袂少先進認為台語「外來語」佮「在來語」性質無仝－－大部份个在來語，每一音節攏會使單獨唸出本調、有意思通解說、而且往往攏有漢字通寫，了後才合成兩个至幾若个音節，成做一个多音節詞，而且愛按照尾字保持本調、賰个頭前字攏變調个大原則來調整聲調；但是外來語就是「規捾」个音節做伙講出來，來指稱一个儂、地、物件、抑是啥乜概念，袂使閣分析個別音節个獨立意義，所以並無所謂本調、變調个二分法，只有歸捾唸出來个時陣所表現出來个孤一个「實調」。
以下指出兩項觀察，來說明一个觀念－－台語外來語也是有本調、變調个表現形式。
一、台語吸收一个「外語」詞，按照台語个聲韻系統來調整呼音（包括聲、韻、調），就按呢「入門取正」[ji̍p-mn̂g tshú-tsiànn]來成做「外來語」以後，外來詞佮在來詞無分內外，混合使用來造詞、造句，「外來詞＋在來詞素」成做較濟音節个複合詞个時，外來詞个尾音節就愛變調。另外閣像外來語及物動詞若接名詞受詞，也是著按呢變，舉例：
1. gôo-bó（牛蒡）=> gôo-bó-thng（牛蒡湯）：bó 第二聲變第一聲。
2. ku-lí（苦力）=> ku-lí-thâu（苦力个工頭）：lí 第二聲變第一聲。
3. me-lí-á（合枋、合枋个材質）=> me-lí-á-pang（用合枋所製造个建材）：á 第二聲變第一聲。
4. loo-laih-bah（螺絲起子）=> loo-laih-bah-pènn（螺絲起子柄）：bah 第四聲變第二聲。
5. oo-se（賄賂）=> oo-se kuann-uân（賄賂官員）：se 第一聲變第七聲。
6. kòng-ku（摃龜）=> kòng-ku tsa̍p-bān-khoo（摃龜十萬箍）：ku 第一聲變第七聲。
即點有一个反例，就是血型：「A型、B型」敢哪較濟儂唸做 e#hîng#、bi#hîng#，較少儂唸做 e-hîng#、bi-hîng#。即號情形，有可能是受華語調型影響，也就是講先對華語聽著、學著〔A型、B型〕个講法，華語咧唸个時，A、B攏唸高平調，了後欲用台語來講个時，就固定即種高平調來唸。另外，講話者有意識著這是現拄現个「外語」字母，所以無閣進一步「外來語化」，也就是無共伊調整來融入咱語言本有个聲調系統。不而過，也確實有儂是講 e-hîng#、bi-hîng#，按呢就充份成做講話者个外來語辭彙。
二、台語漳泉腔口，咧唸仝一个外來詞个時，實調並無一模一樣，也是照漳泉無仝个變調規則去套用，顯示出講話者个潛意識[tsiâm-ì-sik]內，猶原是有本調（嚴格講是「調類」）个概念佇咧做外來詞呼音个「基底結構」(underlying structure)。像：
1. oo-tóo-bái（機車）：漳腔講 oo33-too55-bai51、鹿港泉腔講 oo33-too35-bai55。這上好个解說就是，兩種腔口个儂，潛意識中將第一音節當做本調第一聲、第二音節當做本調第二聲，第三音節當做本調第二聲，了後閣照家己漳泉个變調規則去轉換出實調，第一、第二音節唸變調，第三音節唸本調。
2. oo-bá-sáng（親切稱呼非親儂个中年婦女、阿姆、阿姨）：漳腔講 oo33-ba55-sang51、鹿港泉腔講 oo11-ba35-sang55。漳腔个規則，本調第一聲、本調第五聲，兩種若變調了後就變仝款調，但是泉腔第五聲變低調，所以即个詞對怹來講，是潛意識認定做第一音節屬佇陽平調類（第五聲），第二音節本調第二聲，第三音節本調第二聲。按呢若寫做 ôo-bá-sáng 就會使完美兼顧兩種腔，但是單就漳腔變調儂个立場來看，第一音節簡單當做本調第一聲，免閣標閏號，按呢精神負擔較細，感覺較輕鬆。
（感謝許嘉勇老師提供鹿港腔語料）
以上兩點，第一點是外來語个尾字對本調到變調个變化，第二點是兩種腔口外來語實調个表面呈現（surface representation)，顯示出背後有本調意識咧主宰。兩點攏顯明出：台語外來語 猶原有本調、變調个運作過程。
但是我並無因為按呢，就即時跳到一个結論講：台語外來語，嘛應該比照在來語來記本調就好。
傳統教羅是攏標本調無錯，但是我發現一个問題就是：準做是已經讀全羅文獻幾年久个台文界朋友，怹拄著聖經多音節个外來語 人所名[jîn-sóo-miâ]（專有名詞），嘛是唸甲 li-li lak-lak，無才調真輕鬆照變調規則來唸，因為外來語个個別音節對咱來講，並無詞素意義，無論唸做啥乜調，攏產生袂出意義个差別。因為欠缺意義單位个引𤆬，致使怹無法度像機器儂按呢快速、精確來處理符號：目睭看本調調號，頭腦即時轉做變調，喙裡閣隨時唸出實調。
除非怹是教友，自細漢就時常聽見牧師講起遮个人所名，按呢怹家己來讀白話字聖經，就有法度窸倏[sī-suā]轉換。 若干焦徛佇單一腔口个立場來看，外來語，尤其是三音節以上个人所名，若標記「實調」，扑算是予學習者較快唸了有把握、有信心个做法。 若是「實調」个標記法，也有濟濟做法通選擇、抑是創設，這才閣來參詳。
Comments powered by Disqus.