台語第二聲个常用字眼，有幾字仔佇部份地區、部份儂个喙裡，會對正常个「高降調」變音唸做特殊个「中降調」，超出台語七聲調本調个範圍，但是猶原無超出台語優勢腔「懸、中、低 三階調位 」个可能性，是一種對中調位降到低調位个中降調。
現時教羅、台羅个符號設計，無法度表現即種音，有儂是用 -h 第四聲來記，其實無仝，實際唸出來是會比 -h 拖較長、降較低。例：
一、按怎[án-tsuánn] 个 tsuánn，有記做 tsuannh，其實無仝。
二、會使/袂使 [ē-sái / bē-sái] 个 sái，有記做 saih，其實無仝。
三、會曉/袂曉 [ē-hiáu/bē-hiáu] 个 hiáu，有記做 hiauh，其實無仝。
四、「汝講啥？」「這啥？」个 siánn，也定定聽會著變音唸做中降調。有儂記做 siannh，其實無仝。
五、按呢就好[án-ne tō hó] 个 hó，變做中降調，即種講法阮屏東萬丹真普遍。
閣一種中降調是出現佇合音，親像「汝無愛去是--毋[sī--m̄]？」尾後迄个「是--毋」合音起來就會變做 sim中降調。
講著中降調，另外一方面，台語 -h4 愈來愈濟中少年儂喉入聲韻尾控制袂好勢，會拖長變中降調。若 -h8 佇南部有變高降調个趨勢，佮第二聲高降調本調混同（但是變調猶原有分）
-h8 佇中北部有變中平調个趨勢，佮第七聲本調仝款，甚至連變調嘛攏變低平調，-h8 佮第七聲就按呢完全混同。
入聲韻，佇台語白話音層保存了無好。對古音个 -p/-t/-k 弱化變 -h，後來閣進一步，連最後迄點仔束喉个 -h 嘛無去，完全聽袂出入聲个效果矣。
Comments powered by Disqus.