台語「疎開」

台語「疎開 soo-khai」本是日文漢字詞，佇日本時代二戰後期个用法，是指政府將都會區个居民暫時遷去庄跤分散蹛，根本原因是避免空襲傷亡。

到國民黨時代，已經無空襲，但是民間將政府强制个遷村嘛叫做「疎開」，即種疎開就永遠無可能復倒[hok8-to3]本居地矣。

百姓个本鄉，有个予政府徵收去起軍用機場；有个汙染破壞甲袂蹛得；有个予政府變更地目，俗卸[sio̍k-sià]予財團。

本來台灣儂疎開，是為著走閃炸彈；後來煞變做是咧走閃官虎惡豹（虎、唬仝音；豹、霸仝音）。

即篇佇 Facebook 刊出來，得著 W.b. Chen 先生回應，講：

嘛已經有用佇像:
怹看m7-su7-se3(毋事勢?), 攏疏開矣(攏走閃矣)。
頭家今仔日khi55moo55敢若足袂婸兮, 逐家就目睭擘予金, 愛知影通疏開; 啊若走業務兮, 就量早出門噢。

恆春李大姐回應講：

捌聽過「疎開」个思雙枝，阿媽是按呢唱个：

二次大戰个時代　男女嫁娶無豬刣
物資缺乏配給來　借肉請客可憐代

物資缺乏無法度　有錢無當去剪布
咱著簡單來娶某　正來完成人生路

每日空襲飛機來　逐家毋敢蹛厝內
大儂囝仔去疎開　昭和投降才轉來