台語「入字頭」个音變

台語十五音[si̍p-ngóo-im]「入」字頭个字，像「入 ji̍p、日 ji̍t、字 jī、二 jī、兒 jî、而 jî、……」，阮佇屏東萬丹，細漢就聽著 ji / gi 兩種變體，所以攏會慣勢，但是若聽儂講 li̍t-thâu (日頭) / siá lī (寫字)，阮萬丹囡仔儂會感覺按呢講是臭奶呆。

當然，大漢研究台語了後，就知影有所在个腔口（台南、鹿港、新竹、台北……）變了較緊，完全失去 j-，連老儂嘛攏講 li̍t-thâu / siá lī，所以著愛尊重怹。

入字頭配 u 母音个字嘛有類似情形，但是 ju 佇各地，若有變化，就變做 lu，無變做 gu，像「熱 jua̍h」變 lua̍h、「如 jû」變 lû。

入字頭 講 ji 比 gi / li 來講，毋但是較原本个發音，而且仝音字較少，會使增加分辨性，親像

「字/二 jī」、「利 lī」、「義 gī」
「入 ji̍p」、「立 li̍p」、「岌 gi̍p」
「熱 jua̍h」、「捊 lua̍h」（捊頭毛）
「如 jû/jî」、「驢 lû/lî」、「厘 lî」

入字頭若講 ji/ju 个「原音」，去到佗位，儂大概攏聽有，但是講 li 个儂去到講 gi 个所在，抑是講 gi 个儂去到講 li 个所在，彼此可能會反應袂過來，抑是加減有排斥感。

所以我个教學，猶原是以 j- 為主，另外才佮學生講，有 l- / g- 个變化。

但是就大趨勢來看，j- 確實一直咧流失，偏泉區 j- 往往攏變 l-；一寡偏漳區看母音， ji- 變 gi-，ju- 變 lu-（日頭 ji̍t-thâu 變 gi̍t-thâu，真熱 tsin jua̍h 變 tsin lua̍h）。準做台語將來無死去，「十五音」嘛會變做「十四音」。現時个青少年欲發出 j- 个音，普遍真食力，我就教怹，唸像華語「ㄖ」但是免捲舌，所以應該愛感覺真簡單才著 ^_^

目前台灣偏泉區閣有保存入字頭个，主要是佇台北山區老安溪腔區，佮澎湖同安腔區。「十五音」个分類是漳泉潮自古共同个傳統，1800 年泉腔韻書「入字頭」分真明。但是無論佇福建，抑是台灣攏有出現「入字頭」歸入「柳字頭」抑是「語字頭」个現象，這是百幾年內个代誌。