台語量詞"sian"个用法佮位階，兼論教典義項順序不當

量詞 sian 寫做「身」實用上無理想

台語量詞 sian，主要用做「尪仔、神像」等等个量詞（單位詞），教典漢字寫「身」--字。 sian 有可能是【身 sin】个特殊白話音，就親像【信 sìn】有特殊白話音 siàn 仝款， 時常用佇疑問句佮否定句，像「汝欲siàn--毋？」「我毋siàn」。

但是教典註明「身」唸 sian 只是「替」（代替字），就表示伊無承認 sian 是「身」 个白話音。Kà 是按呢，用「身」來表示 sian 就無啥理想矣。

比在咱看著一篇台文寫著「規身澹漉漉」，按呢到底是愛唸 sin 抑是 sian 咧？ 通常是唸 sin 無錯，就是咧講某儂規身軀澹漉漉。不而過，也是有機會唸做 sian 啊， 像講「早起布尪仔提出去扑扑咧，乘紲曝日。下晡雨來袂赴收，煞沃甲規身[sian]澹漉漉。」

以上个例，「身」字若咧講儂，唸 sin；若咧講尪仔，唸 sian。但是有較僫決定个例， 可比講：「伊最近koh樣koh樣，不時一身 tshāi-tshāi。」遮雖然是講儂，但是著唸 sian，將儂暗喻做尪仔。雖然較自然个講法是「一个儂 tshāi-tshāi」，但是 「一sian tshāi-tshāi」也無算毋著。

話講倒轉，現代儂對寵物（包括生物佮非生物）往往感情 hē 真重，袂輸是親儂仝款， 所以講伊所愛个布尪仔「一sin澹漉漉」就真四常。

按呢益發[it-huat]顯明 sin 佮 sian 攏寫做「身」字，讀者佮作者个呼音認知真容易相出路， 建議直接寫羅馬字 sian 就好。

講儂个時「一sin」vs「一sian」

若用來講儂，tsi̍t-sin 比 tsi̍t-sian 捷用濟咧（台日典收前者做一條目，後者就無）， 而且有真濟 sio配搭个套語佮俗語，值得咱學習。總是，本文是討論 sian，所以無閣抄錄。 請參考台日典下冊p.209圖檔。

量詞 sian 佇無仝詞彙範疇有無仝个位階

佇「尪仔、神像」个詞彙範疇當中，講「一sian布袋尪仔」正確，無問題； 但是若欲講「一 sian 土地公／關公／媽祖……」就愛細膩，即種講法佇各種宗教活動个場合， 真容易犯儂嫌，著講「一尊[tsun]」某某神明。這就是將有形个「神像」佮 無形个「神明」个界線含糊化个一種表達法。

我細漢个時，本來干焦知影「一sian神（像）」，後來才學會曉講「一尊神（像）」， 這也是我佇語言方面漸漸社會化个一種經驗。

閣來，若是佇「魚、蛇、蟲……」个詞彙範疇个時，講「一尾魚、一尾蛇、一尾蟲」 攏是標準講法。其中，佇各種長長、軟身个蟲當中，無論講「一尾杜蚓」、 「一尾刺毛蟲」、「一尾蜈蜞」攏無問題。獨獨「蠶仔」，除了「一尾」以外， 有較雅氣个講法，叫做「一 sian 蠶仔」。

可能是因為「蠶仔」較貴氣，會經絲[kenn/kinn-si]，儂抽絲來織出綾羅綢緞 [lîng-lô.-tiû-tuān]，裁縫高貴衣裳[i-tsiûnn]。針對即種經濟價值真懸个蟲， 才有專屬个，表示特別敬意个量詞，這就是語言所反映个文化特色。

