台語文書寫表達个探討，應該脫離長期以來所用个，孤立考慮某一个音節按怎對應某一个漢字（抑是拼音字）个思考模式。應該愛量早發展到考慮整體个意義系統當中，台語个各種講法，包括字、詞、片語、成語、俗諺語，隨个仔隨个，佇內底按怎共伊安搭予好勢，欠缺--个 補添，重疊--个分化，才閣配合妥當个書寫符號，來建置一套嶄巖[tsâm-gâm]（完備嚴謹）个現代台語文表達系統。
這是後學毋知見笑，想欲懇請列位台語文先進，同齊來關心致意个一項目標。
從[tsîng]，到甲日本時代前期，閩台語一直攏是在地儂「十全」[tsa̍p-tsn̂g]个語言，有夠額予社會各階層、職業、領域个儂，自在滿意來運用。總--是，經過近代欲倚百年，外來統治者个惡質壓迫，台語行到目今遮爾落魄个坎站，連欲維持「家庭內个生活用語」即種最低个層次，都非常困難。
強欲絕種[tse̍h-tsíng]个生物需要人工个復育，強欲消亡个語言嘛是共款。
咱袂使閣只有隨儂隨意，孤軍奮鬥，佇咧實驗書寫符號，抑是從事文學創作。的確著愛有卡大个氣魄眼光，用人為、集體个力量，趁早來做整體台語文表達系統个基礎建置[kiàn-tì]。若無，著準到時執政者願意改變政策，來滿足咱个呼籲，咱嘛提袂出一套會凍予社會大眾，歡喜來接納个台語文表達佮溝通工具。
重點是「表達系統」－－啥乜意思，台語愛按怎表達，佇每一種意義範疇內底个輕重、角度、風格、正式度等等个分別攏有tsiâu-tsn̂g，這才是重點，若文字只是附帶个。
即種意義範疇个分類，姑不將著愛參考華語个系統，因為現時多數台灣儂，華語程度卡好過台語，伊用台語文表達，最大个困擾，著是定定先想著華語講法，煞想規晡，毋知台語按怎講。若是現有个台語，確實都揣無相應个講法，按呢看是欲對華語/日語漢字詞來吸收，照漢字唸台語音；抑是另外造台語新詞，抑是採用某種音譯方式，規套規套攏愛來制定。
即種表達系統，因為語言是活个，變化無窮个，所以無可能做甲包山包海，總是卡基礎性个建置猶原會做--得，嘛應該愛趕緊做。
因為台語已經踏入死亡个界線，需要人工个復育，無可能倚靠自然生湠予伊去自動恢復活力、活命，按呢袂赴市，擋袂椆社會快速个變遷。汝咱個人創作閣卡濟台文作品，投入市場，都無夠額予台文佇社會浮頭。
愛漢字个儂，若有夠濟，咱著攢漢字便便予伊去用，愛羅馬字个儂，若有夠濟，咱著攢羅馬字予伊去用。愛漢羅/LH个儂，若有夠濟，咱著建議伊按怎配搭，予使用者去決定著好，因為意識型態个問題無可能解決，所以無可能先決定出孤一套書寫形式个做法。（LH 是指指以羅馬字(L)為主，漢字(H)為副个台文形式。
毋通閣陷落佇：到底「全漢、全羅、漢羅、羅漢」佗一種才是理想个台文形式即種爭議內底。Sī-suā來建置啥乜意思攏講會出个台語文表達系統才是正途。
Comments powered by Disqus.