柳先勸世老步定 [Liú-sian khuàn-sè lāu-pōo-tiānn]
唸歌好聽真出名 [liām-kua hó-thiann tsin tshut-miâ]
當今的人較懂哧 [tong-kim ê lâng khah táng-hiánn]
烏白解說晟人驚 [oo-pe̍h kái-sueh tshiânn lâng kiann]
先將漢字配音標 [sing tsiong Hàn-jī phuè im-phiau]
總貼佇遮留予椆 [tsóng tah tī tsia lâu hōo tiâu]
即本歌詩蓋巧妙 [tsit-pún kua-si kài khá-biāu]
另工註解欲補齊 [līng-kang tsù-kái beh póo-tsiâu]
聲音檔有人傳上Youtube，請各位那聽彼份聲音檔，那看本文所記錄的歌詞漢字佮台羅。網路早有流傳別人的記錄、註解，錯誤百出，另工我會重註解。以下歌詞每幾葩就有一逝時間點，方便對照。感謝面冊朋友 W.b. Chen 先生，伊先做出規份記錄，我閣小可仔修改過。本文採用教育部台語漢字。
1
這款的歌真稀罕，tsit khuán ê kua tsin hi-hán,
專講勸人在世間啊，tsuan kóng khǹg--lâng tsāi sè-kan--ah,
人有真𠢕真頇顢，lâng ū tsin gâu tsin hâm-bān,
俗語所講為人難啊。sio̍k-gí sóo kóng uî-lîn lân--ah.
2
世界情理都淺淺，sè-kài tsîng-lí to tshián-tshián,
幾年中間就變遷，kuí nî tiong-kan tō piàn-tshian,
啊若會當改惡來從善，ah nā ē-tàng kái-ok lâi tsiông-siān,
一日無事小神仙。it-li̍t bô-sū sió sîn-sian.
3
講甲當今的世界，kóng kah tong-kim ê sè-kài,
鳥為食亡人為財，tsiáu uī si̍t bông lîn uī tsâi,
想真做人著海海，siūnn-tsin tsuè-lâng to̍h hái-hái,
死將何去生何來。sí tsiong hô khì sinn hô lâi.
4
咱欲來出世無半項，lán beh lâi tshut-sì bô-puànn-hāng,
轉去雙手又空空，tńg-khù siang-tshiú iū khang-khang,
來蹛世間若眠夢，lâi tuà sè-kan ná bîn-bāng,
死了江山換別人。sí-liáu kang-san uānn pa̍t-lâng.
5
有人出世有家伙，ū-lâng tshut-sì ū ke-hé,
兄弟無量起冤家，hiann-tī bô-liōng khí uan-ke,
想甲真做人若人客，siūnn kah tsin tsuè-lâng ná lâng-kheh,
死了江山別人的。sí-liáu kang-san pa̍t-lâng--ê.
6
做人毋通傷phīnn-mī，tsuè-lâng m̄-thang siunn phīnn-mī,
人蹛世間無幾年，lâng tuà sè-kan bô kuí nî,
喝一聲欲死目一下𥍉，huah tsi̍t siann beh sí ba̍k tsi̍t ē nih,
萬事袂佮人相爭。bān-sū buē kah lâng sio-tsinn.
------------------- 1'45"
7
心肝一人想一款，sim-kuann tsi̍t lâng siūnn tsi̍t khuán,
海裡上深天上懸，hái--lí siōng tshim thinn siōng kuân,
富貴艱苦免哀怨，hù-kuì kan-khóo bián ai-uàn,
莫非人講前世冤兮。bo̍k-hui lâng kóng tsiân-sè uan--eh.
8
世情是我看蓋透，sè-tsîng sī guá khuànn kài thàu,
奸雄的人毋通交，kan-hiông ê lâng m̄-thang kau,
勸恁少年茈共老，khǹg lín siàu-liân tsínn kāng lāu,
賰錢是命免人𠢕咧。tshun-tsînn sī miā bián lâng gâu--leh.
