圖片是 1912 年川合真永先生所編《通信敎授臺灣語講義錄》冊裡个兩頁。參考即份寶貴个台語教材佮其他个台語文獻，咱 thang 知：
一、「飯包 pn̄g-pau」是台語在來詞，後來台灣儂學日語詞、唸台語音「便當 piān-tong」，甚至戰後來台灣个華語嘛綴咧按呢講。阮細漢有一段期間，看著主張正統中文个作家學者佇報紙反對即種講法，認為不倫不類，總是到今[tann]台灣社會無論台、華語，攏足慣勢講「便當」。
二、西洋 bread，講做「麵包 mī-pau」，清朝尾佇福建就真時行，1873 廈英大辭典、1883 英廈辭典攏有收，另外也講「bīn-pau」。迄當時福建儂可能無講 pháng。台灣儂佇日本時代早期也是講 mī-pau，有川合先生个冊佮其他文獻做證。
三、日本儂來台灣了後，引進 パン 个講法，日文漢字也是寫做「麵包」，但是講 パン，語源是葡萄牙語 pão。日本時代中後期台灣儂才普遍攏綴日本儂講做 pháng，1931-2 台日大辭典並無收 pháng。
四、現代个台灣中少年儂講 mī-pau，毋是對古早福建、台灣儂傳落來个，是另外對華語學來个。
五、日本食食[tsia̍h-si̍t] すし（壽司），台灣儂拄開始翻譯做「醋飯箍 tshòo-pn̄g-khoo」，所以 1931 台日大辭典標明「醋飯箍」是「新語」。すし个做法、材料、形體百百款，咱看 臺灣語講義錄 寫「一枝醋飯箍」（對應日語「卷鮨（まきずし），是すし个一大類 ），大概迄陣通常會用紫菜將醋飯 包做圓柱形，才算「枝」，而且叫做「箍」，按呢手好扲[gīm]、閣食會飽足。
六、可惜「醋飯箍」即種意思清楚、真有台語味、日本時代个台灣儂新造詞，早就廢無去，雖是台語老先覺也無的確有聽過，逐家攏嘛講 sú-sih（另外閣有長輩講「臭酸个飯」）。咱台灣儂予日本儂管半世紀，台語造詞能力直透退化去，愛綴日本儂講外來語；閣予中華民國流亡集團管七十冬，規氣攏講華語好啦。
Comments powered by Disqus.