台語第八聲本調个腔口真濟款，而且一直咧變化

台語第八聲調本調个腔口真濟款，而且一直咧變化。例字：習[si̍p]、滑[ku̍t]、熟[si̍k]、食[tsia̍h]、屐[kia̍h]、杓[sia̍h]。以下簡單討論：

一、南部腔第八聲本來是懸、短、微降調：

說明：若是 -p/-t/-k 收尾个第八聲，因為有喙口个發音部位，包括雙唇(-p)、舌尖(-t)、舌背(-k) 來收束音節，較好保持短促个效果，所以「降」个程度袂拖長、降到傷低去，但是 -h 第八聲是靠聲帶个收束去切斷音節，較僫保持短促个效果，容易拖長、降到較低，致使南部腔 -h8本調 有真濟儂已經佮第二聲高降調分袂清楚，親像「小食 sió-tsia̍h」佮「小姐 sió-tsiá」仝音，「去踅 khì se̍h」佮「去洗 khì sé」仝音。

二、台灣偏漳腔第八聲，本來第八聲是「中平調」，比第四聲「中短、微降調」較長、較平，但是比非入聲个調猶原較短。咱講笑，共伊叫做是「半忠奸」个聲調，毋成[tsiânn]長、毋成短，所以袂穩定。

發展个結果，像台中腔 -p/-t/-k第八聲本調已經佮第四聲合流，攏是中短調，像「溼 sip、習 si̍p」本調仝音、「骨 kut、滑 ku̍t」本調仝音、「色 sik、熟 si̍k」本調仝音；但是 -h第八聲 就變做真正个中平調，束喉音差不多攏消失矣，袂使閣算是入聲，佮第七聲完全分袂出，像「杓 sia̍h、謝 siā」仝音、「屐 kia̍h、崎 kiā」仝音、「額 hia̍h、瓦 hiā」仝音、「篾 bi̍h、味 bī」仝音。

三、偏泉腔第八聲，較古早个調大概是中升調（像鹿港）。有个所在變做高短調；有个所在變做中平調，仝漳腔有合流个趨勢。

頂面所講个台中腔第八聲个演變，其實佇當今个台灣社會勢力真大，大概是因為唸起來上輕鬆，別所在个少年儂漸漸攏學著即種腔。但是這是較後起个變化，若學著即種腔了後，欲寫標準化个教羅、台羅就有困擾，愛硬背 -h第八聲佮第七聲，-p/-t/-k 第八聲佮第四聲 著愛靠變調去分、去背。不而過，母語教育系統个主流做法是用「高短調」做第八聲个標準音，總--是，咱猶原愛尊重各地个腔口，毋通認為學生个父老序大怹「中長調」、「中短調」个講法毋著，咱著鼓舞學生囡仔，照怹个爸母腔來講無要緊。