9
世間富戶窒窒滇，sè-kan hù-hōo that-that tīnn,
敢是𠢕人咧賰錢，kám-sī gâu-lâng teh tshun-tsînn,
啊若歹命看你外𠢕變，ah nā phái-miā khuànn lí guā gâu pìnn,
𠢕人有的佇咧窒壁邊。gâu-lâng ū-ê tī-leh that piah-pinn.
10
未來出世命先註，bē lâi tshut-sì miā sing tsù,
有的土公佮莽夫，ū-ê thóo-kong kah bóng-hu,
人奸好額錢遐有啊，lâng kan hó-gia̍h tsînn hiah ū--ah,
彼號𠢕人著共做軍師哩。hit-lō gâu-lâng to̍h kā tsuè kun-su--lih.
11
各項是人的命運，kok-hāng sī lâng ê miā-ūn,
毋是講人𠢕錢才會賰啊，m̄-sī kóng lâng gâu tsînn tsiah-ē tshun--ah,
彼號頇顢的毋煞免食睏，hit-lō han-bān--ê m̄ suah bián tsia̍h-khùn,
有人賰著規萬銀。ū-lâng tshun-tio̍h kui-bān gûn.
12
你若將遮的情理共比並，lí nā tsiong tsia-ê tsîng-lí kā pí-phīng,
莫非這是命生成，bo̍k-hui tse sī miā sinn-sîng,
歹命看你偌𠢕反，phái-miā khuànn lír guā gâu píng,
萬代袂當通超生。bān-tāi buē-tàng thang tshiau-sing.
------------------- 2'55"
13
世情是我看蓋現，sè-tsîng sī guá khuànn kài hiān,
先勸老輩後少年，sing khǹg lāu-puè hiō siàu-liân,
看人有錢免欣羨，khuànn lâng ū-tsînn bián him-siān,
人講恨命莫怨天。lâng kóng hūn-miā bo̍k uàn-thian.
14
天下的人káng千萬，thian-hā ê lâng káng tshing-bān,
領憑出世在世間，niá-pîn tshut-sì tsāi sè-kan,
有人一款出世就毋免趁，ū-lâng tsi̍t-khuán tshut-sì tō m̄-bián thàn,
有人一款度日都為難。ū-lâng tsi̍t-khuán tōo-li̍t to uî-lân.
15
世間的人無當比，sè-kan ê lâng bô-tàng pí,
自恨出世落塗時，tsū hūn tshut-sì lo̍h-thôo-sî,
歹命艱苦磨甲死，phái-miā kan-khóo buâ kah sí,
富貴差𡢃佮用兒。hù-kuì tshe-kán kah īng-lî.
16
當今世界講袂盡，tong-kim sè-kài kóng buē tsīn,
富貴由命不由人，hù-kuì iû bīng put iû lîn,
有人勸我我勸恁，ū-lâng khǹg guá, guá khǹg lín,
咱欲來出世有領憑。lán beh-lâi tshut-sì ū niá-pîn.
17
命中八字有輕重，miā-tiong pueh-lī ū khin-tāng,
飛天掛角無彩工，hui-thian-kuà-kak bô-tshái-kang,
有的頇顢無半項，ū-ê han-bān bô-puànn-hāng,
員外平平是咱人。uân-guē pînn-pînn sī lán-lâng.
18
彼毋是才情伊有phā，he m̄-sī tsâi-tsîng i ū-phā,
命中八字有精差，miā-tiong pueh-lī ū tsing-tsha,
人若開化免人教，lâng nā khai-huà bián lâng kà,
平平雙手一雙跤。pînn-pînn siang-tshiú tsi̍t-siang kha.
19
平平雙跤一雙手，pînn-pînn siang-kha tsi̍t-siang tshiú,
富貴兩字難得求，hù-kuì nn̄g lī lân-tit kiû,
歹命人仔較長壽，phái-miā-lâng-á khah tn̂g-siū,
人講前世做來今世收。lâng-kóng tsîng--sì tsuè-lâi kim-sì siu.
------------------- 4'12"
20
命中好歹免相諍，miā-tiong hó-phái bián sio-tsìnn,
咱遮艱苦人有錢，lán tsiah kan-khóo lâng ū-tsînn,
若求保平安無破病，nā kiû pó-pîng-an bô-phuà-pīnn,
食好食歹由在天。tsia̍h hó tsia̍h phái iû-tsāi thinn.
