（本文初版，捌先發表佇 facebook 的「台語社」，所用的台語漢字，遵趁教育部推薦用字，無照我網誌別篇的慣勢用字去調整）以下整理出上嚴格的台語「四句聯」、「相褒」，尤其是「唸歌」的格律，會用得提來配合古早歌仔調唱出來，四句的尾字毋但仝韻母，而且有講究平仄。若是無唱，干焦講，親像娶新娘講四句，就無一定有照遮爾嚴格的格律。這毋是某一本冊、某一个人規定的，是我歸納民間相褒，佮唸歌走唱的歌仔仙怹傳承、創作的作品所整理出來的。毋過，屏東的恆春民謠，怹的格律較鬆，無要求尾字个平仄。
我這篇，本來（2011-05-21）寫了非常抽象，無舉實例。後來（2011-12-07）才補充實例。網路有一寡唸歌的有聲資料，所以各位會當家治提來做印證。毋過，著愛採用正港民間藝人，親像呂柳仙、楊秀卿的唸歌，毋通用文人的創作！（最近修改日期：2012-01-03、2012-01-10）
一開始先用簡單幾句話來開破上嚴格的唸歌鬥句的要求：一葩四句內底，每一句的尾字愛用仝款的韻母（包括介音在內）。第二句、第四句的尾字，就是韻跤，一定愛用平聲字，就是台語第一聲抑是第五聲的字；或者是用陽入聲字，就是台語第八聲的字（這有額外的條件限件）。抑第三句尾字，袂使[sái]用平聲字。若無照按呢做，佇第二、四句韻跤，用著第一、第五、第八聲以外的聲調，就是較凊彩的，或者是外行人。
以下詳細說明。
先補充淡薄仔背景智識，文言詩律有分「平聲」[piânn/pênn-siann]佮「仄聲」[tseh-siann]。以台語來論，平聲就是第一聲（陰平）佮第五聲（陽平）；其他的聲調，包括第二聲（上聲）、第三聲（陰去）、第四聲（陰入）、第七聲（陽去）、第八聲（陽入），攏算仄聲。
台語四句聯的押韻有分平仄[piânn-tseh]，這點觀念蓋重要，但是佮文言詩的平仄概念有出入。以下的討論，愛用著「非入聲的仄聲」這種概念，也就是只包括第二、三、七聲（就是「上聲」佮「去聲」），無包括第四、八聲（就是「入聲」）。另外，第四聲佮第八聲，雖然攏是入聲，但是佇台語四句聯押韻，有重大的差別（尤其是 -h 的入聲），這點完全無佇文言詩押韻的概念內底。
甲、句式：原則上，七字一句，四句形成一首[tshiú]「四句聯 sì-kù-liân」，類似文言的七言絕句。一首四句聯配合一種歌仔調落去唱，就叫做一葩[pha]。另外，也會使額外thap字、thap句入去活用。一葩接紲一葩唱落去，就組合創作出長篇的「唸歌體」（我號的名）。
乙、押韻法：以下講著第幾句押第幾聲，攏是指迄句的上尾字，因為押韻只考慮句尾字。漢語（台語在內）一个「音節」（傳統叫做一个「字」），是由「聲母、韻母、聲調」三種音節組件來構造的。其中，「韻母」的結構閣會使分析做「介音+韻腹+韻尾」。所謂押韻，毋但「韻母」愛仝款、嘛愛考慮「聲調」，但是「聲母」免管，隨意。四句聯押韻，「韻母」佮「聲調」有微妙的互動，以下的說明，就是綜合考慮著這兩項要素。
四句聯鬥句押韻的第一條基本原則：「韻母」著愛屬佇仝一个「字母」，才「有可能」出現佇仝一葩四句聯的尾字。這是「必要條件」，毋是「充份條件」，也就是講，一葩四句聯，四字尾字，一定屬佇「仝款字母」；但是「仝款字母」，無一定就「會使」出現佇仝一葩的尾字，只是「有可能」，下面會進一步說明限制的條件。
「字母」是指親像《彙音寶鑑》彼種傳統閩台語韻書所列的「四十五『字母』音」，「君(un)、堅(ian)、金(im)、規(ui)、嘉(e)、干(an)、公(ong)、乖(uai)、經(ing)、觀(uan)……」彼種「字母」。以下講著「字母」，一律是這種意思，毋是羅馬字的 abc 彼種字母。這種字母，大概會使講做是「包含介音在內的韻母」，也就是完整的「介音+韻腹+韻尾」。
