台語「搵、駐、浸、漚、泡、沬」个差別

教育部台語推薦用字700字，雖然有一寡閣卡捷[tsia̍p]用--著个字伊無收著（親像即个"tsia̍p"），總是已經足豐富，值得咱用心共伊讀予通[thong]。按怎號做讀有通？我頂日仔有舉一例，親像用手洗衫个動作，照咱出个力，對輕到重，會用得分做「搦[la̍k]、挼[juê]、挩[thuah]、撋[nuá]」至少四種層次个動詞。

佇遮閣舉一例：用物件接觸液體[i̍k-thé]，照時間，對短到長，大概通[thang]分做「搵[ùn]、駐[tū]、浸[tsìm]、漚[au]」，另外「泡」是卡焦[ta]个物質成分佮液體混合，「沬bī」是指華語〔潛水〕。

「搵、駐、浸、漚」除了理解做時間上長短有差，嘛thang看做是入去水裡偌濟部份，佮程度个差別。
「搵」親像搵豆油，小搵--一下著好，食菜毋是咧食豆油。寫毛筆，先共墨汁磨予洘洘，才來搵毛筆尾（當然，現代做便个墨汁，袂偌洘，卡清，但是足烏）。
「駐」，驚仔新衫洗水會退色，用衫仔裾落去面桶水裡駐一下仔試看覓。即个「一下仔」是唸正常个變調，時間比頂面「小搵--一下」迄个「一下」唸輕聲--个，卡長小可。音韻唸輕聲个，表達个意義程度嘛卡輕，這是台語个奧義！
「浸」是歸个攏落去浸。若是儂咧浸浴，當然頭愛出來，伊个重點是歸个身軀攏浸。
「漚」，嘛是歸个攏浸落去，而且水分會完全𪐞[tòo]入去物件內底，甚至會予物件變質。親像講「衫仔褲浸--成半點鐘，著好通洗洗起來，毋通漚遐久，會臭去」。

其中即个「駐tū」真奧妙，是一部份佇水裡、一部份閣佇水外，但是真可能是「重要部位」佇水裡。

是按怎華語講〔溺死〕，台語欲講「駐--死」？因為只要鼻佮喙即部份入去水裡，真緊儂著會死。而且儂若跋落水，無可能放據在歸身軀攏浸入去水裡，的確會拚性命 扑滂泅[phah-phōng-siû]，㨰踜[kùn-lìng]欲起來水面頂，佇遐半浮沈。

以上十字台語動詞，推薦用字內底攏有出現，伊一條一條照音順分開列，咱愛會曉家治分析佮綜合。

台語个單字動詞，極[ki̍k]豐沛[phong-phài]、極幼路，咱著好好仔收集、學習。