也就是講，「一sian神明」，不雅；「一sian蠶仔」，雅。佇無仝个詞彙範疇， 台語量詞 sian 表現出無仝个敬意佮雅氣个位階。

（「蠶仔」有兩種音：tshâm-á、變音 thâm-á；另外也有講做 niû-á。詳見文尾補充）

教典【身 sian】釋義檢討

教典【身 sian】單字詞， 總共收列四个義項，如下：

1. [量詞] 計算人的單位。通常只用單數「一身」(tsi̍t sian)。
2. [量詞] 計算神像的單位。[近義] 尊(tsun)
3. [量詞] 計算戲偶、玩偶的單位。
4. [量詞] 計算蠶隻的單位。

教典一方面用[替]字表示無承認「身」是 sian 个本字， 但是伊咧決定義項順序个時， 敢哪又閣認定講：『sian 就是來自「身」字，「儂身」个意思就是 sian 个本義， 所以「計算人的單位」著愛排做前』。

我認為伊即種義項排列無對同[tuì-tâng]。咱查廈英大辭典(1873) p.431 sian 條目 （將原冊韻母 -ien 拼法改做後來个教羅 -ian，免得將來僫搜揣我家己个網誌）：

廈英典 sian

sian [R. sin, the body, =col. seng], (C. sin), classifier of idols, ancestral tablets, etc. siang-chhiú phi-sian, arms stretched out, as in form of a cross. bā-hio̍h phi-sian, id. chi̍t-sian-pu̍t, one (Bud.) idol. chi̍t-sian kong-pô, one ancestral tablet. thǹg kàu-chi̍t-sian náⁿ liû-pu̍t--nihⁿ, said in scolding a naked child.

廈英典認為「身」字是 sian 个白話音。

台日典 sian

閣看臺日大辭典(1931)上冊 p.683，網路台譯版 （釋義佮例句漢字我有修改予伊較符合原冊）：

【身 sian】解釋：(1)尪仔、神像等等ê助數詞。 (2)反身伸長身軀。
例句：(1)此[tsit] ∼ 尪仔；一 ∼ 佛[pu̍t]；一 ∼ 公婆。 (2)嬰仔 ∼ beh hōo 人抱；蛇頭 ∼--起來；khiā頭前--ê m̄-thang ∼--起來。

其中釋義(1)个例詞「一sian公婆」个意思是指一塊公媽牌。另外，釋義(2)是動詞， 真心適个用法，佇遮無討論。

廈英典、台日典佮我个語感有貫串

照廈英典、台日典所記佮我本身个語感來排比，其中个筋脈有貫串： 廈英典講 sian 是神像(idols)、公媽牌(ancestral tablets) 等等个量詞； 到台日典就變做先列尪仔，才列神像，表示 sian 佇日本時代个台語， 已經變做較捷用來做「尪仔」个量詞，但是猶原會使得用佇神像。 這正正有合我个語感。

教台典”sian”前三義項个順序不當

按呢咱就了解，教典將「計算人的單位」列做【身 sian】个第一義項， 實在無妥當，即種用法个出現率絕對無「○身尪仔」遐懸，而且做「尪仔」个量詞个時， sian 無論用啥乜數目（正整數）攏無問題。但是用佇〔計算人的單位〕，教典特別注明 〔通常只用單數「一身」〕，可見這就是一个較罕用閣用法真受限个義項。教典全名 《教育部臺灣閩南語常用詞辭典》，伊个體例有明文規定：常用義項著愛排做前。

閣來，教典【身 sian】个第二義項是計算神像个單位，第三義項才是計算 〔戲偶、玩偶〕个單位。按呢毋是比台日典較古早（=落伍）去矣？台日典是將 「人形」（にんぎょう，就是台語尪仔）列佇「偶像」（ぐうぞう，就是台語 神像）个頭前。1931年个台日典煞比二十一世紀个教台典較合我个語感， 教典應該將第二、三義項交換順序，而且將「計算人的單位」徙做第三義項。