舉例一：韻母 a、ia、ua 等等是分開屬佇無仝的「字母」，所以袂使互相押韻，也就是講台語四句聯押韻，愛將「介音」考慮在內。若是文言文是無咧管介音的部份，這三个韻母會使互相押韻。
舉例二：韻母 a、ann 嘛是屬佇無仝的字母，口母音佮鼻母音袂使互相押韻。請注意，這是上嚴格的格律，有袂少四句聯抑是唸歌，並無做甲遮講究。
閣來分兩類，「開尾韻」佮「閉尾韻」，來討論進一步的限制條件。
開尾韻只要屬佇仝一个字母，而且「聲調有仝類」（分兩類：「吊懸調」、「非吊懸調」，下段會解說），就可以押韻。像 a、â、a̍h 會使互相押韻。閉尾韻毋但愛屬佇仝一个字母，閣聲調仝類，而且入聲字還入聲字，非入聲字凡非入聲字，袂使同齊出現佇仝一葩四句的尾字。像 an、ân 會使押韻，但是袂使佮 a̍t 押韻。
頂段所講「聲調有仝類」，就是第 2、4句仝款「字母」，而且是「吊懸調」。「吊懸調」是佇遮我臨時杜撰[tōo-tsuān]的術語，包含第一聲〔高平調〕、第五聲〔低升調〕、第八聲〔有腔口差，但是以高短調為主〕這三種。第 3 句著愛用「非吊懸調」，也就是指除了第一、第五、第八聲以外的聲調。若第 1 句才隨意。閣強調--一遍，四句尾字攏愛仝「字母」，但是聲調有變化。
這種聲調上的變化，是現此時，台文作者創作台語四句聯最大的「盲點」。我看著某某台文大作家寫出來的四句聯，定定真憢疑[giâu-gî]咧想：到底伊有了解「聲調佇四句聯尾字」的限制無？伊可能知，但是因為台語運用能力無夠，無法度拄好安排佇第 2、第 4 句尾來配搭「吊懸調」，閣佇第 3 句尾來配搭「非吊懸調」（橫直無欲配合歌仔調的旋律來唱，較無要緊）；嘛凡勢怹根本毋知這種格律，想講只要「仝字母的音節」攏thìng好隨意出現佇四句任何一句的尾字，所以才定定佇第二句、第四句出現「非吊懸調」韻跤，抑是佇第三句出現「吊懸調」韻跤。
以下進一步詳細來解說「開尾韻」佮「閉尾韻」四句聯押韻的差別。韻母的結構是「介音+韻腹+韻尾」，其中只有「韻腹」是必要的成份。「開尾韻」佮「閉尾韻」的定義就是看韻尾來決定。
一、開尾韻：簡單講，就是「無韻尾」的韻母，佇韻母結束的所在，喙空開放。包括口音韻(a/ah, i/ih, u/uh, e/eh, o/oh, oo/ooh, au/auh, ai/aih……)，佮鼻音韻(ann/annh, inn/innh, aunn/aunnh……），閣有韻化鼻音韻 ng/ngh, m/mh)。請注意：一、束喉音(glottal stop)收束的韻母，嘛歸屬佇開尾韻。二、韻化鼻音韻 ng/ngh 的 ng，閣有 m/mh 的 m，是佔佇韻腹的地位，毋是韻尾，所以嘛算開尾韻。
- 第 2、4句押平聲（第一、五聲）或者是 -h 第八聲，總共三種聲調。
概念上，這三種聲調攏是我頭前所解說的「吊懸調」。古早閩台語第八聲無論漳、泉、廈腔攏算吊懸調（古漳是低升、古泉是中升、廈門是高短調）。所以 a / â / a̍h 是有押韻的！（但是佇閉尾韻內底，am / âm 有押韻，毋過佮 a̍p 無押韻，請參考後壁閉尾韻的說明）照傳統的分類，-h 第八聲是屬佇「仄聲」[tseh-siann]，竟然會使佮第一聲、第五聲的平聲字押韻，這敢毋是不可思議？毋是！因為這三種的實調攏是「吊懸調」，套歌仔調落去唱，無問題。 - 第 3 句著用第二、三、-h四、七聲，這幾種的仄聲，總共四種「非吊懸調」。
- 第 1 句隨意，看是綴第 2、4句來用吊懸調押韻，抑是綴第 3 句，用「非吊懸調」。
