本文
今仔日去演講，已經袂赴時矣，路裡閣予警察閘落來開紅單仔，延[tshiân]愈久。對主辦單位佮聽眾真不住。
滿腹對台語聲調个想法，一晡欲共盡拚，實在無可能。後擺著束小範圍，才袂遐食力。
佮先進个互動，予我加[ke]較了解兩層代誌：
一、早年聽過台南个台語教授咧稱呼「○○○先生」个時，名字个尾字有變調，這佮我慣勢聽著，名字尾字本調个講法無仝，我無把握這是伊個人个特色，抑是台南腔在內。今仔日問在場列位，只有兩位是即種變調，其中一位講伊就是台南儂（另外一位無表示）。
無仝个口音咱著尊重，總--是，若毋是台南儂--者，建議毋通學即種「姓名+先生/小姐」名个尾字變調个講法。可比別儂介紹「林正豐先生」予咱熟似，一旦 hong 變調，就佮唸 hông 个字變調了後無分。hong 陰平第一聲佇甘字典有收 76 字（像「丰、豐、風、楓、方、坊、芳……」），hông 陽平第五聲有收 109 字（宏、弘、竑、閎、鴻、洪、防、皇、煌、隍、磺……），變調了後，兩類無分，仝音字就變欲倚 200 字，分辨功能大大降低。咱聽過儂按呢紹介過了後，若無當場追問講：「請問汝个大名是『正hong』抑是『正hông 』」，轉去欲單獨提起伊个姓名，無附加稱謂，也變做無可能，因為毋知本調是欲唸 hong 抑是 hông。
二、有寡台語界个先進認為台語普通腔呼八音只呼出七个聲調，佇第六聲个位置提第二聲來塌縫[thap-phāng]，仝款唸高降調，按呢煞落勾海口腔第二聲變調了後个中升調，怹認為即个中升調就是第六聲。
但是教育部台羅（佮早前个 TLPA 拼音系統）攏將中升調叫做第九聲，按呢就造成不解甚至大不滿，認為教育部烏白舞。
論真，兩爿攏有問題。照講，配合調類「陰平[im-piânn]、陰上[im-sióng]、陰去、陰入、陽平[iông-piânn]、陽上[iông-sióng]、陽去、陽入」个調序編號第 1、2、3、4、5、6、7、8 聲, 每一種攏是較抽象个分類概念，每一調類攏應該有單字个時著按怎唸（本調），連讀个時按怎唸（變調）个具體表現，準做單字本調拄仔好佮連讀變調攏唸仝款，像鹿港腔陰平，無論本調、變調攏是中平調，總--是，伊猶原有單字佮連讀个具體表現。
但是頂面个主張，煞講只有變調了後个中升調，才是第六聲，按呢即个第六聲咁講是特別為著變調來設个？第六聲無存在單字調，這嘛咧奇！論真，這毋是正確个調類號名个概念，漢語聲韻學家毋是按呢咧建立調類个分析系統。
但是教育部台羅嘛是按呢創啊，伊煞接紲八調類（八聲）个名稱後壁，閣加成立一个第九聲个名出來。伊即个第九調，有影佮泉州腔第二聲變調了後个中升調仝款調值（有儂號名做高升調），但是教育部所講个第九聲，卻毋是欲用來描寫泉州腔个第二聲變調，是欲用來標明親像「下昏 e-hng」合音再變調 i̋ng，形容詞三疊音變調「新新新 si̋n-sin-sin」第一音節个加強語氣再變調，閣有像外來語 kha̋-bóng（碳纖維 carbon）、khiű-niú（Q鈕）即種特殊中升調。這佮八調類个分類本質根本無仝！
豬母佮牛犅縛做伙，莫怪袂幸福。也莫怪有寡先進會不平，怹感覺泉腔也有中升調个變調，而且泉腔聽講本來就有第六聲，應該就是即个中升調，按呢是按怎欲閣另外設一个第九聲出來描寫中升調？
不而過，事實所謂泉腔有第六聲，毋是指第二聲个字變調了後个調值，是中古音歸類做全濁聲母、上聲个字，部份海口老泉腔有獨立存在（像鹿港、福興、麥寮、台西、東石个老儂），無像漳腔合併入陽去聲，發生「『全濁上』歸『陽去』」个韻類合併現象。
即種正範个第六聲，教育部台羅其實有設計調號 ˇ 予鹿港腔來用，像「動 tǒng、蕩 tǒng」才是第六聲陽上，單字調是 33，連讀調是 22；比較第七聲陽去个字例「洞 tōng、宕 tōng、慟 tōng」單字調是 31，連讀調是 22。即兩類佇普通腔合併做一種陽去第七聲，單字調 33，連讀調 22。
若干焦看調值，普通腔个儂會感覺鹿港腔陽上聲無稀罕，因為佮普通腔个陽去本、變調攏仝款，顛倒鹿港腔个陽去聲較龜怪，本調是中降調。總--是，抽象分類个「調類」佮「調值」無仝，袂使得因為鹿港腔陽上聲字个本、變調佮普通腔陽去聲本變調个表面調值仝款，煞將鹿港腔陽上聲个字算做是陽去聲个調類。
面冊網誌留言
Khóo Sè-lâm
感謝潘老師，時間傷短，無機會聽完全…
蕭藤村
十外年前，我佇社區大學講解聲調的時，我捌提出基本聲調(本調、變調)佮應用聲調(合音調、疊字調、隨前輕聲、固定輕聲)的觀念 ，繼續觀察中……。
其實合音調有升調，亦有降調。「啥人」的合音，偏泉腔講升調，偏漳腔講降調。
潘科元
「啥人」阮有講降升調 siang312（三階制）
蕭藤村
講較慢是降升調，講較緊是升調。第九調規定中升調無理。
葉程允
變調習慣無仝 真正會予對方聽無
比如 物配
阮林仔邊是共物讀變調
不過我來佇岡山 發現岡山人是共物讀本調
因此 當我共阮同事講 mih8-phue3
伊人煞反應袂過來我卜表達啥
葉程允
著囉 先生
毋知mih8#phue3(抑是mih8--phue3)佇臺灣兮分布範圍是焉怎
Ahim Tân
照我个印象，鹿港腔个陽去，本調中(偏低)音，基本上無真明顯、自動个降調。溪湖著較平均个中音調
潘科元
葉程允，「物配」腔口个分配情形，我無清楚，嘉義也有講 mih8#phue3
Ahim Tân
但是chit-má鹿港人ê”古早腔” tāu-tāu-á teh消失ah。
Ili Bok
「物配」….阮台南(我聽到/問到的)多數講：mih8#phue3….
今年國小組朗讀一篇文章內面有此个詞,陪讀的家長嘛講in 嘛是講：mih8#phue3
總是 ,阮煩惱”人” 毋知 知無?!?!?…
所以, 無教學生講阮家已慣勢腔口…
馮勝雄
我是台南的下營人，我就講mih8#phue3，這款講法應該是較倚「主謂結構」的規則
馮勝雄
毋過我原台南府城的朋友是變調做〞mí phuè
張淑柑
若閣會當加聽一擺 就會愈詳細囉
Shu-ren Wu
這間”廟”倚馬”路”，廟無”大”，佗來一群人佇門口看廟公寫”字”，咱人問神嘛著愛找醫生看”病”，病才好會”離”。廟、大、字、病、離，攏是21 (無到31 huah明顯 ê 降調)
路尾才知，這就是阮佮人無仝ê所在
Comments powered by Disqus.