國民黨化解反核聲勢个兩項漚步

國民黨化解反核聲勢个兩項漚步：一、利用駙馬爺个肉體來麻痺民眾反抗个意識；二、利用司法來恐嚇[khióng-hat]反對黨精英。

---

堂堂一國人君（一區之長？）馬總統嫁查某囝，煞封鎖消息幾若個月，一點仔都毋予民眾鼻芳，同齊來分享喜氣，閣叫媒體愛尊重怹囝个隱私，媒體也乖乖聽話，毋敢問半句。

咱毋是欲偷看怹囝婿洗身軀，是按怎總統个囝婿連基本个名姓、身份來歷都毋冗早予國人知影？拖足久才公佈姓名三字，但是毋知年紀，連一張相片嘛無。全世界民主國家个總統，啥儂有像伊按呢做？

馬英九佮周美青即對假掰[ké-pai]个第一先生佮夫人，到底是將咱台灣儂看做家己儂，抑是看咱是奴隸，連身穿禮服个駙馬爺相片咱也無資格看？

閣請回想，當初藍軍佮媒體又閣是按怎「追殺」陳總統个囝孫，侵門踏戶，衝入去怹上班个所在，甚至飯店个房間。陳總統予藍媒抹烏，講是「美國儂个阿公」，結果根本無影。即馬，馬英九个查某囝佮囝婿攏是美國籍，藍軍一句話都無講，這算啥？

台灣儂總統个家庭，佇藍軍个心目中，只是親像動物園个猴山仔，不管時攏愛予觀眾看現現。但是馬英九个子女，至尊至貴，無容允咱攑頭起來眼--一下。

馬家封鎖消息个手段，層次袂輸是專制國家个頭目過身，驚仔發生政變，才著掩崁遮久。

身為一个民主（？）國家第一重要个公眾人物，馬總統伊嫁查某囝，創甲傷過頭神祕，完全超出保護隱私該有个站節，伊到底有啥乜內情毋敢予國人知？伊若佮中共頭儂做親情[tshin-tsiânn]，按算出賣台灣，咱欲按怎？人民有起碼愛知个權利！

結果，代誌个發展，予咱發現，伊先掩崁婚事足久，一旦開放消息，藍媒不約而同，攏顧咧報駙馬爺生做偌懸、偌緣投、身材偌好（一直咧報人魚線，親像咧報馬英九làu奶、獻大腿仝款），做 model 出台偌好趁。藍媒全然毋敢議論怹兩翁某，身為中華民國國家元首个查某囝、囝婿，毋但攏棄捒中華民國，提綠卡、做美國儂，即个囝婿蔡沛然閣有逃避兵役个大嫌疑，怹婚後定居佇中國香港，無儂知影怹咁會佮中國勾結，或者是會予中共控制椆咧袂，蔡沛然佇銀行食頭路，也無儂知影伊有咧替馬家洗錢無。這攏愛對國人有一个交代。

國安系統依法愛保護總統一等血親个安全，怹兩个煞走去中共國土定居，嚴重威脅咱个國安。

---

無兩日，閣出現一條新聞，吳乃仁、洪奇昌，予法院判罪。綜合起來看，國民黨咧變啥把戲，咱看現現：

國民黨面對社會反核，先將封鎖真久，馬小姐嫁予 model 个代誌公開，轉移規个社會注意力。

閣來，每一遍有啥重大議題，抑是大選，就掠兩个仔民進黨大老[tāi-nóo/ló]來刣頭，判刑確定，刣雞教猴，予即个「死道友，無死貧道」个民進黨个儂，毋敢閣傷假痟，𤆬頭來抗爭。

用八卦新聞來共普羅大眾洗腦，閣用罪刑來威脅佔少數儂个反對黨精英，這就是馬英九國民黨共台灣儂食死死个天羅地網[thia-lô tē-bóng]。

咱看國民黨所開个法院宣判吳乃仁、洪奇昌个罪名是『違法低售台糖土地』，真正會笑破腹肚，這咁毋是國民黨家己上蓋「專業」个代誌？無論是國有个海沙埔、國家公園，抑是農民个田地，一塊一塊攏予國民黨變更地目，俗俗轉賣予財團，咁毋是？