頂日仔有寫一篇〈台語變調：四字詞「煙火安全」愛比照「交通安全#」前三字攏變調？〉，詳細討論台語四字詞个本調、變調現象，關係「單字主語+單字謂語；單字主語+單字謂語」个並列結構：
若是較生疏个，抑是來自書面語、文言詞，較慣勢四字分開唸本調，像 「心#甘#情#願」 「心#滿#意#足」 「心#堅#意#切」
但是若是熟語白話，就真有可能主語會連讀變調，舉例像： 「心狂(#)火𤏸#」sim_kông(#)hué_to̍h 「跤痠(#)手軟#」kha_sng(#)tshiú_nńg 「爸老(#)囝幼#」pē_lāu(#)kiánn_iù 「頭燒#耳熱#」thâu_sio#hīnn_jua̍h#
註：以上音標个標點，underscore 表示前字變調（無用連字號(hyphen)个原因是羅馬字傳統个 hyphen 是多字詞連結記號爾爾，毋是當做本、變調个指示記號），若是 # 號表示前字本調，# 號若用括號包起來，表示有時唸本調、有時唸變調，看節奏佮速度，會用得較自由選用。
今[tann]，進一步詳細說明「頭燒耳熱」（意思是破病發燒）複雜个變調現象：
一、照台日大辭典所標（伊佇每一个詞條个漢字中間有加「連調號」直短線來註明愛變調，若無連調號，就表示到遐唸本調），前三字「頭、燒、耳」攏是變調，干焦尾字「熱」本調，也就是『變+變+變+本』。
二、我拄仔揣出楊秀卿女士唸歌「煙花女配夫」錄音，「頭燒耳熱 若[nā]破病」即句，伊慢慢仔唱，有牽旋律，所以語調咱較無十足个把握，感覺「頭」伊唱本調，「耳」个旋律對中階降落去閣升起來，已經音樂化。
補充：許嘉勇老師有當面請教秀卿老師「頭燒耳熱」按怎講，錄影上網分享。（2023-10-24補記：網址 http://vlog.xuite.net/play/Mkx4RGtpLTIwODYxNjYwLmZsdg== 已經失效。）
錄影我聽起來是兩種為主，拄開始兩遍，是「頭燒#耳熱#」，中央有幾若遍是「頭#燒#耳熱#」，最後舉例是「頭燒#耳熱#」。「燒」字攏唸本調，佮台日大辭典所記，「燒」變調个講法有出入。
影片最後舉例：「著較注意啦，出門--honnh，萬一間，有hit-lō 不接一[put-tsiap-it]--个啊，頭燒耳熱，著敲一下仔電話通知咧」。「不接一」一般意思是指無連續、無法度保持一貫，佇遮个涵意是「袂凍常在保持健康个狀態」。
三、我閣揣著邱鳳英女士唸歌錄音，伊到「頭燒耳熱 若破病」用唸个，是「頭#燒#耳熱#」，「頭」本調，「耳」變調，也就是『本+本；變+本』。
按呢聽起來其實真自然。不過，若是予「仝款結構著愛仝款變調行為」即款先入為主个觀念束縛椆咧，就會認為『第一个主語「頭」本調，但是第二个主語「耳」煞變調，按呢前後無一致，錯誤』，迄種看法顛倒有問題。
「主+謂; 主+謂」並列結構第一个主詞唸較慢、本調，第二个主詞改用變調， 紲紲唸，這絕對毋是孤例，像我頂日仔迄篇有舉例，無米樂个崑濱伯講「國#泰#民安#」就是仝款現象。
小結論：台語四字套語，毋通想講是四字詞，前三字就一律愛變調，即種觀念傷膚淺。若是「主+謂; 主+謂」即種主謂並列結構个四字套語，四字有可能攏唸本調，進一步分析，即个四字詞，若是生語、文言詞、書面語，較傾向四字攏唸本調（「心#甘#情#願#」、「心#滿#意#足#」）；若是熟語，就毋但一種可能性：「本+本; 變+本」、「變+本; 變+本」，甚至「變+變; 變+本」。
Comments powered by Disqus.