但是統計起來，用非吊懸調，佔大多數，按呢做，結構較應伨[ìn-thīn]，嘛較好揣字（吊懸調三種聲調 vs. 非吊懸調四種聲調）。 - 口音韻佮鼻音韻，就準元音本身仝款，可比 ia 佮 iann 來講，嘛愛分開押韻，袂使囥入仝一葩。
呂柳仙《勸世歌 Khuàn-sè-kua》（月球唱片）舉例：
世間的人無當比 [sè-kan ê lâng bô-tàng pí]（尾字 -í 第二聲）
自恨出世落塗時 [tsū-hūn tshut-sì lo̍h-thôo-sî]（尾字 -î 第五聲吊懸調）
歹命艱苦磨甲死 [phái-miā kan-khóo buâ kah sí]（尾字 -í 第二聲）
富貴差𡢃佮用兒 [tshut-sì tshe-kán kah īng-lî]（尾字 -î 第五聲吊懸調）
（以上彼葩是押單元音口音韻 i 平聲，有兩句吊懸調押韻）
注生娘娘注好好 [tsù-sinn niû-niû tsù hó-hó]（尾字 -ó 第二聲）
夯刀sian削都袂無 [giâ-to sian siah to buē bô]（尾字 -ô 第五聲吊懸調）
未曾注食先注餓 [bē-tsîng tsù-tsia̍h sing tsù-gō]（尾字 -ō 第七聲）
由在天地去伐落 [iû-tsiā thinn-tuē khì hua̍t-lo̍h]（尾字 -o̍h 是 -h第八聲吊懸調）
（以上彼葩是押單元音口音韻 i 平聲佮 -h第八聲，有兩句吊懸調押韻）
世情是我看蓋透 [sè-tsîng sī guá khuànn kài thàu]（尾字 -àu 第三聲）
奸雄的人毋通交 [kan-hiông ê lâng m̄-thang kau]（尾字 -au 第一聲吊懸調）
勸恁少年芷共老 [khǹg lín siàu-liân tsínn kāng lāu]（尾字 -āu 第七聲）
賰錢是命免人留 [tshun-tsînn sī miā bián lâng lâu]（尾字 -âu 第五聲吊懸調）
（以上彼葩是押雙元音口音韻 au 平聲，有兩句吊懸調押韻）
世情是我看上破 [sè-tsîng sī guá khuànn siōng phuà]（尾字 -uà 第三聲）
有當食用免傷磨 [ū-tàng tsia̍h-īng bián siunn buâ]（尾字 -uâ 第五聲吊懸）
富貴艱苦到死煞 [hù-kuì kan-khóo kàu sí suah]（尾字 -uah 第四聲）
平平仔過日敢有縒 [pînn-pînn-á kè-li̍t kám ū-tsua̍h]（尾字 -ua̍h 是 -h第八聲吊懸調）
（以上彼葩是押雙元音口音韻 ua 平聲佮 -h第八聲，有兩句吊懸調押韻）
注生婆姐無公平 [tsù-sinn pô-tsiá bô kong-pînn]（尾字 -înn 第五聲吊懸調）
代先注死才注生 [tāi-sing tsù-sí tsiah tsù-sinn]（尾字 -inn 第一聲吊懸調）
咱人尾溜看毋見 [lán lâng bé-liu khuànn-m̄-kìnn]（尾字 -ìnn 第三聲）
圓人會扁扁會圓 [înn--lâng ē pínn# pínn# ē înn]（尾字 -înn 第五聲吊懸調）
（以上彼葩是押單元音鼻音韻 -inn 平聲，有三句吊懸調押韻）
梁松林《馬家央媒人求親新歌》（台北 周協隆書局 1936 年出版）舉例：（用字照原版無改，我加台羅）
萬仔汝簡即天叼 [Bān--á lí kán tsiah thian-tho̍h]（尾字 -o̍h 是 -h第八聲吊懸調）
我簡有塊驚恁無 [guá kán ū teh kiann lín bô]（尾字 -ô 第五聲吊懸調）
