英語無漢語迄種聲調(tone)，干那有語調(intonation)。個別个字(word)，若是多音節字，音節之間是分輕重音；若是單音節字，著無像漢語按呢聲調無共，意思著無仝[kâng]。
雖是按呢，卜唸英語單音節字，照英語儂个習慣，是唸高降調。A, B, C...字母嘛是唸高降調。毋閣，咱遮个儂，塊唸A, B, C...攏唸高平調，親像華語抑台語个第一聲按呢。我細漢嘛攏綴儂按呢唸。
Thang講，高平調是咱个語言个「預設聲調」。所以塊吸收無聲調个外來語个時，因為需要予伊一个聲調，才會凍成做咱个語言个一部份，即陣，著套用高平調即種「預設聲調」。
即幾年，英語愈來愈時行。蓋儕儂平素講話，無濫幾字仔外語真袂過癮[kuè-giàn]个款式，得卜到甲無講外語，煞袂曉表達个程度。有佮外國往來个公司个上班族，愈愛làu英語。啥麼【我再check一下】【請對方confirm一下】【客戶來complain】【去跟經理argue】。即種用法，大常攏tshap一字英語塊講，罕得有儂講歸句个。
若是單音節个英語字，而且音韻結構近倚漢語个，親像 C+V（子音加母音）抑是 C+V+N（子音加母音加鼻音）即種个，姻嘛親像塊唸 A, B, C...按呢，唸做高平調：【很high（ㄏㄞ）】，姻毋是講【很high（ㄏㄞˋ）】。【很man】个man嘛是唸高平調。
我本身蓋袂慣勢按呢講，卡愛照英語本底个習慣，講「真high（hai31）」。毋閣我發現有儂會聽無，愛閣講一遍「真high（hai33）」伊才聽有。
這著是講，本底無聲調个外語，予儂吸收入來變做外來語以後，已經帶著本地个聲調語言个特色，必須愛固定唸某一種聲調，著準彼是佮本來外語个習慣無共款个聲調。若無，儂會聽無路來。「外語」佮「外來語」是兩種概念。
汝若講【很man33】，man唸高平調，在我聽來，tsiânn-si̍t【很娘】。愛講【很man31】，man唸高降調，毋才卡有查夫氣概。親像台語講「真勇(iong31)」，比【很勇（ㄩㄥˇ）」加真勇。
頂一段是塊講sim sng个。
Comments powered by Disqus.