「貞」台語只有一音 tsing，佮「時鐘 sî-tsing」个「鐘」、「精神 tsing-sîn」个「精」台語仝音。「貞」佮「真 tsin」台語無仝音，請毋通予北京華語帶衰--著，北京華語〔貞〕變做佮〔真 ㄓㄣ〕仝音。
台語「精神」佮「真神」當然嘛無仝音，若是分袂出來，就算是臭奶呆，我毋是咧講歹話，是指喙舌控制了無好勢，「精」个韻尾个發音部位去予「神」个聲母牽去。
以下四組台語詞个呼音攏無啥仝，請唸看覓，若唸會好勢，汝个台語才有及格：
真神 tsin-sîn
精神 tsing-sîn
真誠 tsin-sîng
精誠 tsing-sîng
「貞」泉漳廈台个韻冊，一直到教典，攏只有 ing 韻，無 in 韻个讀法，這也符合中古音韻母个分類。
台灣華語佮台語有一項共同个變化：台灣華語是 ーㄣ、ーㄥ 混同；台語是 in / ing 混同。總--是，台語變愈緊、愈慘，im / in / ing 三十幾歲以下个台灣儂強欲合做仝一韻矣。im / in / ing 三个韻尾內底，-n 上倚近高元音 i 个發音部位，即種混同，大概也是因為喙舌懶屍个關係，毋是華語單向影響台語。
「英」字台語音 ing，像「阿英 A-ing」；華語音 ㄧㄥ，像〔小英 ㄒーㄠˇ ㄧㄥ〕，各位唸起來即兩个「英」有仝音無？
台語个 ing 往往佇 i 佮 ng 中央有一个過渡个 ə 母音，華語音 ㄧㄥ 無。即个過渡个 ə 母音，有儂蓋明顯，有儂較無明顯，照洪惟仁教授个調查，主要是個人差異，看較袂出來有明顯个地區性方言差。總--是，大部份个台語儂攏有即个過渡音。
所以華語〔小英〕佮台語「阿英」，若錄音落來，了後將前字音切掉，只聽後字音，通常分會出來佗一个是咧唸華語，佗一个是咧唸台語。
閣轉來講「貞」--字，台語自來無分漳泉、無分文白，只有一音 tsing。干焦有一个詞「tshing-tsiat-pâi」（貞節牌坊个意思），是唸送氣聲母 tshing，即个音可能是「貞節牌 tsing-tsiat-pâi」變音个結果，也可能是「清節牌」。
最近幾十年來，蓋濟儂「貞」台語唸做 tsin，這是受著華語「貞、真」混同个影響。
不過，也有先進根據中古音反切「知盈切、陟盈切」，主張「貞」台語著唸 ting（佮「丁」仝音）。
假使「貞」唸 tsing 是台語儂幾百年个走音，咱著根據古音聲母改正過來，換唸 ting，按呢咁講古音仝聲母个「知」字，台語白話音唸 tsai 也是無應該存在个錯音？從今以後，逐家袂使閣講「我知[tsai]」，著愛講「我 tai」，「tsai 毋tsai」著愛改做「tai 毋tai？」，「汝咁tsai？」著改講「汝咁tai？」這毋是咧傳承台語，是咧創造新語言。（「知」个白話音 tsai，也有所在帶鼻音唸 tsainn）
中古音韻冊（尤其是廣韻）个記錄是稽考台語音韻重要个參考資料，但是廣韻个編者毋是福建儂，即本廣韻也毋是欲記錄當時个福建話，經過一千年了後，當時个福建話佮近代个閩、台語也無可能完全無變化。廣韻个聲韻分類，佮閩、台語有相當个對應關係，但是也有袂少分合異同。
『簡單用中古音反切做唯一根據來「校正」台語傳統字音』，這毋但有名望个台語漢文先生無按呢做，學術界受肯定个研究者也無按呢做。
台語字音系統佮中古音系統無完全對應，這是袂凍否認个事實，連閩、台語本身都有幾若種腔口變化，聲韻調各有參差[tsham-tshi]出入，無可能用一套廣韻一對一簡單對應去切出各種台語腔个讀冊音。
若是台語某一字自來無論啥腔都只有唯一唸法，咱就應該認取、保存，設使迄種唸法無符合中古音聲韻分類，咱也無應該改伊，這才是守護母語个正路。欲創造一種吟誦唐詩專用个半人工語言，這咱也尊重，總是，這毋是台語个實相。
Comments powered by Disqus.