「幼齒 iù-khí」即个詞，阮細漢無聽過，較大漢个時社會才時行起來，變成通儂知个話。總--是，咱查歌仔冊語料、教會公報語料、廈英大辭典（佮補編）、台日大辭典、台灣話大詞典（陳修 2000二版），攏總無「幼齒」即个詞，到臺灣閩南語辭典（董忠司 2001）才看會著。可見「幼齒」是新詞。
（我个意思毋是講到二十一世紀「幼齒」才通行[thong-hîng]，辭典个記載難免綴袂著時行[sî-kiânn]个速度。）
教育部台語辭典（教典）也有收「幼齒」，伊个解說是按呢：
1.(名)幼小、剛長出來的乳牙。
2.(名)用來稱呼年幼的人、少女或是生手。
3.(名)形容年紀小或是技能生疏的人。
照伊三項解說个脈絡來判斷，咱通講「幼齒」个本義就是〔乳牙〕，引申指囡仔儂、少女、生手。
今我發現一个問題，就是教典「幼齒」个反義詞是「老鳥、粗牙」，可惜伊無標音。「老鳥」唸 lāu-tsiáu 無問題，但是「粗牙」到底按怎唸啊？
「幼齒」个本義若是〔乳牙〕，按呢伊个反義詞「粗牙」，較合理个唸法應該就是 tshoo-gê 才著。「齒 khí」對「牙 gê」（gê白話話）才著，「粗牙」即个詞就無應該唸做 tshoo-gâ（gâ 是文言音）。
唸文言音个「粗牙 tshoo-gâ」毋是無用著，阮兜有咧賣螺絲，tshoo-gâ 即个詞阮細漢逐日聽會著，就是指螺絲牙[gâ]个一種規格，較粗个gâ，另外有「幼牙 iù-gâ」、「mí-lih-gâ」个規格。
也就是無論是教典个解說，抑是是我自來个語感，tshoo-gâ 還 tshoo-gâ，tshoo-gê 還 tshoo-gê，漢字仝款，但是音、義攏有分。
以上我个講法踢著鐵枋矣，中部漳腔个台語先進共我講，怹遐兩種意思攏唸 tshoo-gâ 仝音，因為「幼齒」是指機械較幼个齒輪，所以才用螺絲牙[gâ]个粗牙[gâ]來做反義詞。
請教各位个講法佮高見，感恩。
以上佇面冊個人版面佮社團貼出來，佇社團遐用投票个方式，目前得著个結果是：
24位勾選『「幼齒」反義詞「粗牙」我講 tshoo-gê』
19位勾選『「幼齒」反義詞「粗牙」我講 tshoo-gâ』
8位勾選『「粗牙」我干焦用來指一種螺絲牙，唸 tshoo-gâ』
無儂勾選『「粗牙」我干焦用來指一種螺絲牙，唸 tshoo-gê』 按呢若是教典欲增收「粗牙」即个詞，可能著按呢處理： 一个條目是：
「粗牙 tshoo-gâ。釋義：（名）螺絲牙（紋路）的一種規格，紋路間距比相同螺絲外徑的「細牙」螺絲大，重機械結構常用粗牙螺絲，電子零件常用細牙螺絲。反義詞：幼牙 iù-gâ。」 閣另外一个條目是：
「粗牙 tshoo-gê 又音 tshoo-gâ。釋義：1.（名）比喻不再年輕的人，尤指較年長的女性，帶有貶義。2.（形、名）汁少，纖維粗，嚼起來費勁，老而大顆的檳榔。反義詞：幼齒 iù-khí。」
Comments powered by Disqus.