昨–日鋪一篇〈白話字聖經兩个語詞：hāu-phiaⁿ-phè（鱟骿杮）、taⁿ-teh（擔硩）〉， 內底有提起泉腔 hāu-phiann-phè/phèr 个頭音節 hāu 可能是 huā/huǎ （泉腔「瓦」个講法）變音所致，也就是相連紲兩个母音 ua 前後音段發生交換个現象。
有學過語言學个先進可能就知影一个術語，以上个現象叫做 metathesis /mǝˈtæθǝsɪs/， 即个詞華文語言學術語譯做「音序換位」，台語會使照字唸做 im-sū uānn-uī。 音序換位有真濟類型，無一定是相連紲个音段，嘛有可能是前後兩个音節个聲母抑是韻母交換等等。
台語「音序換位」个語例，我下底寫幾个仔：
【石頭 tsio̍h-thâu】阮老母講 tsue̍h-thâu，我分析起來，可能是 io -> oi （但是台語無 oi 所以閣變成）-> oe（台羅寫做 ue）。
【頂煎下迫 tíng-tsian ē-pik】（又渴又饑），楊麗花佇一齣歌仔戲內底講做 tsíng-tian ē-pik。 這是第一、二音節个聲母互相交換个例。
【ka-la̍uh--luè】（lak--落去个意思）阮老母講 kau-a̍h--luè。 這是前後兩个音節个韻母交換个現象（聲調保留原底个）。
其他个例，請各位鬥提供，感謝！
語言學家佇全世界蓋濟語言个語料內底攏有發現 metathesis 个例。 有个 metathesis 已經約定俗成，有个 metathesis 只是個別个講話者一時喙舌踏thu̍t。
英語儂 喙舌踏thu̍t 个 metathesis 个例：
You have missed the history lecture.
（汝無赴著即擺个歷史演講）
無細膩講做：
You have hissed the mistory(mistery) lecture.
（汝佇即个神祕演講共主講唱聲。）
面友 Shu-ren 兄來留言，講：
「台西佮四箍圍鄉鎮，水雞有讀 siú-kue，metathesis，阮屬即款。區域特徵，無成做常例。」
先父有一擺將【抽水站 thiu-tsuí-tsām】講做 thiu-tsiú-tsām，毋過伊有即時重講正確个音。 佇遮，tsuí 講做 tsiú 个音序換位現象，可能是受著頭音節 thiu 个韻母 iu 影響。
註：關係 metathesis 的意譯，華文資料有簡單譯做「換位」，也有翻做「音位變換」、 「音位轉換」、「音素換位」等等。我遮用「音序換位」是參考《中國話的文法》 （趙元任著、丁邦新譯）p.xii 下底个[註1]。 —
關係教羅寫 oe / oa，台羅寫 ue / ua 个音韻學解說：
教羅寫 oe / oa 較倚音值，台羅寫 ue / ua 是音位寫法，佇音值上來講， 高元音予中元音 e 抑是 低元音 a 个舌位搝落低去，變做 o，教羅才會按呢寫。
佇台語个音位系統上，較媠氣个介音分析法應該是：干焦容允高元音做介音。
像 io 音序換位變 ue 个例，用元音舌位圖來理解，io 是前元音 i 配後元音 o， 音序交換了後變做後元音 u 配前元音 e，也就是 ue。台語前後（抑是後前） 元音音素个配搭組合，除了 iu 佮 ui 是前後攏高元音以外，若是其中出現「非高元音」， 按呢另外一个元音著愛是高元音，像 io 就是前个高元音 i、後个中元音 o 咧配搭； ue 是後个高元音 u、前个中元音 e 組合。
即種音位分析較簡捷[kán-tsia̍t]有力，甚至會使涵蓋古泉腔（南管腔）， 按呢咱就會使講南管腔有三種介音 i / ir / u，也攏是高元音。 像彙音妙悟个「雞」字母，南管腔佮台灣老安溪腔講做 ere， 即種記法類似教羅寫 oe / oa 是偏音值个記法，ere 若用音位記法就是 ire， 伊个介音就是 ir。ire 就是央高元音 ir 配前中元音 e。
Comments powered by Disqus.