下得早成對頭好 [ē-tit tsá-sîng tuì-thâu hó]（尾字 -ó 第二聲）
配頭我是下曉落 [phuè-thâu guá sī ē-hiáu lo̍h]（尾字 -o̍h 是 -h第八聲吊懸調）
（以上彼葩是押單元音口音韻 o 平聲佮 -h第八聲，有三句吊懸調押韻）
二、閉尾韻：「有韻尾」的韻母。閣分「非入聲」（-m/-n/-ng韻尾）、佮「入聲」（-p/-t/-k韻尾）兩類分開押韻：
(一)、非入聲（-m/-n/-ng韻尾）：
- 第 2、4句押平聲[piânn/pênn-siann]（第一抑第五聲）。
- 第 3 句一定用非入聲的仄聲[tseh-siann]，也就是第二、三、七聲。
- 第 1 句會當綴第 2、4句，用平聲（第一、第五聲）來押韻；或者是綴第 3 句，用非入聲的仄聲。
類似頂面開尾韻的情形，實際上，押仄聲的例，佔絕大多數。
呂柳仙《勸世歌 Khuàn-sè-kua》舉例：
這款的歌真希罕 [tsit-khuá ê kua tsin hi-hán]（尾字 -án 第二聲）
專講勸人在世間 [tsuan kóng khǹg--lâng tsāi sè-kan]（尾字 -an 第一聲吊懸調）
人有真𠢕真頇顢 [lâng ū tsin gâu tsin hâm-bān]（尾字 -ān 第七聲）
俗語所講為人難 [sio̍k-gí sóo kóng uî-lîn lân]（尾字 -ân 第五聲吊懸調）
（以上彼葩押閉尾韻非入聲 an 韻母，有兩句吊懸調押韻）
陳清波編《最新勸世了解歌》（台北 周協隆書局 1935 年初版）舉例：（用字我有改過）
聽歌若有作田人 [thiann-kua nā ū tsoh-tshân-lâng]（尾字 -âng 第五聲吊懸調）
轉去一年收兩冬 [tńg--khì tsi̍t-nî siu nn̄g-tang]（尾字 -ang 第一聲吊懸調）
有人坐船出外港 [ū lâng tsē-tsûn tshut guā-káng]（尾字 -áng 第二聲）
予伊順風一片帆 [hōo i sūn-hong it-phiàn-phâng]（尾字 -âng 第五聲吊懸調）
（以上彼葩押閉尾韻非入聲 ang 韻母。有三句吊懸調押韻，像我講的，這種情形比例真低，我佇頂面呂柳仙規部[phō]唸歌 66 葩攏揣無例，就用陳清波的版本來thap。呂版實際上是將陳版的頭、尾幾葩仔提掉。）
(二)、入聲（-p/-t/-k韻尾）：
- 第 2、4句押第八聲。
- 第 3 句一定用第四聲。
- 第 1 句用第四聲。
另外，根據頂面《馬家央媒人求親新歌》的 -o̍h 第八聲出現佇第一句佮第四句韻跤的情形來類推，我認為「理論上」佇遮第 1 句用第八聲嘛可以，但是，我一時並無揣著實例。原因除了佮頂面分類的第三句類似道理（結構應倌、較好揣字）以外，閉尾韻入聲字佇台語口語的總字數無濟，伊本質上也較無適合提來吟詩、唱歌做韻跤，因為無好牽聲、拖長，歹表現句尾悠遠的音樂效果，像古早的文言詩用入聲字來押韻的嘛足少。呂柳仙彼部勸世歌 66 葩內底，只出現兩葩是押閉尾韻入聲字，而且四句尾字攏是第四聲、第八聲、第四聲、第八聲的變化，如下：
呂柳仙《勸世歌 Khuàn-sè-kua》舉例（兩葩無相紲）：
會做兄弟如手足 [ē tsuè hiann-tī lû tshiú-tsiok]（尾字 -iok 第四聲）
父母親情是骨肉 [pē-bó tshin-tsîng sī kut-jio̍k]（尾字 -io̍k 第八聲吊懸調）
咱人著照序大約 [lán lâng to̍h tsiàu sī-tuā iok]（尾字 -iok 第四聲）
