台語兩音節名詞：比較 V+N 佮 N+V 兩種複合結構

以下針對兩音節名詞來考慮，舉一寡例，是無完全个草稿，因為情形蓋複雜。三音節以上个情形閣無仝，佇遮攏無講。

先講「單音節動詞(V) + 單音節名詞(N)」複合所成个兩音節名詞。

例句1：來去烘肉。
例句2：來食烘肉。

例句 1 个「烘肉」是動詞(V) + 名詞(N) 所形成个動詞詞組，本質上猶原是動作詞，毋是兩音節名詞。

例句 2 个「烘肉」，是指「烘過个肉」，按呢才是複合名詞，「肉」是「烘」即个動作个接受者。類似即種語法佮語意結構个，像：

1. 煙腸 ian-tshiâng/tshiân：煙過个腸。（現代做法無一定有煙過，但是語源是按呢）
2. 滷卵 lóo-nn̄g/nuī：滷過个卵。
3. 封肉、封雞、封鴨：封過个肉、雞、鴨，「封」是一種料理動作。

若像「搵料 ùn-liāu、糋料 tsìnn-liāu」，雖然也是 V+N 結構个名詞，但是語意上，「搵料」毋是「搵過个料」，是「用來搵个配料」。「糋料」嘛仝款。所以佇仝一種語法結構內底，有種種語意結構無仝个變化。

其他个例：

1. 烘爐 hang-lôo：用來烘煮物件个爐仔，毋是「烘過个爐」。這語法結構佮「烘肉」仝款，但是語意結構無仝。
2. 摃槌 kòng-thuî：用來摃別物个槌。
3. 抺刀 buah-to：用來抹壁个刀。
4. 迫猴 pik-kâu（也寫做「逼猴」，「迫、逼」台語仝音）：用來迫 be-a-lìn-guh（軸承）出來个家私頭仔，形體像一隻猴，華語叫做〔拔輪器〕、〔軸承拔取器〕。
5. 吊猴 tiàu-kâu：用來吊重物起來个機械設備，造詞原理佮「迫猴」仝款，但是「迫猴」比「吊猴」閣較成一隻猴。 ^_^
6. 紮布 tsah-pòo：婦人儂來洗个時，用來紮佇褲底个布，就是古早咧用个月經布。

閣來講「單音節名詞 + 單音節動詞」複合所成个名詞，這有真濟會使解說做「用來動詞+名詞个家私、物件、場所等等」，其中个單音節名詞通常是迄个單音節動詞个動作接受者。舉例：

1. 鼎摖 tiánn-tshè：摖鼎个家私頭仔。
2. 桌崁 toh-khàm、桌罩 toh-tà/tàu：崁桌仔个家私。
3. 火夾 hué-ngeh：夾火（指𤏸火个物件）个家私頭仔。
4. 火引 hué-ín：引火个物件，通常是紙。
5. 紙硩 tsuá-teh：硩紙个家私頭仔。華語「紙鎮」。但是「紙撚 tsuá-lián」毋是「撚紙」个家私頭仔，是將紙撚做一條長長，thang做「火引」，所以是一種「撚過个紙」。
6. 米絞 bí-ká：絞米、用機械挨[e]米个工場。
7. 油封 iû-hong：封油，予油袂漏出來个零件。（這較捷講 oo-í-sì-luh，語源是 oil seal。）
8. 水閘 tsuí-tsa̍h：閘水个設備。
9. 路閘 lōo-tsa̍h：閘路个設備。
10. 車擋 tshia-tòng：擋車个部件、煞車器。