台語「漳泉濫」造成「辭彙上聲調个無一致」應該盡量避免

接紲頂一篇網誌〈對鹿港泉腔「去聲」無分陰陽，再論「調、負…」第七聲（陽去）个台語音教學〉，後學欲補充一个觀念：「漳泉濫 Tsiang-Tsuân-lām」造成「辭彙上聲調个無一致」應該盡量避免。（辭彙[sû-luī]）

先解說題頭：

「漳泉濫」原來个意義是指台語漳州腔佮台語泉州腔个混合，佇遮是取廣義个解說，包含所謂南部腔、台中腔、台北腔、宜蘭腔逐所在另外發展出來，已經佮漳、泉原鄉有出入个語音特色。

閣來，啥乜叫做「辭彙上聲調个無一致」？除了佇頂一篇所舉个例，佇遮閣來講別種例，予各位了解我論說个母目[bú-ba̍k]（宗旨、要點）：

咱知影台中腔是第四聲、第八聲兩種入聲个本調，講法無分，攏唸中短調，親像「有色」佮「有熟」共音（但是變調了後有分）。有一寡南部个台語專家，佇公開个場合，特別是佇關係著參賽者名次、獎金个台語演講、朗讀个評審過程，主張第八聲唸做佮第四聲共款，毋著，引起台中个台語專家大憤慨！台中个專家認為這著是怹个爸母話，亦是怹在地語言文化个特色，袂凍容允外地儂來否認。南部儂袂使遮拗蠻，將家治个腔口當做唯一正確來壓迫別種个台語腔。即種做法，佮用華語來迫害台語共款壓霸。

台中專家所講个，原則上，後學完全贊同。但是佇咧進行台語教學、比賽評審、廣播訓練个時，若是學生、學員出現「辭彙上聲調个無一致」，這咱有需要共伊糾正。

具體舉例：「彩色[sik]、方式[sik]、教室[sit/sik]、消失[sit]、消息[sit]、風濕[sip]」，遮个詞，尾字攏是第四聲个字；對照「煮熟[si̍k]、主席[si̍k/si̍t]、事實[si̍t]、鳥翼[si̍t]、練習[si̍p]、空襲[si̍t]」遮个詞，尾字攏是第八聲个字。列表：

A類第四聲：色、式、室、失、息、濕

B類第八聲：熟、席、實、翼、習、襲

以上 A/B 兩類，攏分別有六字。若是一个學生个發音，A類、B類个字，本調完全攏無分，按呢咱著接受伊是台中腔迄種型態个發音法，毋通講伊毋著，毋通共伊扣分。但是萬不一，伊佇 B 類个六字內底，前兩字个本調唸做佮 A 類無分別（台中腔），另外四字个本調煞又閣唸做南部腔个高短調。這著是我所講个「辭彙上聲調个無一致」！

咱台語教師、訓練者，毋通單獨看伊 B 類迄兩字佮 A 無分，著直接認定這是正確个台中腔，所以袂使算伊毋著，準--過。咱愛有系統性个觀念，觀察伊是毋是所有 B 類个字，攏保持一致，可比講，照南部腔攏唸高短調，或者是照台中腔，攏唸中短調。

伊若無按呢做，著愛糾正伊。糾正个做法，看伊是佗位个儂，盡量照怹在地个腔口來指導伊，予伊个發音保持系統性个一致，而且閣尊重怹在地个腔口特色。若無按呢 做，放據在伊去，的確會造成天下大亂，予學生隨意去唸，可比 B 類个字，我是兩字唸 A 類，但是汝是四字唸 A 類，這絕對會造成聽話者个大困擾，無法度正確、快速來處理、掌握即種發音，所以毋是台語教學、訓練个正路。

台語因為「漳泉濫」發展个跤步，逐所在無共款，有个偏泉，有个偏漳，各種組合，千變萬化。總是，相濫、進化个結果，猶原有某一種系統性會產生，予各地个腔口攏會凍予儂進行抽象性个歸類佮對應。無共腔口个儂互相接觸，雖然怹解說袂出來遮个原理，但是怹个頭殼內个語言處理神經線，會不知不覺，一直咧進行「系統性个比較、對應」个處理過程，來適應、理解對方个腔口。這著是為啥乜台語腔各地無siâng，規則無仝，但是又閣會凍互相理解，背後个奧妙所在。

但是若準「辭彙上聲調个無一致」情形傷嚴重，以上所講迄種頭腦內不自覺个腔口系統對應處理，著會定定敗馬，發生溝通个困難。

所以，佇咱推廣、傳承、教學台語个過程中，「漳泉濫」造成「辭彙上聲調个無一致」即種發音現象，應該盡量避免，將「例外」个字詞控制予愈少愈好。