台語正音个理念

台語正音个理念：

一、正音是相對觀念，自古以來，某一字一旦誤讀个儂佔絕大多數，迄个音最後有可能會予官方承認做標準音。

二、若是戰前，甚至規百年前就出現，通行到今个台語誤讀，咱無立場激古博[kik kóo-phok]，欲去指正儂。像「技 」正音 kī 本調第七聲，但是逐家本調攏唸第一聲（「特技 ti̍k-ki」），變調才變第七聲（「技術 ki-su̍t」），連黃海岱大師嘛按呢講。這若硬欲叫儂改，只是製造社會動亂。

三、若是戰後予北京華語帶衰著，台語退化个台灣儂个誤讀，咱通徛佇挽救台語个立場來提倡正音，像「網路 bāng-lōo」前字愛變第三聲、「捷運 tsia̍t-ūn」毋通唸做「節運 tsiat-ūn」。

四、以上是大原則，詳細愛隨字個案討論。

舉例補充：

真濟中少年儂，予華語影響，將「科技」唸做「科記 kho-kì」、「技術」唸做「記術 kì-su̍t」。若欲指正怹，我袂趁機會、展學問，叫怹愛講「kho-kī、kī-su̍t」，干焦會叫怹愛學多數个台灣老儂，唸「科技 kho-ki」、「技術 ki-su̍t」，予怹會得通佮老大儂合和[ha̍p-hô]來溝通。

但是若欲教儂讀古文唐詩，拄著「技」字，我猶原會堅持愛唸 kī 本調是第七聲，因為按呢才有合平仄[piânn-tseh]个要求。

我若做台語評審，會用卡包容態度來容允參賽者以下兩種唸法：
一、kho-ki、ki-su̍t。
二、kho-kī、kī-su̍t。

但是袂使參差[tsham-tshi]，前詞唸 kho-kī、後詞唸 ki-su̍t，按呢無論本調、變調攏是中平調，造成系統錯亂，袂用得。若是鹿港腔个講話儂、參賽者，第一聲本調、變調 調值無分个儂，彼當然咱著愛聽伊規段个發音來判斷是毋是有錯亂个情形。這佮我佇遮所講个原則，完全無衝突，毋是gâi-pán看表面形式來決定，的確著觀察伊整體个聲調呼音系統。