媠氣台灣話「厚穢 kāu-ue̍h/e̍h/e̍rh」(018)
解說：kāu-ue̍h 形容身軀翕熱流汗，閣予有刺激性个幼幼仔黏佇皮膚，足袂爽快个感覺。
文例：作穡儂足艱苦，割稻仔、鼓粟仔个時，閣較 kāu-ue̍h，嘛著忍耐。即馬改用機器，就加較快活。總是，機器閣買袂起，步步攏著倩儂駛，趁無夠本錢，姑不將著休耕。政府也存範欲予台灣个農業滅亡，按呢台灣就無才調獨立自主。
（Tsoh-sit-lâng tsiok kan-khóo, kuah tiū-á, kóo tshik-á ê sî, koh khah kāu-ue̍h, mā tio̍h jím-nāi. Chit-má kái īng ki-khì, to̍h ke khah khuìnn-ua̍h. Tsóng--sī, ki-khì koh bé bē khí, pōo-pōo lóng tio̍h tshiànn lâng sái, thàn bô kàu pún-tsînn, koo-put-tsiong tio̍h hiu-king. Tsìng-hú iā tshûn-pān beh hōo Tâi-uân ê lông-gia̍p bia̍t-bông, án-ne Tâi-uân to̍h bô tsâi-tiāu to̍k-li̍p tsū-tsú.）
文例2：熱--儂去園裡翸草，坱著 kāu-ue̍h，轉來歸身軀起紅疱，癢-iah-iah，緊去逐醫生！
（即句根據鄭詩宗醫師佇 Facebook 回應个內容改寫，感謝。）
（Jua̍h--lâng khì hn̂g--lín phún-tsháu, ing tio̍h kāu-ue̍h, tńg--lâi kui sin-khu khí âng-phā, tsiūnn-iah-iah, kín khì jiok i-sing.）
註跤：「翸草」是用割草機除草。「逐醫生」是俚語用法，足要緊去揣醫生打揲[tánn-tia̍p]（治療）个意思。
漢字僫稽考：kāu-ue̍h 个 ue̍h，是偏漳腔，新泉腔是 e̍h，老泉腔是 e̍rh，即音个漢字僫揣，台日大辭典寫「厚鬱」，閩南方言大詞典寫「厚穢」，扑算攏是訓用字。
近義詞：「刺疫 tshiah-ia̍h」。
相關詞：「𩛩汗 kauh-kuānn」、「齷齪 ak-tsak」。
倚音詞：「厚話 kāu-uē」。
以上補充四个詞，教育部辭典攏有收，請參考。
© 潘科元 2013 版權所有
Comments powered by Disqus.