物件扑無--去，台語有講「扑毋見 phah-m̄-kìnn」，但是已經罕得有儂三字（三音節）慢慢仔講，大常攏將前兩音節「濃縮」、合音變做 phàng-kìnn，「見」--字嘛有講文言音：phàng-kiàn。（phàng 記做本調第三聲，只是配合台羅个通例，其實伊是合音節，並無「單字本調」个概念）
phah + m̄ 相紲講，前字phah變調做高降調（失去入聲），後字變低平調，合音了後是拖長个高降調。即兩音節合音，本來應該是 pham 高降調，但是台語雙唇音聲母 p/ph/b/m，袂用得配雙唇音韻尾 m/p （pham/phap/pam/pap/bam/bap/mam/map 攏袂使--得），所以 phah + m 个「連音節」pham 个韻尾，需要進一步調整出台語會用得接受个音節結構。
上自然个調整法，著是 pham 个韻尾 m 綴後壁音節 kìnn 个聲母 k，來佮伊採用共款个「發音部位」（k 个發音部份是「軟顎 nńg-go̍k」，台語叫做 nńg-kiunn），所以 phàm-kìnn 著調整做 phàng-kìnn，phàng 个 -ng 韻尾，佮 kìnn 个 k 共款發音部份，這是上自然，亦是上濟儂个講法。
但是合音个講法，往往會有濟濟腔口變化，今仔日聽著龍井儂講 khàng-kìnn 這是後壁音節个聲母 k 進一步「同化」頭前音節个聲母 ph，予 ph 變 kh。
閣有清水儂講 khàng-khìnn 這是「進兩步」，前後兩音節个聲母互相同化个結果。著是講 phàng-kìnn 前音節个 ph 受後音節 k 發音部位个同化，變做 kh（猶原保留「送氣」）；而且後音節个 k 嘛受前音節 ph 「送氣」效果个同化，變做送氣音 kh（猶原保持原底「發音部位」）。
另外，亦有儂講 phàng-khì。照我分析，其實即種講法个台羅，愛寫做 pháng--khì（注意輕聲）。將合音閣變調了後个第一音節，當做是唸本調 pháng（佮「紡」共音），共伊當做單字動詞，意思理解做「扑失落」，然後加一个唸輕聲个動詞補語「去」。
諸君若聽有小弟个解說，汝台語音韻學(phonology)个智識著差不多出師矣。^^
Comments powered by Disqus.