呂柳仙佮邱鳳英唱過真儕本無仝个勸世歌。有兩本有幾葩仔有重疊[tîng-tha̍h]，佇遮小共比較一下。呂柳仙唸个歌，我聽著真明，著準有幾字仔毋知意思，至少音足清。毋閣邱鳳英个著kâm瀾kâm瀾，有寡所在連音都聽袂明。
先記呂老師个：
勸恁列位朋友道，毋通專心想thit-thô，酒to̍h小[sió]飲才有好，色是削骨个利刀。
有个一款專想thit，thit甲有暝共[kāng]無日，萬貫江山若開失，家事[ka-sū]沈重huānn袂直。
愛開愛thit儂會散，興[hìng]个講按呢無相干，開跋食thit無制限(tsè-hān)，sing來生活to̍h困ân。
曉理个聽著誠呵咾，罔夫个聽著火誠to̍h，唸iah未煞幹佮tshoh，無彩我唸个功勞。
勸恁列位眾兄弟，見著查某著ue-tî，有錢通開咱伙計（來喔來喔），無錢鏨頭路旁屍喔。
有个tit卜綴儂開查某，一暗開著歸百箍，厝个有某著罔度，無牛駛馬咱罔胡。
勸恁顧某是實事，歹囝損壞著身軀，有个佇咧賣某開酌婦，愛愛寮佇去份股株。
會得來thit-thô免儂教，有翁查某毋通bâ，若卜便宜毋捌飽，惡猴會去hông tok後跤。
查某若是有翁婿，有翁查某毋通開，有翁查某若卜愛，後跤筋會去予儂刣。
抑若無翁个查某無要緊，無某才通佮伊親，看戲招佮咱鬥陣，兩个出門誠風神。
有个被[pī]著花粉邪，無錢酒菜來kâng賒，卜行花間毋知影，虎是不比馬通騎。
騎虎不比tit騎馬，有个為著起色迷，受重輕傷是犯勢，有時仔性命別儂个。
以上聽無意思个是 "ue-tî" 這兩个音。
（2023-04-28補：國立臺灣文學館《臺灣唸歌集第一集－－呂柳仙》p.192解說是：「推開跟提防」。）
閣來記邱老師：
有(iú)緣朋友來相會，著是請聽新歌卜來交陪啊，這塊新歌是初寫過，亦有趣味个佮笑詼。
愛開愛跋久會散，有儂是想講無相干，開跋食用是無制限[tsè-ān)，家庭生活著[tio̍h]困難。
有个一款是專想thit，無想終身生活日。偆一寡財產若開失，家庭著會huānn袂直。
一款是開甲田煞賣[buē]，食酒喝拳扑笑詼，囗囗囗囗行押尾，毋通無想著面底皮。
開是卡快趁卡僫，tshit-thô免錢永是無。想行暗路真毋好，家庭不時起風波。
小弟tshit-thô亦真興，恐驚損害著家庭。日--來專食是暝專穿，所致我開才囗囗。
囗囗囗囗囗囗囗，有錢毋免加儂囗，煙花个查某毋通惹，虎就(tsiō)是不比馬通騎。
騎虎不比是騎馬，犯勢性(sìnn)命著伊个，受重輕傷是犯勢，勸儂毋通被色迷。
小弟所講是有影，請恁詳細逐家聽。嫖賭飲也(ā)是損身命，勸儂歹路毋通行。
以上聽無个是用囗表示个部份。
（2023-04-28補：國立臺灣文學館《臺灣唸歌集第三集－－邱鳳英》p.52， 頂面第四葩第三句伊寫「終其tāi chiok是thiànn ah尾」。第六葩第三、四句是 「一來chhoân食sī二chhoân穿，所致我khai chiah bē 成a。 下葩頭兩句是「我seng chhoân穿a二chhoân食li，有錢m̄免a ke人賒a）
閣來比較姻兩个重疊迄兩句：
呂：有个一款專想thit，thit甲有暝共[kāng]無日，萬貫江山若開失，家事沈重huānn袂直。
邱：有个一款是專想thit，無想終身生活日。偆一寡財產若開失，家庭著會huānn袂直。
呂老師唸个「有暝共無日」比邱老師个「終身生活日」，「萬貫江山」比「偆一寡家伙」，閣有「家事」比「家庭」言辭攏卡高段。
呂：愛開愛thit儂會散，興[hìng]个講按呢無相干，開跋食thit無制限[tsè-hān]，sing來生活to̍h困ân。
邱：愛開愛跋久會散，有儂是想講無相干，開跋食用是無制限[tsè-ān]，家庭生活著[tio̍h]困難。
「興个」比「有儂」卡深刻。心適个是"tsè-hān" 對 "tsè-ān"、「困ân」對「困難」。意思攏會通，這嘛顯明講，漢字無夠額寫台語。
呂：有个被[pī]著花粉邪，無錢酒菜來kâng賒，卜行花間毋知影，虎是不比馬通騎。
邱：囗囗囗囗囗囗囗，有錢毋免加儂囗，煙花个查某毋通惹，虎就(tsiō)是不比馬通騎。
邱老師个第一句我聽無，歹比較。呂老師个「被著花粉邪」值著抾起來用。
呂：騎虎不比tit騎馬，有个為著起色迷，受重輕傷是犯勢，有時仔性命別儂个。
邱：騎虎不比是騎馬，犯勢性(sìnn)命著伊个，受重輕傷是犯勢，勸儂毋通被色迷。
「起色迷」比「被色迷」卡有力--一sut仔。毋閣呂老師个「色」字唸低調，變做是第八聲，扑算是喙踏thu̍t去。
呂老師是我聽過个唸歌先生內底，速度上緊个，記錄个時，攏綴袂著，不時愛點暫停。毋但緊，尚且伊个腔口佮阮个差上儕，總是，我iá是上蓋聽有伊个唸歌。若論到整體个唸歌藝術，是楊秀卿上高明；若針對語言來講，我上愛呂柳仙。
Comments powered by Disqus.