台語「叫著我」毋是華語〔叫著我〕

有一首非常有名个台語白話詩「阿爹的飯包」，第一節寫講：

---
每一日早起時，天猶未光
阿爹就帶著飯包
騎著舊鐵馬，離開厝
出去溪埔替人搬沙石
---

老實講，「帶著飯包 / 騎著舊鐵馬」即種語法毋是正台語。伊這是對華語「帶著(ㄓㄜ．)飯盒 / 騎著(ㄓㄜ．)舊腳踏車」个思考「直譯」過來台文个結果。華語表示「動詞持續貌」个虛字「著」(ㄓㄜ．)，其實台語無完全對應个講法，這無算台語个缺點，因為古漢文嘛無即種持續貌。毋過，咱會使講：

---
逐工透早 天猶未光
阿爸就飯包帶咧
舊鐵馬騎咧
出門去溪埔共[kā]人搬沙石仔
---

台語若講「V + 著 + N」（V 是及物動詞，N 是名詞），迄个「著 tio̍h」表示動作有作用著迄个名詞（動作有達成）。親像「扑著身軀」「看著儂」，這華語是講〔V + 到 + N〕（有時是講〔V + 著(ㄓㄠˊ)﹞），毋是〔V + 著(ㄓㄜ．) + N〕，無仝。

五十年前个台語流行歌，就有用著即種華語語法，親像「黃昏个故鄉」，一開始唱「叫著我，叫著我，黃昏个故鄉不時teh叫我」。台語「叫著我」，是用佇親像「老師點名叫著我，我趕緊應聲」个情形，毋是指華語〔叫著我〕迄種一遍閣一遍咧叫我个持續狀態。

「帶著飯包」、「騎著舊鐵馬」即種語法雖然台語流行歌用真濟，台語白話文嘛真濟作者按呢寫，但是咱愛知影，台語自然口語本來毋是即種用法。

註：以上所提即个台語、華語比較个語法問題，極複雜，即篇只是非常粗淺个隨筆爾爾，本底貼佇Facebook潘科元個人動態。