21
好歹無地通比並，hó-phái bô-tè thang pí-phīng,
自恨閻君無公平，tsū hūn Giâm-kun bô kong-pîng,
艱苦富貴三不等，kan-khóo hù-kuì sam-put-tíng,
有人佇咧睏媽祖宮。ū-lâng tih khùn Má-tsóo-king.
22
來講註生娘娘註好好，lâi kóng tsù-sinn-niû-niû tsù-hó-hó,
攑刀仙削都袂無，gia̍h to sian siah to buē bô,
未曾註食先註餓，bē-tsîng tsù tsia̍h sing tsù gō,
由在天地去發落。iû-tsāi thinn-tuē khì hua̍t-lo̍h.
23
莫非是人八字命，bo̍k-hui sī lâng pueh-lī miā,
我勸朋友佮弟兄，guá khǹg pîng-iú kah tī-hiann,
有人出世富戶囝，ū-lâng tshut-sì hù-hōo kiánn,
食老才落乞食營。tsia̍h-lāu tsiah lo̍h khit-tsia̍h-iânn.
24
會做乞食命登帶(?)，ē tsuè khit-tsia̍h miā ting-tài,
榮華富貴天催排，îng-huâ hù-kuì thinn tshui-pâi,
倒咧睏才共斟酌想看覓，tó leh khùn, tsiah kā tsim-tsiok siūnn khuànn-māi,
著食甲老來才會知。to̍h tsia̍h kah lāu lâi tsiah-ē tsai.
------------------- 5'15"
25
有人少年食未老，ū-lâng siàu-liân tsia̍h bē lāu,
匪類作歹做過頭，huí-luī tsok-tái tsuè kè-thâu,
敢無家伙若銅斗，kám bô ke-hé ná tâng-táu,
啊若喝一聲欲了親像放水流。ah nā huah tsi̍t siann beh-liáu, tshan-tshiūnn pàng-tsuí-lâu.
26
咱就是食甲老來才會知影，lán tō-sī tsia̍h kah lāu--lâi tsiah-ē tsai-iánn,
我勸善理予恁聽，guá khuàn siān-lí hōo lín thiann,
富貴艱苦自恨命，hù-kuì kan-khóo tsū hūn miā,
虎死留皮人留名。hóo sí lâu phê lâng lâu miâ.
27
註生婆姐無公平，Tsù-sinn Pô-tsiá bô kong-pînn,
代先註死才註生，tāi-sing tsù-sí tsiah tsù-sinn,
咱人尾溜看毋見，lán-lâng bé-liu khuànn m̄ kìnn,
圓人會扁扁會圓。înn--lâng ē pínn pínn ē înn.
28
牛佇咧快牽人僫料，gû tī-leh khuài khan lâng oh liāu,
你若無福氣趁錢居袂牢，lí nā bô hok-khì thàn-tsînn ku buē tiâu,
有通食用好了了，ū-thang tsia̍h-īng hó liáu-liáu,
百般為著腹肚枵。pah-puann uī-tio̍h pak-tóo-iau.
29
有的一款欲食毋振動，ū-ê tsi̍t-khuán beh tsia̍h m̄ tín-tāng,
予伊終身一世人，hōo i tsiong-sin tsi̍t-sì-lâng,
無大無細通向望，bô tuā bô suè thang ǹg-bāng,
身苦病疼就攄無空。sin-khóo pīnn-thiànn tō lu bô-khang.
30
人無千日的勇壯，lâng bô tshian-li̍t ê ióng-tsòng,
人講花無百日紅，lâng kóng hua bô pik-li̍t hông,
骨力敢會去夆笑戇，kut-la̍t kám ē-khì hông tshiò gōng,
欲食毋趁真不通。beh tsia̍h m̄ thàn tsin put-thong.
31
勸恁大家著反變，khǹg lín tāi-ke to̍h píng-pìnn,
勤趁無論小可錢，khûn-thàn bô-lūn sió-khuá tsînn,
袂當拄好若破病，buē-tàng tú-hó nā phuà-pīnn,
才免去跔人跤腿邊。tsiah bián khì ku lâng kha-thuí pinn.
