kin-tuè]學習。
閣來，舉第二个例。「千萬」即个詞，若是抽象意，表示「無論按怎」，愛講tshian-bān，親像「汝千萬[tshian-bān]毋通去」；若是具體意，表示大數目，愛講tshing-bān，比在「跋輸繳欠儂歸千萬[tshing-bān]」。
Tshian-bān, tshing-bān兩種呼音个分別，我自捌代誌，著會曉--得。毋閣，若重疊[tîng-tha̍h」變做四字「千千萬萬」，我著亂去矣，共伊混成[hūn-tsiânn]做一種音"tshian-tshian bān-bān]，親像我卡早會講「千千萬萬[tshian-tshian# bān-bān#]个中國儂」。
即一兩年我才致覺[tì-kak]著即點，認為「千千萬萬」共款愛照兩字「千萬」的差異落去分。所以是講「汝千千萬萬[tshian tshian bān bān]毋通去」，但是愛講「千千萬萬[tshing tshing bān bān]个台灣儂攏毋肯予中共統治」。
即點我無去揣老先覺請教，總是，我有自信愛按呢分。頭拄仔才佇舊約聖經民數記10: 36讀著 "Iâ-hô-hoa ah, kiû Lí tò-lâi kàu Í-sek-lia̍t chheng-chheng bān-bān lâng ê tiong-kan"。按呢總算得著印證矣。
但是，我猶原有一項無自信，想欲請教各位。"tshian tshian bān bān"佮"tshing tshing bān ban̄"即兩个詞个第二字「千」到底著講本調抑是變調卡妥當？若我íng過，頭一个會講本調，tshian-tshian#bān-bān#；後壁个會講變調，tshing-tshing-bān-bān#。
毋閣我現時共伊三思[sàm-su]，犯勢第一个四字詞个第二字tshian愛講變調，第二个四字詞个第二字tshing，愛講本調。
因為第一个「千千萬萬」是對兩字个「千萬[tshian-bān]」重覆變出來个，凡若即種構詞法，中央字攏愛變調，親像「辛苦、峘kē、大細」變做「辛辛苦苦、峘峘kē-kē、大大細細」。總是，伊是卡文言个詞，伊可能會拆卡幼來講，卡濟本調，閣有加強口氣个效果。我會記得細漢是聽儂講 tshian-tshian#bān-bān#，按呢亦是合理。
抑第二个「千千萬萬」个構詞法卻毋是按呢，伊毋是對「一千萬、兩千萬」迄種數量的單位「千萬」變來个，伊只是幾若千、幾若萬，算袂lī，按呢个意思，所以愛分開講，「千千[tshing-tshing]」一个變調組，「萬萬」另外一个變調組。
台語音个精微複雜，毋是淺儂所想个遐爾簡單。迄寡認為教會羅馬字系統个聲調記法著有夠用个儂，毋但是共台語想了傷淺，嘛露現[lōo-hiān]出本身个無知。
親像我雖然會凍對白話字聖經得著印證，知影「千千萬萬」表示數量真濟，確實是唸做tshing个音，但是我袂凍對遐看出"tshing-tshing bān-bān"个第二字到底是唸本調，抑是變調。因為教羅無用連字號，並無表示伊著是讀本調。連字號佮本變調無必然个關係。
《台日大辭典》佮《新訂日台大辭典》佇即方面有卡進步--點仔。毋閣真無彩，我佇台日典揣無「千千萬萬」四字詞。但是我想著一个講法，檢彩通做旁證，勸世歌[khuàn-sè-kua]有唸講「天下个儂káng千萬，領憑出世在世間」[Thian-hā ê lâng káng tshing-bān, niá-pîn tshut-sì tsāi sè-kan.]
"Káng千萬"是歸千萬个意思，káng佮tshing攏變調，這無問題（"káng"个漢字佇遮免討論）。但是我塊想，應該嘛有"káng千káng萬"个講法，趕緊查台日典，正實攏有。
伊毋但攏有收，而且伊真清楚標出聲調个變化，"káng千káng萬"个「千」是本調。拄好佮我對"tshing-tshing# bān-bān#"个分拆[hun-thiah]會鬥搭。
總是，理性還[huân]理性，台語个變調，討論甲入骨，彼真僫講。現時佇即方面有夠格个台語發音人，嘛愈來愈僫揣見[tshuē-kìnn]矣。
Comments powered by Disqus.