台語「失禮」用途比閩南語較闊

台語本底就有「失禮」即个詞，但是予日語影響著，應用个都合變愈闊。

舉例像一个儂欲離開某一个場合个時，共猶留佇現場个儂講「我先失禮」、「失禮，我先來去」。

先父（1928年出世）在生个時，有一擺，我佮伊做伙佇路裡咧行， 伊看著一个半面相熟[puànn-bīn-siong-si̍k]个儂，就停落來佮伊相借問--幾句仔， 了後就講兩字「失禮」，配合覘頭敧身[tàm-thâu khi-sin]來行禮，結束談話， 即个情景予我印象足深。

用「失禮」來表達相辭、欲離開个意思，這我相信就是來自日語个表現法。

阮漢文老師莊世光[Tsng Sì-kong]先生，戰後對漳州來台灣，就感覺台灣儂特別有禮貌， 定定講「失禮」。伊講閩南嘛有講「失禮」，但是無像台灣儂遐捷講。

1873年廈英大辭典就有收 sit-lé 即个詞，分別出現佇 lé 佮 sit 个例詞：

(p.298)
sit-lé, to make a mistake in regard to politeness; to fail in politeness; I beg your pardon for my rudeness.

(p.443)
sit-lé, to be unpolite; I beg your pardon for my want of politeness.

「失禮」古漢語就有，明刊本个南管戲文《郭華買胭脂》內底个口白也有用著， 總是，毋是用佇主動 say goodbye 个路用。主動 say goodbye 个時，通用漢語有講 「失陪」，這台日典、教典攏有收，但是我个台語經驗顚倒較少聽著。

日語引進漢語詞个過程中，發展出真濟家己个引申義佮應用語境，台語閣吸收一部份來。 即種語用个研究，若干焦關心台語本字个研究者，怹較袂去致意。怹直接就畫等號起去， 橫直漢字仝款，有「字」怹就滿足矣。

心肝干焦要意咧揣本字，就較無精神去 tsim-tsiok 分辨古漢文、華語、台語「仝字詞彙」 佇語意上、語用上微妙个差異，就較掌握袂著台語儂个語言心靈。像阮為著推廣个目的， 慣勢寫漢字台文个儂，也真容易失覺察來跋落陷坑。

補充：酒井亨（さかい　とる）先生有來面冊留言賜教，寫出頂面第二段兩句台語个日語對譯：

我先失禮
(わたしは)お先に失礼します

失禮，我先來去
失礼ながら、わたしは先に帰ります