32
勸恁大家著徹透，khǹg lín tāi-ke to̍h thiat-thò,
世間暫時來𨑨迌，sè-kan tsiām-sî lâi thit-thô,
日子若到連鞭倒，li̍t-tsí nā kàu liâm-mi tò,
江山某囝半項無。kang-san bóo-kiánn puànn-hāng bô.
33
世情是我上看破，sè-tsîng sī guá siōng khuànn-phuà,
有當食用免傷磨，ū-tàng tsia̍h-īng bián siunn buâ,
富貴艱苦到死煞，hù-kuì kan-khóo kàu sí suah,
平平仔過日敢有縒。pînn-pînn-á kè-li̍t kám ū tsua̍h.
------------------- 6'55"
34
有的一款有錢毋甘用，ū-ê tsi̍t-khuán ū-tsînn m̄-kam īng,
有的一款猶未趁伊就欲用代先，ū-ê tsi̍t-khuán ah-bē thàn, i tō beh īng tāi-sing,
有的就欲儉仔儉儉共別人幹光景，ū-ê tō beh khiām-á khiām, khiām kā pa̍t-lâng kàn kong-kíng,
彼號予伊有錢誠不明。hit-lō hōo i ū-tsînn tsiânn put-bîng.
35
有錢毋用蓋無彩，ū-tsînn m̄ īng kài bô-tshái,
無想欲用上大呆，bô siūnn beh īng siōng tuā-tai,
有的儉食忍寒可憐代，ū-ê khiām-tsia̍h lún-kuânn khóo-liân-tāi,
儉予怹的囝孫快活開。khiām hōo in ê kiánn-sun kiánn-sun khuìnn-ua̍h khai.
36
你共看世間一款大富戶，lí kā khuànn sè-kan tsi̍t khuán tuā-hù hōo,
敢無好額家伙規千租，kám bô hó-gia̍h ke-hé kui tshing tsoo,
出門衫褲密密補，tshut-mn̂g sann-khòo ba̍t-ba̍t póo,
予伊出世世間做錢奴。hōo i tshut-sì sè-kan tsuè tsînn-lôo.
37
親像這款真可惜，tshan-tshiūnn tsit-khuán tsin khó-sioh,
食佇咧無飽穿無燒，tsia̍h tī-leh bô pá tshīng bô sio,
有錢顛倒夆抾笑，ū-tsînn tian-tò hông khioh-tshiò,
儉食忍寒大毋著。khiām-tsia̍h lún-kuânn tuā m̄-tio̍h.
38
當今錢銀是好寶，tong-kim tsînn-gûn sī hó pó,
錢若有目地啥人敢看無，tsînn nā ū, ba̍k-tē sánn-lâng kánn khuànn-bô,
有錢使鬼會挨磨，ū-tsînn sái kuí ē ue-bō,
聽好買人拍𨑨迌。thìng-hó bué lâng phah thit-thô.
39
在人心肝的計算，tsāi-lâng sim-kuann ê kè-suàn,
一款有錢較寒酸，tsi̍t-khuán ū-tsînn khah hân-suan,
欺貧重富百百款，khi-pîn tiōng-hù pah-pah-khuán,
得欲留一个名聲夆流傳。tit beh lâu tsi̍t-ê miâ-siann hông liû-thuân
40
世間人有的欺貧佮重富，sè-kan-lâng ū-ê khi-pîn kah tiōng-hù,
無錢一字人上輸，bô-tsînn tsi̍t-lī lâng siāng su,
錦上添花人人有，gím--siōng thiam-hua lâng-lâng ū,
雪中送炭世間無咧。seh-tiong sàng-thuànn sè-kan bû--leh.
41
貧在路邊無人認，pîn tsāi lōo-pinn bô-lâng līn,
富在深山有遠親，hù tsāi tshim-san iú uán-tshin,
翁仔某爸仔囝這个錢要緊，ang-á-bóo, pē-á-kiánn, tsit-ê tsînn iàu-kín,
若甲無錢目地人看輕呵。nā kah bô tsînn, ba̍k-tē lâng khuànn-khin--oh.