日後才有好結局 [ji̍t-āu tsiah ū hó kiat-kio̍k]（尾字 -io̍k 第八聲吊懸調）
做人父母著phah-tat [tsuè-lâng pē-bú to̍h phah-tat]（尾字 -at 第四聲）
囝若無教上食力 [kiánn nā bô kà siōng tsia̍h-la̍t]（尾字 -a̍t 第八聲吊懸調）
有人心神用一節 [bô-tshái sim-sîn īng tsi̍t-tsat]（尾字 -at 第四聲）
飼大漢予伊不孝蓋毋值 [tshī tuā-hàn hōo i put-hàu kài m̄-ta̍t]（尾字 -a̍t 第八聲吊懸調）
以上的格律，唸歌藝人並袂曉用頂面的術語來解說，但是怹自自然然唱唸出來的，就符合我所講的格律。但是咱遮的「智識份子」，若無人分析出這種規律，而且有意照規律來行，就僫得做會出「詩樂和諧[si-ga̍k hô-hâi]」的四句聯七字仔歌詩。
若是「無嚴格」的四句聯押韻，親像第三句尾字，會使凊彩用一个「無仝字母」的仄聲字（這是布袋戲四連白[sì-liân-pe̍h]的「典型格律」）；閣有開尾韻內底，仝款「喙型」的口音韻佮鼻音韻會使互相押韻（a/ann, i/inn, ua/uann等等）；甚至 am/an/ang，im/in/ing 有時嘛當做仝韻跤等等（野台歌仔戲定定聽著），這我佇遮攏無討論。
請注意：若提自清朝以來所出版，全部的「歌仔冊」文獻來整理，無法度歸納出以上遮爾嚴格的格律，因為早期的歌仔冊，押韻較 ling，但是日本時代佇台灣出版的歌仔冊，有一寡作者，親像梁松林、陳清波，就有合我所講的規律咧講究。戰後咧走江湖，高明的唸歌藝人，像呂柳仙留落來的錄音資料，嘛攏是按呢。非專業的民間相褒，共伊提來分析起來，大部份嘛攏有符合！
怹佇無意識中，掌握會著這種規則，但是我咧臆，有法度明白解說出來的人無濟。不過，梁松林佇《馬家央媒人求親新歌》上冊欲收煞的時，明白提起「這欵句豆即通品，頂仄下平分有真」（這款句讀才通品，頂仄下平分有真）[tsit-khuán kù-tāu tsiah-thang phín, tíng tseh ē piânn hun ū tsin]。以兩句做一个單位，來分「頂」句佮「下」句；iah若以四句一葩來講，「頂仄」就是第一、第三句用「仄聲字」收尾字；「下平」就是第二、第四句用「平聲字」做韻跤。當然，伊按呢講傷過簡單，透過我這篇詳細的分析，咱才會當充份明瞭內中曲折的係項。
總講一句，台語四句聯、七字仔唸歌的押韻規則，絕對毋是親像真濟研究者用「四句攏總押韻」這種粗淺的講法、含糊的概念會當掌握的。著愛照我歸納的規律，tsiah有才調做會出音韻上媠氣的唸歌曲詞[khik-sû]。
補充一：
台語四句聯這種押韻規律，雖罔佇逐句非句尾的所在（第一字至第六字）完全無要求平仄，這點比文言的七言絕句較 ling，但是伊也有比七言絕句較講究、較嚴的所在，就是佇第二、四句，袂使得用「非入聲的仄聲」抑是第四聲；閣佇第三句的尾字，雖然用「非 -h8 的仄聲字」，但是猶原愛佮第二、四句韻跤的平聲字，屬「仝一个字母」在內。就這个觀點來看，台語所講的「鬥句 tàu-kù」，應該會當佮「押韻 ah-ūn」的概念做一寡分別。「押韻」較強調需要押韻彼幾句的韻跤，若無押韻迄幾句的尾字，只要「聲調」佮韻跤字平仄對反，「韻母」佮韻跤字完全無 tī-tāi 攏無要緊；但是台語講的「鬥句」，是愛考慮第三佮第一句尾字攏嘛愛佮第二、四句「仝字母」的特殊要求，按呢四句做一个整體，將怹攏總兜[tau] 倚來「鬥」[tàu] 出理想、完美的四「句」連，形成四句句尾出現「低、懸、低、懸」按呢起落有致[khí-lo̍h iú-tì]的音樂性的節奏。
