台語「流鼻血」个比喻用法

「流鼻血」是一種異常个生理現象，除了即種字面意思以外，台灣華語受著日本通俗文化个影響，用〔流鼻血〕來形容儂看著真刺激个物件，特別是青春个肉體，致使身心興奮个狀態。

但是「流鼻血」佇台語自來个比喻用法，毋是講彼，是咧形容「非常親近、密切个人際關係」，親像「即个是伊流鼻血个知己」。這也有講「流鼻流血」（「鼻」愛變調）。

聽過真濟儂講起即種不可思議个生活經驗：拄過身無偌久个儂，若是有至親轉來看伊，伊感應著，一時間身屍就會流出鼻血。

俗語「見[kìnn]著親儂，流鼻血」有兩種用法，第一種就是頂段所講个字面意思；第二種是比喻用法，若有儂對待外儂傷過頭親密，共伊扶挺[phôo-thánn]、諂媚[thiám-mī/bī]，咱看袂過，就會罵講：「無，汝是見著親儂咧流鼻血是--毋？」