------------------- 8'35"
42
淺淺理由來共論，tshián-tshián lí-iû lâi kā lūn,
爸囝有錢就會窮分，pē-kiánn ū-tsînn tō ē khîng-hun,
欲死著留一寡破病本，beh-sí to̍h lâu tsi̍t-kuá phuà-pīnn pún,
免放傷濟予囝孫。bián pàng siunn tsuē hōo kiánn-sun.
43
大家若有閒聽我講，tāi-ke nā ū-îng thiann guá káng,
較好勸善聽三冬，khah hó khuàn-siān thiann sann tang,
爸母恩情是真重，pē-bó un-tsîng sī tsin tāng,
伊來生咱咱生人。i lâi sinn lán lán sinn lâng.
44
爸母生囝世傳世，pē-bó sinn-kiánn sè thuân sè,
看破世情無幾个，khuànn-phuà sè-tsîng bô kuí ê,
有囝人講有後下，ū kiánn lâng kóng ū hiō-ē,
才免落人喙唇皮。tsiah bián lo̍h lâng tshuì-tûn phê.
45
無囝的人免苦痛，bô kiánn ê lâng bián khóo-thàng,
目睭恁看真濟人，ba̍k-tsiu lín khuànn tsin tsuē lâng,
好囝孤个就有望，hó-kiánn koo-ê tiō ū bāng,
啊若歹囝濟个無彩工。ah nā phái-kiánn tsuē-ê bô-tshái-kang.
46
人講好囝免用濟，lâng kóng hó-kiánn bián īng tsuē,
歹囝濟个討連回，phái-kiánn tsuē-ê thó liân-huê,
經紀頭路無愛做，kan-kí thâu-lōo bô-ài tsuè,
枵來飽去咧遊街。iau lâi pá khù teh iû kue.
47
好囝確實免濟个，hó-kiánn khak-si̍t bián tsuē-ê,
濟囝慢牛相挨推，tsē kiánn bān-gû sio ue-the,
會做爸仔囝相欠債，ē tsuè pē-á-kiánn sio-khiàm-tsè,
有的予怹爸母磨老皮。ū-ê hōo in pē-bó buâ lāu-phê.
48
爸母飼囝無論飯，pē-bó tshī kiánn bô-lūn pn̄g,
望咧欲親醒頭毛長，bāng tih-beh tshin-tshínn thâu-mn̂g tn̂g,
啊若生著歹囝若孵卵，ah nā sinn-tio̍h phái-kiánn nā pū-nn̄g,
祖家設佇咧大南門。tsóo-ke siat tī-leh tuā-lâm-mn̂g.
------------------- 9'55"
49
勸恁大家著明朗，khǹg lín tāi-ke to̍h bîng-láng,
貪心兩字仙毋通，tham-sim nn̄g lī sian m̄-thang,
政府掠著罪真重，tsìng-hú lia̍h-tio̍h tsuē tsin tāng,
著閣掠去監獄做犯人。to̍h koh lia̍h-khì kann-ga̍k tsuè huān-lâng.
50
聽歌遮朋友著正道，thiann kua tsia pîng-iú to̍h tsìng-tō,
奸雄兩字毋通學，kan-hiông nn̄g lī m̄-thang o̍h,
少年若是有做錯，siàu-liân nā-sī ū tsuè tshò,
改惡從善事就無。kái ok tsiông siān sū tiō bô.
51
在人心肝的志氣，tsāi-lâng sim-kuann ê tsì-khì,
山哩可改性難移，san--lī khó kái sìng lân î,
有的家內赤甲死，ū-ê ke-lāi tshiah kah sí,
不義之財無愛挃。put-gī tsi tsâi bô-ài tî.
52
一人一款的形象，tsi̍t lâng tsi̍t khuán ê hîng-siōng,
天下的人有奸忠，thian-hā ê lâng ū kan tiong,
有的爸母都無量，ū-ê pē-bó to bô-liōng
彼號予伊若會好天不從。hit-lō hōo i nā ē hó, thian put tsiông.
53
有人一生盡忠義，ū-lâng it-sing tsīn tiong-gī,
富而無怨貧無欺，hù lî bô uàn, pîn bô khi,
甘願度苦過日子，kam-guān tōo-khóo kè li̍t-tsí,
彼號艱苦往有出頭時。hit-lō kan-khóo íng ū tshut-thâu-sî.