補充二：
我引入「字母」的概念來分析台語四句聯押韻，無用一般人較熟的「韻母」來討論，有兩个因素：
(1) 文言詩押韻所要求的「仝韻母」，無考慮著介音，但是台語愛考慮。
(2) 開尾韻平聲，佮開尾韻第八聲。前者像 a, â.；後者像 a̍h，若以「韻母」來論，舒聲佮入聲絕對是風馬牛不相及[hong má-giû put siong-ki̍p]，袂使押韻，但是台語會使，a, â, a̍h 是屬佇「仝字母」的吊懸調，所以我需要採用「字母」的概念來幫助分析，來拍破「韻母」概念的束縛。
這篇寫佇半年前 [tsit-phinn siá tī puànn-nî-tsîng]
無舉實例僫分明 [bô kí si̍t-lē oh hun-bîng]
今共改晟較完整 [tann kā ké-tshiânn khah uân-tsíng]
望恁指正鬥牽成 [bāng lín tsí-tsìng tàu khan-sîng]
往早四句蓋深奧 [íng-tsá sì-kù kài tshim-ò]
飄撇台語唱相褒 [phiau-phiat Tâi-gí tshiùnn sio-po]
歡迎相敆來探討 [huan-gîng sann-kap lâi thàm-thó]
哪塊學習哪𨑨迌 [ná-teh ha̍k-si̍p ná tshit-thô]
唸歌鬥句有竅妙 [liām-kua tàu-kù ū khiàu-biāu]
智識份子袂明瞭 [tì-sik hūn-tsú bē bîng-liâu]
走唱先覺攏會曉 [tsáu-tshiàng sian-kak lóng ē-hiáu]
頂仄下平真𠢕撨 [tíng tseh ē piânn tsin gâu tshiâu]
押韻法度學了離 [ah-ūn huat-tōo o̍h liáu-lī]
也著時時唸歌詩 [iā-tio̍h sî-sî liām kua-si]
捷聽捷讀有準備 [tsia̍p thiann tsia̍p tha̍k ū tsún-pī]
對喙現褒笑瞇瞇 [tuì-tshuì hiān po tshiò-bi-bi]
四句快唸僫出擢 [sì-kù khuài liām oh tshut-tioh]
頭殼實實mooh塊燒 [thâu-khak tsa̍t-tsa̍t mooh teh sio]
想無囥下暫且歇 [siûnn-bô khǹg-hē tsiām-tshiánn hioh]
觸景感應隨定著 [tshiok-kíng kám-ìng suî tiānn-tio̍h]
（台語「觸景」有雙重意思：予情景感觸著、無意中拄著）
語詞捌少僫鬥句 [gí-sû bat tsió oh tàu-kù]
揣無韻跤接身軀 [tshuē bô ūn-kha tsiap sin-khu]
頭尾對調換順序 [thâu-bué tuì-tiāu uānn sūn-sū]
顛倒來想展工夫 [tian-tò lâi siūnn tián kang-hu]
四句唸歌足心適 [sì-kù liām-kua tsiok sim-sik]
鬥句法度說明白 [tàu-kù huat-tōo sueh bîng-pi̍k]
聲調起落好配曲 [siann-tiāu khí-lo̍h hó phuè-khik]
定定接觸自然熟 [tiānn-tiānn tsiap-tshiok tsū-jiân si̍k]
以上是我隨意做幾葩仔予各位看講，欲照這種規則來創作，嘛無偌困難啦 ^_^
---
頂面圖片來源：國立臺灣大學圖書館數位典藏館－－歌仔冊與唸歌
Comments powered by Disqus.