台語詞：㤉[gê]、㤉潲[gê-siâu]

㤉[gê] 是形容動詞，是「厭惡 iàm-ònn」个意思。 例：「即个儂反起反倒[huán-khí-huán-tó]，我真㤉。」（反起反倒：反覆無常，講話無算話）

「㤉」是正常用語，無禁忌，儂儂會用得講；加一个詞尾「潲 siâu」了後，基本意思仝款，但是囗氣加強，而且變做粗魯話，有家教个儂無講。

「㤉潲 gê-siâu」是講話者咧強烈表達家治看別儂足袂爽，毋是咧形容別儂。例：「即个儂無臭無潲，予儂㤉潲！」。（「無臭無潲 bô-tshàu-bô-siâu」才是咧形容對方真毋是款，這嘛是粗魯話）

長期予統治者迫害个台語，確實有變粗魯化，阮細漢煞毋知影 gê 會使得單獨用，干焦會曉 gê-siâu 即个詞，但是序大儂聽著，責罵阮，毋准阮講，所以即个 gê 就完全失落去矣。也就是按呢演變：

一、古早先有 gê 个講法。

二、後來有儂加 -siâu 來「加強口氣」予伊「粗喙化」。

三、囡仔佇外囗互相學習，逐家鬥粗魯个，攏講 gê-siâu，煞tsua̋n毋知影正常个單字 "gê"。統治者愈有理由講咱个話下流無水準。

四、重視家教个父母，不准囡仔講 gê-siâu

五、正常个單字 gê 先失落去，粗魯个 gê-siâu 後來也無--去。台語愈來愈萎縮。

(2012-09-25 facebook)