台語詞「脫線」个來源佮演變

即位是出名个台語老演員（1933出世），本名陳炳楠，藝名是「脫線」，逐家攏稱呼伊「脫線--个」。以下解說台語「脫線」个語源：

咱知影日本儂統治台灣，才建設台灣个縱貫鐵路系統。火車難免會發生「出軌 」个意外，這咱儂口語叫做「火車敗馬」、「火車跋馬」、抑是「火車跋落馬」，另外也有照日文漢字「脫線」（だっせん）來唸台語音 thuat-suànn。

即種「脫線」个正常用法，佇 1930 年代真普遍，但是到後來，另外生出一種比喻个新意思，就是形容儂散形散形、無照起工、無正經。像「伊个儂真脫線，做無好工課，袂交仗--得。」

外來个國民黨政府輕視台灣，自來台語演員無地位，著裝小丑仔，袂少台語演員个藝名是用歹意思个話來號，像「脫線」就是，閣像「康丁 Khong-ting」（本名張錫圭），其實根本毋是姓「康 Khng」，是「悾丁」，白癡查埔个意思。

張錫圭先生前年已經過身，伊一生看袂著台語出頭天个日子，咱即代咁有機會？

音註：

一、脫線 thuat-suànn。

二、縱貫，正音 tshiong-kuàn，俗音 tshiòng-kuàn。

三、出軌 tshut-khuí，「軌」字台語自來唸送氣聲母，佮「鬼」無仝音。

四、敗馬 pāi-bé、跋馬 pua̍h-bé、跋落馬 pua̍h-lo̍h-bé。「跋落馬」本意是「對馬頂跋落來」，當年个台灣儂舊詞新用，來講火車失事。

五、交仗 kau-tiōng/tiāng。

六、小丑仔 siáu-thiú-á。

七、前年 tsûn--nî / tsū--nî / tsū-nî，腔口幾若種。