台語外來語有偌濟？

1931年【臺日大辭典】是有史以來上豐富，有調查根據个台語辭典，收詞九萬外（仝字但是無仝腔口个詞條分開算），從中註明是日語來个外來語大約 2500 條，另外也有較少數，別種語源（包括原民語、西洋語、東南亞語）个外來語。

2005年 張光裕先生【臺語音外來語辭典】收詞大約兩萬八千。可惜體例無純，所收个詞，有个是編者真正聽過个，有个只是伊個人認為台語會使按呢來講，但是伊並無註明做分別。

另外一點咱著注意，除了特例佮轉用詞以外，伊無收專有名詞个外來語，按呢就減算足濟，像台語聖經內底个人所名（儂名、所在名）濟甲哪sánn，攏是唸台語音个外來語。

按呢咱咁通講，台語外來語有三成左右？

遮个外來語，有足濟是實業界个專門術語，所以咱一般儂个生活台語無可能有三成遐爾懸个外來語使用率。但是咱若聽烏手師傅个談話，外來語使用率就比生活對話加足懸。

也就是講，欲統計外來語个量，一定愛將使用場合佮出現頻率考慮在內，才看較會著語用个真相。

先父是日本時代公學校高等科畢業个，後來開機械五金行，有即雙重因素，所致阮細漢所講个台語，有用著袂少日語外來語。但是我大漢，就愈來愈罕得用，親像 su-li2-pah 改講淺拖，su-pu2-lin3-guh 干焦講薄內衫。

舊日語外來語，佇台語一直流失；台語本身，也佇台灣一直流失。