54
做人奸詐無路用，tsuè-lâng kan-tsà bô-lōo-īng,
這世搶人後世還，tsit-sì tshiúnn--lâng āu-sì hîng,
善惡若到頭就報應，siān-ok nā kàu thâu tō pò-ìng,
遠佇千里近目前。hn̄g tī tshian-lí kūn ba̍k-tsîng.
55
道德兩字為根本，tō-tik nn̄g lī uî kun-pún,
爸仔囝無情絕五倫，pē-á-kiánn bô-tsîng tsua̍t ngóo-lûn,
後擺老來若失運，ā-pái lāu--lâi nā sit-ūn,
快活食飯艱苦吞。khuìnn-ua̍h tsia̍h-pn̄g kan-khóo thun.
56
會做兄弟如手足，ē tsuè hiann-tī lû tshiú-tsiok,
爸母親情是骨肉，pē-bó tshin-tsîng sī kut-jio̍k,
咱人著照序大約，lán-lâng to̍h tsiàu sī-tuā iok,
日後才有好結局。li̍t-āu tsiah ū hó kiat-kio̍k.
------------------- 11'25"
57
勸恁大家著做好，khǹg lín tāi-ke to̍h tsuè-hó,
世間暫時來𨑨迌，sè-kan tsiām-sî lâi thit-thô,
人講做惡有惡報，lâng kóng tsuè-ok ū ok-pò,
天理昭昭毋是無。thian-lí tsiau-tsiau m̄-sī bô.
58
另外勸遮的老兄弟，līng-guā khǹg tsiah(tsia-ê合音) lāu hiann-tī,
若有三囝共五兒，nā ū sann kiánn kāng gōo lî,
細漢應當著教示，suè-hàn ìng-tong to̍h kà-sī,
長大成人由在伊。tióng-tāi sîng-lîn iû-tsāi i.
59
有的一款序大人想無夠，ū-ê tsi̍t-khuán sī-tuā-lâng siūnn bô-kàu,
囝兒亂來講伊𠢕，kiánn-lî luān-lâi kóng i gâu,
飼大才予囝不孝，tshī tuā tsiah hōo kiánn put-hàu,
養育功勞放水流。iúnn-io̍k kong-lô pàng-tsuí lâu.
60
囝兒毋通傷溺愛，kiánn-lî m̄-thang siunn li̍k-ài,
細漢予伊亂亂來，suè-hàn hōo i luān-luān-lâi,
後擺長成就知害，ā-pái tióng-sîng tō tsai hāi,
予囝不孝合應該。hōo kiánn put-hàu ha̍p ing-kai.
61
會居好囝好德行，ē ki hó-kiánn hó tik-hīng,
捌爸捌母自然生，pat pē pat bó tsū-liân sing,
傷過束縛無路用，siunn-kè sok-pa̍k bô-lōo-īng,
彼是前世冤孽明明明。he sī tsîng-sì uan-gia̍t bîng-bîng bîng.
62
做人爸母著拍噠，tsuè lâng pē-bú to̍h phah-tat,
囝若無教上食力，kiánn nā bô kà siōng tsia̍h-la̍t,
有人心神用一節，ū-lâng sim-sîn īng tsi̍t-tsat,
飼大漢予伊不孝蓋毋值。tshī tuā-hàn hōo i put-hàu kài m̄-ta̍t.
63
唸這號歌勸恁好朋友，liām tsit-lō kua khǹg lín hó-pîng-iú,
會做爸囝是冤仇，ē tsuè pē-kiánn sī uan-siû,
好歹大家免窮究，hó phái tāi-ke bián khîng-kiù,
一旦無常萬事休。it-tàn bû-siông bān-sū hiu.
64
有爸有母著有孝，ū pē ū bó to̍h iú-hàu,
淫朋賭友毋通交，îm-pîng tóo-iú m̄-thang kau,
有趁錢銀娶家後，ū thàn tsînn-gûn tshuā ke-āu,
通送爸母上山頭。thang sàng pē-bó tsiūnn-suann-thâu.
Comments powered by Disqus.