台語「貯飯、添飯」

華語〔盛飯〕，台語講「貯飯 té/tué-pn̄g」，另外也有講「添飯 thinn-pn̄g」。

台語即種「添飯」，並毋是指本來所貯个，食無夠，閣再加添[ke-thinn / ka-thiam]。是咧貯第一碗个時，就會用得講做「添飯」。也就是講，受詞若是「飯」，在我个語感，即个動詞 thinn，佮「貯」个概念仝款，並毋是額外加添。

細漢个時，袂曉添飯，一直攏是老母添予我食，後來老父看我漸漸大漢，家己添無問題矣，就叫我以後愛家己來。我一開始袂慣勢，一碗食完，欲閣食第二碗个時，將空碗㧣[tu]予媽媽，爸爸就整聲[tsíng-siann]提醒，我真歹勢，閣來就完全習慣家己添飯矣。

在我想，發育到一碗食無夠，愛食第二碗个年歲，應該就無需要閣麻煩大儂替伊添飯矣。

我看日本片，飯桌頂每一个儂攏交予主婦添飯，這毋是台灣个風例[hong-lē]。怹會有迄種風俗，也是因為怹傳統上是跪坐佇tha-thá-mih頂面咧食飯，若每一个儂欲添飯，攏著家己起身，麻煩--無打緊，不時kánn會捙倒碗箸盤碟[uánn-tī puânn-ti̍h]。

總是，咱該當著共序大儂、老大儂添飯才好。