教台典”sian”釋義个可取點

話講倒轉，教典也毋是無一路取，伊將「神像」佮「戲偶、玩偶」 拆做兩義項，an 就袂䆀。sian 做「神像」个量詞个時，教典才有列近義詞「尊」； 若做「尪仔」个量詞，伊就無近義詞「尊」。也就是講，「一sian土地公」 會用得講「一尊土地公」，基本意思仝款，風格（正式度、尊敬度）有差爾爾； 但是「一sian布尪仔」一般就無應該講「一尊布尪仔」。教典拆做兩義項个做法 就會用得對應即種差別。可惜教典單字詞「尊」並無收列量詞个義項！

「尊」做神像量詞可能來自華語

自來个閩台語辭典，包括上重要个廈英典佮台日典，我無查著有提起「尊」 會凍用做神像个量詞，獨獨佇《台華雙語辭典》（楊青矗主編，敦理出版社 1992） 有收。楊先生閣專工補充解說講（以下引文共伊个ㄅㄆㄇ標音改做台羅）：

台語提到「一尊佛像」常說成「一身佛像」tsi̍t sian pu̍t-siōng，提到「一尊大炮」 常說成「一門大炮」tsi̍t mn̂g tuā-phàu。

教育部重編國語辭典「尊」字做名詞用，第三義項就寫講：

量詞。計算大炮或神像的單位。如：「十尊大炮」、「五尊神像」。

按呢看起來，有可能台語講「一尊神像」是對華語借來个。

總--是，台灣社會 tsîng-kàu-tann 並無講「一尊大炮」。我做兵是佇砲兵部隊 （軍隊攏寫「砲」字，毋是「炮」），雖然佇軍中个士兵階層，閣真捷聽見逐家講台語， 可惜我無注意聽著兵仔伴𪜶按怎講大砲个量詞。

廈英典个時代，講「一尊pu̍t」可能是中性用語，袂予儂嫌講失敬，但是台語通行「一尊○○」 （○○ 是神明名）了後，閣講「一sian ○○」就容易犯嫌矣。

補充：「蠶仔」台語至少三種講法

「蠶仔」有講 tshâm-á、變音 thâm-á（家母就是按呢講）；另外也有講 niû-á， 漢字著另外寫，一般寫做「娘仔」。教會公報有 6 篇文寫著 chhâm-á，其中有 2 篇用括號註明講有儂叫做 niû-á。教會公報另外有一篇單獨提起 niû-á（1926.11, 500 koàn, Kî-tó ê Chó͘-tòng），引用如下：

「娘仔」文例

Bô sìn-sim ê kî-tó, sī ná chhun-thiⁿ ê niû-á teh kiⁿ-khok, ka-kī chó͘-tòng ka-kī.

伊寫講「無信心个祈禱，是ná春天个娘仔咧經觳，家己阻擋家己。」台語「經觳」， 華語「結繭」。kinn/kenn-kok 是真好个台語詞，台日典、教典攏無收著，但是台日典有 「娘仔殼」，教典有「娘仔觳」，是仝一个詞 niû-á-khok，只是 khok 个漢字寫無仝， 佇遮採用教典寫法來寫「經觳」，因為寫「殼」若無標音，一般儂干焦會曉唸做 khak 爾爾。

教會公報迄篇〈祈禱个阻擋〉寫「娘仔咧經觳，家己阻擋家己」，意思就是文言成語 「作繭自縛」（tsok-kián.-tsū-po̍k）。佇《新編華台語對照典》，「作繭自縛」 對應个台語有：「家己用索仔溜[liù]頷頸、提索仔縛家己、鑄[tsù]銃扑家己、 鑿枷[tsha̍k-kê]家己舉[gia̍h]。」其中「鑿枷家己gia̍h」改做「鑿枷家己夯[giâ]」較著， 因為是講「夯枷」，毋是「gia̍h枷」，台日典通做證。

附記

即篇本底九月29著愛寫，因為頭疼，一時失志，煞無堅持來寫，隔工才動工。

即篇已經寫幾若暗矣，今仔日是十月初二。