台語口語「老 lāu」个反義詞，單字是「茈 tsínn」（身心兩方面攏無成熟），兩字是「少年」（偏向生理）。「少 siàu」單字佇口語無用，咱講「伊較少年」，無講「伊較少[siàu]」，但是有講「伊較茈」（即種講法，中少年个台灣儂真濟已經袂曉得。）
（華語〔嫩薑〕台語講「茈薑 tsínn-kiunn」，但是〔老薑〕台語講「薑母 kiunn-bú/bó」較自然）
「老鳥 lāu-tsiáu」用來比喻團體內較資深个儂，本來反義詞是「茈鳥 tsínn-tsiáu」, 但是「茈鳥」佇當今台灣已經廢無去矣，差不多儂儂攏用「菜鳥」來做「老鳥」个反義詞，無儂講「茈鳥」矣。
「老鳥」个字面意思是「年老个鳥仔」，引申指資深个成員、入伍較久个兵士等等。
但是「菜鳥」个字面意思並毋是「少年个鳥仔」，「菜鳥」本來是指「飼欲刣來做菜食个鳥仔」（「菜」指配菜，就是〔菜餚〕，毋是指素食），也就是「食用鳥」。
阮細漢个時所聽著个「菜鳥」就是頂段所講「食用鳥」个意思，而且是專指食用个粉鳥。對應即種「菜鳥」个就是比賽用个粉鳥，華語〔賽鴿〕，台語我袂曉講，《新編華台語對照典》講是「比鳥 pí-tsiáu」。另外閣有專門飼來生卵个粉鳥（粉鳥仔卵是高級料理在內），這是毋是就叫做「生卵鳥 senn-nn̄g-tsiáu」？請先進賜教。
「菜鳥」變做「老鳥」个反義詞，用來指稱儂，這是按怎來个？照我所知，是對軍隊內底湠出來全台灣社會，變成通儂知个常用詞。
是按怎欲按呢用？因為「菜鳥」本義是欲予儂食个鳥仔，抑拄入伍个新兵，一定會予老兵喝起喝倒、kah東kah西（華語〔使喚來使喚去〕），註定予老兵食夠夠、食死死，所以才將新兵叫做「菜鳥仔」。
「老鳥」攏講「老鳥」，後壁無咧加「仔」，但是「菜鳥」加「仔」來講較自然。無地位、予儂看輕个物件、儂，台語後壁時常加「仔」。
「菜鳥仔」用來比喻新兵，鮮沢有力，比「茈鳥」閣較媠氣，可能是按呢，才真緊就取代「茈鳥」，變做有特色个台灣話，閩南語無按呢用，若有，也是台灣傳過去个。
福建人民出版社2006年出版个《閩南方言大詞典》並無收「菜鳥（仔）」即个詞，但是伊有收「菜豬 tshài-ti」、「菜鴿 tshài-kap」（就是食用豬、食用粉鳥个意思）。十年後閣擴充个版本（編輯中，未出版）目前也無收。證明我頂段所講是歸欉好好。
以上發表佇面冊，有先進賜教講華語〔賽鴿〕，台語有直接照字講「賽鴿 sài-kap」。
補充：「菜鳥」引申做新兵，資淺者个意思了後，進一步將「菜」單摘[tuann-tiah]出來做形容詞用，表示資淺--个、新進--个、較袂曉得--个，像講「咱較菜，著較認份、較巴結咧，啥乜代誌攏愛緊抾來做，才袂予老鳥釘咧壁--个」。這是教典「菜」--字無收个義項。
Comments powered by Disqus.