台語 thuh-tshàu，教育部台語辭典寫做「黜臭」。台灣个網路鄉民寫做火星文「吐嘈」抑是「吐槽」，也用來翻譯日文ツッコミ，就按呢佇網路流行起來，連中囯儂嘛吸收去用，中囯大部份寫「吐槽」。
按呢無夠氣[khuì]，中囯儂閣進一步創造一个新詞〔槽點〕，就是指「會予儂黜臭个點」。〔吐槽〕、〔槽點〕已經變做中囯幾落億網民 通[thong]儂知个用語，但是我相信怹多數儂毋知源頭是台語。
請注意，thuh-tshàu 是台語，毋是閩南語，閩南無即種講法，若有，也是最近對台語學過去个。當咧編輯中个新版閩南話大詞典清楚標明這是台灣用詞，漢字伊寫做「托臭」。
教育部用字「黜臭」儂讀較無，閩南話詞典用字「托臭」儂可能會讀做 thok-tshàu，總--是「托」字較簡單，也確實有 thuh 个白話音，像「托球 thuh-kiû」、「托缽 thuh-puah」。 兩
岸華語儂，大範大範[pān]借台語入去怹个語文內，有借無還，閣用這做基礎來造新詞。顛倒咱台語儂無才調對 thuh-tshàu 來造新詞，若有儂造新詞「臭點 tshàu-tiám」恐驚會予台語文界嫌講無儂按呢講，嫌講這毋是台語，毋通[thang]用。
台語个活力佮華語个活力就差佇遮！
補充：我即篇鋪佇面冊，看著先進个回應，才知影 thuh-tshàu3 有儂講 thuh-tshâu5。我本身佇做兵个時學著个，佮教典所記攏是 thuh-tshàu3。我略仔憢疑，咁講這是因為台語詞 thuh-tshàu 變做華語〔吐槽/嘈〕了後，因為〔槽/嘈〕是唸上升調，一寡台語儂出口轉進口，煞變做唸 thuh-tshâu5？不而過，怹有儂講二十幾年前怹就聽著儂台語講 thuh-tshâu，時間真早，按呢欲發生出口轉進口个可能性就較低，問題是，tshâu 實在揣無適當个台語詞素來對應，thuh-tshâu 个詞構就無法度分析、解說。
總是，咱也著尊存活語言。我去面冊臺灣話資料交流所辦問卷，講 thuh-tshàu 抑是 thuh-tshâu 个儂大概是 60 票 對 10 票。另外也有一半位講 tu̍h-tshàu。
Comments powered by Disqus.