台語「蜂岫癰」毋是「蜂窩性組織炎」

以前佇台語辭典看著「蜂岫癰 phang-siū-ing」即个皮膚病名，咱現代儂難免會聯想對「蜂窩性組織炎」。

根據林仲醫師《皮膚病的台灣民俗醫學》p. 112 所講：『閩南語稱比「粒仔」「疔仔」還要大，範圍還要更廣的皮膚化膿性感染為「癰仔」(ing a2)。如「蜂岫癰」(phang siu7 ing)，代表病灶範圍很大，膿頭很多，看起來有如蜂巢的皮膚化膿性感染』。

但是「蜂窩性組織炎」所講个「蜂窩」是指親像蜂岫形體个皮下脂肪層本身，而且無一定會楦膿[hùn-lâng]（華語「化膿」），所以應該是無仝款个病症。

台語个病名，有个是對上古流傳落來个，佇古醫冊揣有來源。但是有个講法是生活經驗个觀察累積。即兩種往往佮現代醫學術語並無「一對一」个對應關係。

林仲醫師佇伊冊裡，講著台語「蛇 tsuâ」个病名，有列出三種用法，而且所對應个現代皮膚病名有足濟款。伊講真濟皮膚科醫師攏認定「蛇 = 帶狀疱疹」，但是其實「帶狀疱疹」只是「蛇个一種」，「蛇」毋是孤一種皮膚病，凡若病灶呈現線狀、條狀分佈个，民間攏叫做「蛇」。

邱偉欣老師賜教：『若用西方醫學對病症ê分類來看，「蜂岫癰」無法度對著一種病症。『「蜂岫癰」，意思是癰仔生佮葉葉是』，這種講法khah成是受着病毒感染，mā有可能是皮膚癌，iah有可能是一寡自體免疫疾病，造成皮膚gâu發炎，破皮，生粒仔。 「蛇」是水珠病毒bih tī神經節內底，趁lán人傷thiám抑是其他原因造成免疫力降低ê時，病毒就koh活過來，沿神經ê走向生出「蛇」，所以ē有面蛇，手蛇，纏身蛇。』

杜建坊先生另外寫一篇〈蜂岫癰〈phang-siū-ing〉敢是「蜂窩性組織炎」？〉