台語【儂 lâng】是多義詞，意思至少有：
一、指【身體】，包括健康情形、漢草、生張、性質。像「儂# 無爽快，緊來去予醫生看！」、「儂# 較細粒子」。即種意思个【儂】做主詞个時，愛講本調。
二、類似華語代詞〔人家〕，有時用來指稱別儂，像「儂咧無爽快，汝毋通閣去刺激--伊」；有時用來自稱，像「汝是按怎毋答應伊？」「儂無爽快啦！」，意思是「我無歡喜啦！」，帶有淡薄仔 sai-nai-khuì。即種意思个【儂】做主詞个時，愛講變調。
三、指【人類】，對應【非人、鬼神】。做主詞个時，愛講本調。俗語講：「儂# 牽# 毋行，鬼# 牽# liù-liù-走。」
比較：
1.【做儂 tsò/tsuè-lâng】，是為人處世，「人# 之所以# 為人#」佮精牲無仝。
2.【做--儂 tsò/tsuè--lâng】，是華語〔許配給人家〕个意思。
請讀者明鑑，我將 lâng 寫做「儂」，這是本字寫法，無用「人 jîn」來訓用。若是教育部用字是從俗、無分，一律寫做「人」。分寫對寫个儂較麻煩，但是欲讀較好分別。像「婦人儂 hū-jîn-lâng」「大儂 tuā-lâng」「大人 tāi-jîn」「小--儂 sió--lâng」「小人 siáu-jîn」「儂兜 lâng-tau」「人家 jîn-ke」。雖然台語自來个文獻無寫做「儂」，現時一般儂也足袂慣勢寫「儂」，但是就我逐工佇電腦使用台語文个經驗來看，有分加足快活，我相信將來欲學習台語、研究台語文獻个儂，看著我即種堅持，一定會感謝我。
加舉一寡例：
俗語：「儂身 借狗腹出世」[lâng-sin tsioh káu-pak tshut-sì]，指儂 生做歹看。
比較：「人身攻擊 jîn-sin kong-kek」。
「一儂主張，毋值兩儂思量」[tsi̍t-lâng tsú-tiunn, m̄-ta̍t nn̄g-lâng su-niû]；比較
「一人智，不如兩人議」[it-jîn tì, put-jû lióng-jîn gī]
「真人 tsin-jîn」指道家人物；「真儂 tsin-lâng」指真正个儂。
「人氣 jîn-khì」指受歡迎个程度；「儂氣 lâng-khì」指人體發出來个燒氣。
「人才 jîn-tsâi」指內才、才能；「儂才 lâng-tsâi」指儀表、人品。
「人工 jîn-kang」人為做成[tsiânn]，毋是自然生成个；「儂工 lâng-kang」指勞動力。
「無彩伊是一个人物[jîn-bu̍t]」vs「無彩儂物 bô-tshái lâng mi̍h」
引用教育部推薦用字解析「人」:
『華語的「人」臺灣閩南語有兩種說法，例如：「臺灣人」說成「Tâi-uân-lâng」，但是「人類」要說成「jîn-luī」。也就是說華語的「人」，臺灣閩南語有「lâng」和「jîn」的兩種說法。
但有學者研究認為，「人」這個字的唯一發音是「jîn」，也就是說「人」字並沒有「lâng」的發音。「lâng」的正確用字應該是「儂」，因為樂府詩〈子夜四時歌夏歌〉中，「赫赫盛陰月，無儂不握扇。」當中的「儂」就是「人」的意思。「儂」不但有「人」的意思，也有「lâng」的發音，所以應該就是「lâng」的本字。
既然知道「Tâi-uân-lâng」依照本字應該寫作「臺灣儂」，為什麼推薦用字公布的卻是「人」呢？主要因為「儂」不是現代華語的常用字，多數民眾看到「儂」不知道這個字的意思是「人」。若臺灣閩南語文裡出現「日本儂」、「美國儂」，大多數的人都不知道就是「日本人」、「美國人」，對臺灣閩南語文的推展反而有礙。甘為霖的《廈門音新字典》的「人」有jîn（文讀），lâng（白讀）兩讀，同時「儂」字只有 lông 一讀，可見他以為「儂」不適合用來代替「人」字。這代表多數人的看法，為了顧及多數人的閱讀理解習慣，我們認為把「lâng」、「jîn」都寫作「人」，不但筆畫簡單，理解容易，在臺灣閩南語文中也不會有任何衝突、困擾。只是為了顧及部分喜歡使用本字的人，推薦用字把「儂」收入了異用字。如果有人喜歡使用本字，要把「美國人」寫成「美國儂」，也是可以的選擇。』
伊講『主要因為「儂」不是現代華語的常用字，多數民眾看到「儂」不知道這個字的意思是「人」』。單獨看著「儂」毋知影就是 lâng，這是有影，但是佇歸段台語文內底，真緊著判斷會出來。伊閣講『在臺灣閩南語文中也不會有任何衝突、困擾。 』這我無同感，我个經驗是三不五時會拄著歹分个情形，像我頭前所舉个例。
Comments powered by Disqus.