台語著是台語，毋是閩南語

國民黨佮共產黨是共國个，意識型態佮統治心態嘛共款。怹一直硬拗，欲將咱个台語叫做閩南語，閣舉出真濟共同點來「證明」。

咱講个台語，佮福建講个話，差濟差少，佇政治上、認同上，攏無重要啦，咱欲按怎稱呼咱家治个話，是咱个自由佮人權，毋免伊中共抑是國民黨外儂來主意，伊一直無欲認同咱，煞倒頭栽，叫咱著認同伊，按呢咱著袂giàn予伊統治啦，其他攏免講。

咱若了工損神[liáu-kang sńg-sîn]去揣台語个特點，來佮怹相諍，顛倒是落入怹个圈套。比一个例，施明德一直咧憢疑蔡英文个性傾向，蔡英文若出來表白[piáu-pi̍k]講伊是「正常儂」，著是予施明德牽咧戇戇踅[se̍h]。咱根本毋免予國民黨、共產黨咧裝痟个，佮伊舞即齣。

當然，若是學術个探討，彼著愛講究、用心，詳細去稽考[khe-khó]閩語、台語个來源、演變、分化，予咱閣卡了解台語个內涵。即種語言學、文化學个研究，毋容允予怹提來做統戰、殖民个工具。