台語「討債」「受債」

台灣俗語講：「父囝相欠債」，翁某嘛是相欠債。即種思想，是民間將佛法个輪迴論、因果論簡化了後，用來解說人倫關係个一寡現象。

既然是「相欠債」，有時是父欠囝債，按呢囝兒出世就是欲來共父母討債个。所以囝兒袂珍惜序大儂个物件，家伙濫糝開用[khai-īng]、家私[ke-si]濫糝損斷[sńg-tn̄g]，種種个浪費，所以咱才用「討債」來表示「浪費」个意思。毋知節約[tsiat-iok]，𠢕撮汰[tseh-thuah]个囡仔，大儂就罵伊是「討債囝」、「討債囡仔」。

講「討債[thó-tsè]」是一種人生哲學[tiat/thiat-ha̍k]个思想。若講「討數[thó-siàu]」，是咧講平常做生理迄種真正个金錢相欠。所以咱袂使學華文个寫法，將一般个「討數」寫做「討債」，音無仝，意思嘛差足遠。

閣來，若準是「囝欠父[pē]債」，按呢伊出世就是來還債个，愛「承受」即个「債務」，接受父母个約束、教示，有孝序大，認路[jīn-lōo]做儂。所以看著囡仔無聽話、無規矩、無盡本份，序大儂就罵伊「毋受債[m̄-siū-tsè]」。

另外一種責備儂个話，「毋甘願做儂」，無直接用著欠債个觀點，毋過攏是相信講，出世來做儂著愛認份、照起工，有做儂基本个責成[tsik-sîng]佇咧。

註：撮汰[tseh-thuah]，定定用佇撮汰五款，撮汰身體等等重要个物件。