台語詞「論真」，免講「論真講」

【論真 lūn-tsin】即个台語詞佇社會漸漸失傳。台文界个友志，有心共伊抾轉來用，是好代。總是，用了袂媠，逐家攏寫「論真講」、甚至「論真講起來」較濟。

「論真」即个詞，論真 毋免閣加[ke]一字「講」，因為【論】本身就是動詞，就已經包含「講」个意思在內，而且比「講」閣較精密，哪著夯枷閣加「講」？

【論】是動詞，【真】是補語，【論真】就是【論到真】【頂真來論】个意思，遮爾簡明有力个台語詞，加講「講」、「講起來」毋但囉嗦，也傷著伊原本个力量。

是按怎眾儂欲加「講」、「講起來」？因為華語个表達法是〔老實說〕、〔嚴格說起來〕，先兩字副詞，才閣接〔說〕。台語文用者受著影響，煞掠做台語【論真】也是單純个副詞，後壁若無加【講】，心肝就會礙虐。

文例一：論真，伊是愛汝个錢，毋是愛汝个儂。

文例二：中華民國在台灣，論真，是一个偽[guī]政權，毋但國際無承認，連馬英九嘛毋敢對外，尤其對中共，來自稱是中華民國總統。咱台灣儂甘願繼續扶--伊，時到跳海嘛走袂離[lī]。