台語詞衰亡个款式

台語詞衰亡个款式，佇遮提說[thê-sueh]--幾種仔。一種類型，眾儂知，就是佇一堆類義詞內底，佮華語公家个，會凍留落來，佮華語各樣个，台語特有个，就直透滅無去。親像「可惜、無彩、扑損」，講khó-sioh个，愈來愈儕，講bô-tshái、phah-sńg个，愈來愈少。閣有副詞「的確[tik-khak]、定著[tiānn-tio̍h]、一定」，卡早tsia̍p-tsia̍p講个是「的確」，目今定定[tiānn-tiānn]講个「一定[it-tīng]」。

閣一種是，表面上是漢語共通詞，但是迄个詞佇台語是多義詞，其中佮現代華語無共款个，攏會失落去。親像「計較」，有兩種意思，一種佮華語共款，是負面个。頂年仔有一齣台語連續劇「親成[tshin-tsiânn]勿計較」就是即種。不過，若是講「用心計較」，是用心良苦[iōng-sim liông-khóo]个意思。即種意思个計較，少年儂毋是毋知，就是用毋著去，掠叫「用心計較」是歹心毒行[hīng]。

「有緣」，有兩種意思，「有緣、無緣，逐个來做伙」、「有緣千里都會得相見[ū-iân tshian-lí to ē-tit sann-kìnn]」即種意思佮華語通用。但是「迄个查某真有緣」，是真有儂緣个意思。

微妙[bî-biāu]，當做文語，是漢語共通詞。毋閣台語个「微妙」另外有其他个解說：「姻兩个真微妙」，姻感情真好、真tah-bā；「某儂辦代志真微妙」，伊做事真周至。順紲講--一下，卡早个資料，「妙」--字攏唸無鼻音个biāu，現今大概攏講miāu，一--來是華語个影響；二--來，是台語開口韻，有个攏會puh出鼻音--來，像「他」是tha，變thann。

「詳細講予儂知」即種副詞个「詳細」，咱會曉用；若是「這我無詳細」，多數儂攏干那會曉講「這我無清楚」。

閣一種卡微妙，是句法上个kiu-sok。「無論天資好bái，一律常態分班」，副詞个「一律」咱知。「巧个學卡緊、戇个學卡慢，袂一律--得。」動詞个「一律」咱就袂曉矣。

舉陳輝龍先生1934年用日文所寫个「台灣語法」內底个一寡例句：（用字有調整）

1.「汝有共伊通知--無？」、「汝有通知伊--無？」
2.「有共伊點tuh--ah」、「有點tuh伊--ah」
3.「共眾百姓訓示[hùn-sī]」、「訓示眾百姓」
4.「iá-buē共in參詳」、「iá-buē參詳in」
5.「有共伊說謝」、「有說謝伊」

請注意第4、第5組个第二種講法「iá-buē參詳in」、「有說謝伊」。讀者大概攏佮我相仝，無按呢講。是按怎七十年前有講，即馬無矣？只要將以上五組个動詞翻做華語，自然了解：翻過去个華語若會凍接「受詞」个，「現代台語」就會凍，華語若袂凍接「受詞」个，目下个台灣儂所講个台語對應詞著變做共款袂凍接「受詞」矣。華語有【通知他、提點他、訓示百姓】，但是無【商量他、道謝他】，所以影響著台語儂个語感，將原底會使得用个「參詳伊、說謝伊」giah-sak去。