台語吸收日語做外來語个兩條線路

外來語个問題，我不止致重[tì-tiōng]。即馬單摘[tuann-tiah]台語吸收日語做外來語其中兩條主線，佇遮小記一下。一條是照和製漢字，就彼[he]漢字讀台語音；閣一條是毋管漢字，直接照日語音講，毋閣，咱儂會bô-ti-bô-tang用台語个音韻系統閣共伊tshiânn--過，這著是我tshiâng-tsāi塊講个，「外來語」koh-iūnn佇「外語」个所在。

第一條線路，íng-íng卡早行，一來是迄時逐家漢字iá真láu，二來是日語教育iá無tháu。直來直tshua̍h，tsiah行對第二條線路去，迄陣逐家漢字愈敗，外語愈厲害。

舉例一：日語詞「麵包」日語音パン，台灣儂先照漢字讀mī-pau。親像川合真永[Tshuan-ha̍p Tsin-íng]1912年个《通信教授台灣語講義錄》，台灣總督府專賣局1922年出版个《專賣局台灣語典》，抑是1931年《台日大辭典》，攏干那有mī-pau，無pháng。到日本時代中後期，tsiah ta̍uh-ta̍uh-á攏改講號做pháng。到國民黨來，幾十年過，tsiah閣有下沿个照華語漢字讀台語音mī-pau。

這種斷做三層，làng一層煞變做共樣个台語現象有幾个儂捌？

舉例二：日語詞「瓦斯」日語音ガス。台灣儂先照漢字讀做uá-su，後來，"gá-suh"个講法 tsiah卡普遍。《台日大辭典》有收uá-su，無收gá-suh。目今講uá-su个，顛倒予聽著个儂掠大誤，當做是照華語詞唸台語音。

當然，即兩个例詞，日語嘛是對西洋吸收來个。

咱塊吸收華語，猶原是即種演化。先照漢字讀台語音，漸漸著攏歸个講華語矣。但是迄陣个日語音會凍順sī音譯做台語音，現時个華語音，逐家著用台灣華語塊講。

北仔佮北仔話佇台灣徛霸[khiā-pà]，太久咧啦。漢字、漢字音、漢字詞，攏總予伊ânn--去。借用宗教个講法，「一切个榮光[îng-kng]攏歸佇伊」。